շաբաթ, 16 նոյեմբերի 2013
Կենսաթոշակը և նրա խորհուրդը
ԱԺ արտահերթ նիստ հրավիրելու և մասնավորապես կենսաթոշակային համակարգի բարեփոխումների պարտադիր կուտակային բաղադրիչի կիրառումը հետաձգելու խորհրդարանական փոքրամասնության անհաջող փորձը մամուլը գնահատել է ոչ միանշանակ: «Հայոց աշխարհը» նախաձեռնությունը որակել է «տապալված» («Ինչու չկայացավ արտահերթ նիստը»), «ՀԺ»-ն՝ «որոշել պարզաբանել», թե «Ինչ փոխվեց մի գիշերվա մեջ», «ՀՀ»-ն՝ փոխանցել ՀՀԿ-ական խորհրդարանական Գալուստ Սահակյանի մեկնաբանությունը («Բովանդակային քննարկման ժամանակը չէ, իսկ ժամկետների հարցն այլ մեխանիզմով կարող է լուծվել»): Թեման արծարծել են նաև «Հրապարակը», «Առավոտը», «Ժամանակը», «Ժողովուրդը» և «168 ժամը»:
«ՀԺ»-ն խորհրդարանի մոտ տեղի ունեցած երեկվա բողոքի ակցիային անդրադարձը խորագրել է «STOP! կուտակային կենսաթոշակին», «168 ժամը» հարցրել՝ «Կքաղաքականանա՞ կենսաթոշակային համակարգի դեմ պայքարը», «Ազգը»՝ առաջարկել պարտադիր կուտակային համակարգում ընգրկվել «հրաժարվողների փոխարեն ընդգրկել նրանց, ովքեր ցանկանում են, բայց տարիքի չհամապատասխանելու պատճառով չեն կարող»:
«Գոլոս Արմենիին» փորձել է գնահատել գալիք տարվա գլխավոր ֆինանսական փաստաթուղթը («Բյուջե-2014. պլյուսներ ու մինուսներ»): «Հրապարակը» անդրադարձել է շինարարության ոլորտի հիմնախնդիրներին, «Ժամանակը» և «Հայոց աշխարհը»՝ «Հազարամյակի մարտահրավերներ» ծրագրին Հայաստանի վերամասնակցության հնարավորությանը:
ՏՄՊՊ հանձնաժողովի նախագահ Արտակ Շաբոյանի հետ զրույցը «168 ժամը» խորագրել է «Ի՞նչ կշահեր Հայաստանը մրցակցության ոլորտում, եթե գնար դեպի Եվրոպա», «ՀՀ»-ն նշել է, որ Հանձնաժողովը 14 ընկերությունների արգելել է չարտոնագրված համակարգչային ծրագրեր վաճառել և յուրաքանչյուրին տուգանել 15 մլն դրամի չափով, «Հայոց աշխարհը»՝ արձագանքել պետգնումների ոլորտում Հանձնաժողովի կողմից բացահայտված խախտումներին («Մրցույթներ՝ առանց մրցակցության»):
