Հայաստանի Հանրապետության Կառավարություն

Գործադրելով իր ապշեցուցիչ դիտողականությունը, «Հրապարակը» հանգել է այն համոզման, որ «սոցիալական ուղղվածության կասկածելի օրինագծերը» մեզանում տարօրինակ զուգադիպությամբ ընդունվում են ձմռանը։ Թերթն իբրև օրինակ նշում է «Կուտակային կենսաթոշակների մասին» օրենքը, որն ընդունվել է «2010թ. դեկտեմբերի 30-ին», երբ իշխանավորներն ունեին նոր տարին դիմավորելու բարձր տրամադրություն»։ Իսկ թե ինչ ընթացքում է սույն օրինագծի գործողության մեջ մտնելու հարցը, նկարագրում են «Ժողովուրդը» և «168 ժամը»։
Էկոնոմիկայի փոխնախարարը «Իրավունքի» ընթերցողին տեղեկացնում է՝ «մենք ուզում ենք ամենակարճ ժամանակում դառնալ Մաքսային միության անդամ»։ Եթե ընդլայնենք «Հրապարակի» հայտնաբերած «օրինաչափությունը», ապա կարող ենք վստահաբար ասել, որ Հայաստանը Մաքսային միությանը կանդամագրվի նույնպես ձմռանը։ «Ժամանակն» ափսոսում է, որ Ասոցացման համաձայնագրի ստորագրումը ձախողվել է, քանի որ «ասոցացման դեպքում 6,5 մլրդ դոլար կարող էինք ստանալ»։ Ավելի որոշակի է արտահայտվում Ժիրայր Լիպարիտյանը՝ «Մենք արդեն և՛ անկախությունը, և՛ Ղարաբաղը կորցնելու ճանապարհն ենք բռնել»։
«ՀԱ»-ն գրում է՝ «ի տարբերություն կառավարության, ԿԲ-ն այլևս չի հավատում, որ այս տարի Հայաստանում տնտեսական աճը կարող է անգամ 4 տոկոս լինել»։ «Ժամանակը» թանկացած ապրանքներից առանձնացնում է ձուն՝ «ձվի թանկացումը հասել է 33,5 տոկոսի»։ Այս թերթին հետաքրքրում է նաև Երևանի կենտրոնի կառուցապատումը, որի դրվագներից մեկի վերաբերյալ վերջերս որոշում էր կայացրել կառավարությունը։ Ըստ «Հրապարակի», գործադիրը մեղքի իր բաժինն ունի այն խնդրում, որ ձկնարդյունաբերության զարգացումը Արարատյան դաշտում բնապահպանական լուրջ խնդիրներ է առաջացրել։ «168 ժամը» վերհիշում է «Շանհայ էքսպո-2010»-ի ժամանակ կատարված իբր անարդյունավետ ծախսերը, «ՀԺ»-ն կանխատեսում է աղքատության ցուցանիշը, որը դեռևս չի հրապարակել վիճծառայությունը։
«Ժողովուրդը», «Առավոտը», «Ազգը» և «ՀԺ»-ն տարբեր տեսանկյուններից մեկնաբանում են ՍԴՀԿ 9-րդ համագումարի որոշումները։