Հայաստանի Հանրապետության Կառավարություն

Միակողմանիորեն «Դեմ եմ» շարժումը հովանավորող լրատվամիջոցներն ակնհայտ շփոթության են մատնվել՝ տեսնելով, որ միջազգային կառույցները կուտակային կենսաթոշակի համակարգը ներդնելու հարցում սատարում են մեր երկրին: Հատկապես ազդեցիկ է եղել ԱՄՆ դեսպանի ելույթը երեկվա համաժողովում. «ԱՄՆ դեսպանն ընդդեմ ՀՀ բնակչության 80 տոկոսի» («Ժողովուրդ»), «ԱՄՆ դեսպանը «կողմ» է «պարտադիրին» («ՀԺ». չակերտների առատության նպատակը, հավանաբար, ընթերցողի կասկածամտությունը հարուցելն է), «Դեմ եմ»-ցիները ընդհատեցին «կուտակայինի» համաժողովը» («Ժամանակ»), «Իշխանությունը պարտադրում է ձեռնարկություններին փոխհատուցել 5 տոկոսները» («Հրապարակ»): «Կուտակայինին» նվիրված նյութերի մեծ քանակով աչքի է ընկել «168 ժամը», օրինակ՝ «Պարտադիր կուտակային համակարգի ներդրման արդյունքում միջին կենսաթոշակը կկազմի ընդամենը 40 հազար 400 դրամ»: Բայց և այնպես՝ «Նոր համակարգի ներդրումը ճիշտ քայլ է» («ՀՀ»), «Երկրի վիճակը շտկելու ճանապարհը լավ ռեֆորմներն են» («ՀԱ»):

Կտրուկ գնաճի ջատագովները
«Փորձագետները» շարունակում են պնդել, որ Մաքսային միությանն անդամակցելու դեպքում որոշ ապրանքների գնաճն անխուսափելի է: Թեման բազմակողմանիորեն է արծարծել «Առավոտը», որին հետաքրքրել են ոչ միայն Մաքսային միության «քաղաքական հետևանքները», այլև տնտեսական: ՀԱԿ տնտեսագետ Վահագն Խաչատրյանն, օրինակ, կանխատեսում է ոչ միայն «կտրուկ գնաճ», այլև անդամ երկրների շահերի բախում: Օրերս նա կարդացել է, որ «Բելառուսն ու Ղազախստանը լուրջ հակադրություններ ունեն հարկային արժութային միասնական քաղաքականություն վարելու շրջանակներում»: Մեկ այլ կուսակցական գործիչ՝ ՀՀՇ վարչության անդամ Հովհաննես Իգիթյանն էլ զգուշացնում է, որ «ՌԴ-ն ավելի վճռական ու հետևողական կլինի մեր տնտեսությունն ապամոնտաժելու ուղղությամբ», և այդ դեպքում ոչ մի նամակագրություն էլ չի փրկի Հայաստանը: «Ներմուծվող կաթնամթերքի թանկացումը ևս անխուսափելի է», - «Առավոտին» ձայնակցում է «Հրապարակը»: Մինչդեռ «ՀՀ»-ն հավաստում է՝ «ՄՄ-ում տնտեսվարողների համար մրցակցային խնդիրներ չեն լինի», քանի որ «ճանապարհային քարտեզի» հետ կապված օրենսդրական փոփոխությունները չնչին են»:

Այլևայլ
«Հրապարակը», «168 ժամը», մասամբ՝ «Առավոտը», «ծեծում են» կառավարության հրաժարականի բավականաչափ ծեծված թեման:
«168 ժամը» զրուցել է անկախ փորձագետ Արտակ Քյուրումյանի հետ, ում կատարած ուսումնասիրության համաձայն «Բաց կառավարության գործընկերությոանը» 2011-ից մասնակցող Հայաստանի կառավարության գործունեության գնահատականը գոհացուցիչ չէ: «Հրապարակը» վերլուծում է հունվար ամսվա սոցիալ-տնտեսական վիճակի ցուցանիշները և դրանք «ոչ հուսադրող» համարում, «ՀԺ»-ն՝ անդրադառնում ամբուլատոր պոլիկլինիկաներում համավճարի կիրառմանը, ինչպես նաև «Իրան-Հայաստան» երկաթուղու շինարարությանը, որն, «իհարկե, չի իրականանալու»: «Ժամանակը» թվարկում է «ամենահարուստ կին պաշտոնյաներին», «Ժողովուրդն» ու «Գոլոս Արմենիին»՝ մատնանշում սիրիահայերին օժանդակելու կառավարության քայլերը, «Առավոտը»՝ քննարկում այն հարցը, թե «բուհերի կառավարման խորհուրդների բարձրաստիճան ղեկավարները օգնո՞ւմ են, թե՞ խանգարում»: