հինգշաբթի, 12 դեկտեմբերի 2013
Վազող ջրերի հայելին
ԱԺ-ում «Բնապահպանական և բնօգտագործման վճարների մասին» օրենքի փոփոխությունների երեկվա քննարկմանն անդրադարձը «Ազգը» խորագրել է «Անխոս ձուկը լավագույնս խոսեցրեց մեր խորհրդարանականներին»: Օրենքի նախագծի բուռն քննարկումը «168 ժամը» որակել է «Ջուրծեծոցի՝ ջրի խնայողության թեմայով», «Հրապարակը» հավելել, թե իբր «ԱԺ-ում սղղացրին հերթական աղմկահարույց նախագիծը»՝ «Հանուն բյուջեն օդից փող լցնելու»: Խորհրդարանի երեկվա աշխատանքը լուսաբանել են նաև «Ժողովուրդը», «Ժամանակը», «Գոլոս Արմենիին» և «ՀԺ»-ն, որը պարզապես հայտարարել է, թե «օրինագծի քննարկումը… սկանդալային ընթացք» է ստացել («Սկանդալ և շահերի բախում ԱԺ-ում»): «Հայոց աշխարհին» հետաքրքրել են գալիք տարվա բյուջեի «նորացված տարբերակի» վերաբերյալ տարբեր խմբակցությունների գնահատականները («Լարված, բայց կանխատեսելի քննարկում»), «168 ժամին»՝ տարաբնույթ որակումները («Անողնաշար», «կաղ ու թոփալ», «միոտանի», «հուսահատ» ու «բլեֆ» բյուջեն կհաստատվի»), «Առավոտին»՝ որ «ՀՅԴ-ն չի կարող «կողմ» քվեարկել բյուջեի նախագծին», մինչդեռ «ՀՀԿ-ն ու ՕԵԿ-ը կողմ կքվեարկեն»:
«Ժողովուրդը» «բավականին խոսուն» է որակել այն, որ «եվրոբոնդերից ստացված գումարներով» «Հայաստանն առաջին հերթին շտապում է մարել» Ռուսաստանի տրամադրած վարկը («Չորով ստանում են»): «Հրապարակը» անդրադարձել է Երևան-Էջմիածին ավտոճանապարհի լուսավորման հիմնախնդրին («Լուսավորությունը մեզնից, վճարը՝ կառավարությունից. առաջարկում է համայնքի ղեկավարը»):
Հայաստանին օժանդակելու ԱՄՆ միջազգային զարգացման գործակալության ռազմավարության և լրագրողների հետ ՄԶԳ հայաստանյան առաքելության տնօրեն Քարեն Հիլարդի հանդիպման մանրամասները ներկայացրել են «ՀՀ»-ն, «Ազգը» և «Ժամանակը»: «168 ժամը» նշել է, թե «Հազարամյակի մարտահրավերներ» կորպորացիայի խորհրդի կողմից ընտրված և աջակցություն ստացող երկրների շարքում Հայաստանը չի հիշատակվել: «Հայոց աշխարհը» հավելել է, որ «Հայաստանը արագացված քայլերով գնում է Մաքսային միություն»:
