Հայաստանի Հանրապետության Կառավարություն

Ուղարկել էլ. փոստին Տպել

Հայաստանի Հանրապետության վարչատարածքային միավորներն են մարզերը, համայնքները: Երևան քաղաքը ևս համայնք է:

ՀՀ տարածքը բաժանված է տասը մարզի և Երևան քաղաքի: ՀՀ մարզերում պետական կառավարման ոլորտի հարաբերությունները կարգավորվում են «Հայաստանի Հանրապետության մարզերում պետական կառավարման մասին» օրենքով, ՀՀ նախագահի հրամանագրերով և այլ իրավական ակտերով: Երևան քաղաքում տեղական ինքնակառավարման և տեղական ինքնակառավարման մարմինների ձևավորման առանձնահատկությունները պետք է սահմանվեն օերենքով: Օրենքով պետք է սահմանվեն նաև Երևան քաղաքում տարածքային կառավարման առանձնահատկությունները:

Մարզպետներն իրագործում են կառավարության տարածքային քաղաքականությունը, համակարգում են գործադիր մարմինների տարածքային ծառայությունների գործունեությունը, բացառությամբ օրենքով նախատեսված դեպքերի:

Մարզպետները օրենսդրությամբ իրենց վերապահված իրավասության սահմաններում մարզի տարածքում կառավարության տարածքային քաղաքականությունն իրականացնում են հետևյալ բնագավառներում` ֆինանսներ, քաղաքաշինություն, բնակարանային և կոմունալ տնտեսություն, տրանսպորտ և ճանապարհաշինություն, գյուղատնտեսություն և հողօգտագործում, կրթություն, առողջապահություն, սոցիալական ապահովություն, մշակույթ և սպորտ, բնության և շրջակա միջավայրի պահպանություն, առևտուր, հանրային սնունդ և սպասարկում: Տարածքային քաղաքականությունը նշված բնագավառներում մարզպետներն իրականացնում են մարզպետարանների աշխատակազմերի, մարզային ենթակայության կազմակերպությունների միջոցով:

Մարզպետները համակարգում են ներքին գործերի և ազգային անվտանգության, պաշտպանության, կապի, էներգետիկայի, հարկային, արտակարգ իրավիճակների և քաղաքացիական պաշտպանության ու այլ ոլորտներում հանրապետական գործադիր մարմինների տարածքային ծառայությունների գործունեությունը:

Օրենքով կարող են սահմանվել Երևանի քաղաքապետի ուղղակի կամ անուղղակի ընտրություն: Մինչև Երևանի կառավարման հարաբերությունները կանոնակարկող օրենքի ընդունումը Երևանի քաղաքապետին վարչապետի ներկայացմամբ պաշտոնի է նշանակում և ազատում Հանրապետության Նախագահը: Մարզպետները նշանակվում և ազատվում են կառավարության որոշմամբ: Կառավարության այդ որոշումները վավերացվում են Հանրապետության Նախագահի կողմից: Մարզպետի պաշտոնը համարվում է հայեցողական պաշտոն:

Մարզպետները հաշվետու և պատասխանատու են կառավարության առջև: