Հայաստանի Հանրապետության Կառավարություն

«Հայոց աշխարհում» 2014թ. պետական բյուջեի նախագծի ԱԺ-ում քննարկման անդրադարձը խորագրված է «Նոր բյուջեի հիմնական առանձնահատկությունները»: Խորհրդարանի երեկվա աշխատանքը լուսաբանել են նաև «ՀՀ»-ն («Խնդիրները հնարավոր է լուծել՝ միայն դրանք վեր հանելու միջոցով», «Քննարկվում է «Պետբյուջե-2014»-ի օրինագիծը»), «Գոլոս Արմենիին» («Բյուջե-2014. սպասվում է լարված աշխատանք»), բազմաթիվ «նորություններ» են ներկայացրել «Ազգը», «168 ժամը», «Առավոտը», «ՀԺ»-ն, «Ժողովուրդը» և «Ժամանակը»:
«168 ժամը» փոխանցել է մանրամասներ ճանաչված ֆիզիկոս Արթուր Իշխանյանի երեկվա ասուլիսից՝ («Հայաստանում գիտության դոկտոր-պրոֆեսորները հավաքարարից, վարորդից, պահակից քիչ աշխատավարձ են ստանում»), «Հայոց աշխարհը»՝ մեկ այլ ասուլիսում պետական ծառայողների աշխատավարձի հաշվարկման միասնական համակարգի ներդրման անհրաժեշտության վերաբերյալ ԱԺ պատգամավոր Սուքիաս Ավետիսյանի մեկնաբանությունը («Նոր համակարգը կլուծի մի շարք խնդիրներ»), «Ժամանակը»՝ նաև հռետորական հարցեր ուղղել Աշխատանքի և սոցիալական հարցերի նախարար Արտեմ Ասատրյանին («Կարո՞ղ է հաջողություն ունենալ այն պետությունը, որն իր թոշակառուին արհամարհում է»)՝ «ձայնակցելով» «Հրապարակին» («Խաչիկյան 2-ի սպասելիքներ չունենաք»):
Անդրադառնալով կենսաթոշակային նոր համակարգի պարտադիր կուտակային բաղադրիչի նպատակահարմարության վերաբերյալ հնչող «ոչ միանշանակ կարծիքներին», «Հայոց աշխարհը» ճիշտ է համարել «Նոր համակարգի ներդրումը հետաձգել»: «168 ժամը» նախ «Հետաձգե՞լ, թե՞ ոչ»-ի առիթով հայտարարել է, թե «կենսաթոշակային կրքերը թեժանում են», և խորհրդարանում արտահերթ նիստ հրավիրելու «ստորագրություններն արդեն հավաքված են», ապա՝ ստանձնել պարզաբանելու «Ի՞նչ է «Կուտակային կենսաթոշակների մասին» ՀՀ օրենքը միջին խավի և ՀՀ տնտեսության զարգացման համար» բավական ընդգրկուն հարցը:
«Ազգը» անդրադարձել է էներգախնայողության նպատակով ձեռնարկվող գործընթացներին («Էներգախնայողության ծրագիրը կառավարությունում մոռացել են»):