չորեքշաբթի, 27 նոյեմբերի 2013
Ներսից ու դրսից
Իշխանությունը համեմատելով շենքի հետ, ՀՀ արդարադատության նախարարը «Հրապարակին» ասել է, որ երբ ինքը դրսից էր դիտում այդ շենքը, նաև քննադատում էր, իսկ երբ ներս մտավ, «շենքի մասին ավելին իմացավ», իրավիճակը բոլորովին այլ դարձավ: Նախարարը նաև անհրաժեշտություն է համարում «քաղաքական գործչի հումորի զգացում ունենալը»: Ինքն, օրինակ, հումորի զգացումը ժառանգել է պապից, շատ սուր է եղել նաև հոր հումորը, «ընդհուպ՝ ծակող»: Հարցազրույցը շարունակելի է:
«Առավոտը» («Գագիկ Բեգլարյանը մոտ կես ժամ սպասեց, բայց տաքսիստները չեկան») և «Ժամանակը» («Տաքսիստները հիասթափված են Գագիկ Բեգլարյանից») նկարագրել են տաքսու վարորդների խնդիրները լուծելու ողղությամբ տրանսպորտի և կապի նախարարի ձեռնարկած քայլերը:
«Ժողովուրդը» փոխանցում է աշխատանքի և սոցիալական հարցերի նախկին նախարարի խոսքը, ըստ որի կուտակային կենսաթոշակի համակարգի ներդրումը սկիզբ է առել դեռևս 2008-ին և իրենք (ՀՅԴ-ն) դեռ այն ժամանակ մատնանշել են ձեռնարկի թերությունները:
Տպագիր մամուլը սերտորեն առնչել է ՌԴ նախագահի առաջիկա այցը Հայաստան և ՀՀ վարչապետի երեկվա այցելությունը Գյումրի: Թեմայի վերաբերյալ տարբեր տեսակետներ են արտահայտել «Առավոտը», «ՀԺ»-ն, «Հրապարակը», «Ժամանակը» և «ՀԱ»-ն:
Վարչապետին ուղղված բաց նամակում Երևանում կատարվող ապօրինի շինարարության օրինակներից մեկն է ներկայացրել ՀԿԿ Եղեգնաձորի շրջկոմի առաջին քարտուղարը:
«Հրապարակն» անդրադարձել է երեկ հրապարակված ԱՎԾ «Հայաստանի սոցիալական պատկերը և աղքատությունը 2013» զեկույցին, ըստ որի «2012-ին արձանագրվել է աղքատության մակարդակի նվազում նախորդ տարվա համեմատ»: Թեման արծարծել են նաև «ՀԺ»-ն («2 միլիարդ դրամի խնդիր») և «Ազգը», որը նախ վկայակոչել է ԱՎԾ տեղեկույթը, որ «դեռևս աղքատ է 980 հազար մարդ», ապա հարցրել, թե «Իրենց աղքատ համարողներն ավելի քիչ են, քան իրական աղքատությո՞ւնն է»: «Ժողովուրդը» ներկայացրել է «Կանաչների միություն» ՀԿ նախագահ Հակոբ Սանասարյանի մտահոգությունը Սյունիքի տարածքում հանքերի շահագործման չափերի ու դրանց հետևանքների վերաբերյալ և եզրակացրել, թե «Սյունեցիները վտանգի առաջ են կանգնած»:
