Հայաստանի Հանրապետության Կառավարություն

Արծվիկ Մինասյանը «168 ժամին» բացատրում է, թե ՀՅԴ-ն ինչու չի կարող կառավարության հետ «այս պահին» կոալիցիա կազմել. քանի որ չի կարող կիսել այն պատասխանատվությունը, որ «իրենց վարած քաղաքականության արդյունքում կա»։ Այ, երբ «գործող իշխանությունը խելքի կգա, այդ ժամանակ կարելի կլինի քննարկել համատեղ աշխատանքը, արդարացված կլինի պորտֆել վերցնելը»։ Մինչ այդ ԱԺ-ի հանձնաժողովներում ավարտվել է 2014թ. բյուջեի նախագծի համատեղ քննարկումը. «Ծախսեր և եկամուտներ» («ՀՀ»), «ՀԴՄ-ները դարձել են քաղաքական գործիք» («Առավոտ»), «2014թ. սոցիալական հատված. տնտեսման ռեժիմը չեղյալ է հայտարարվում» («Գոլոս Արմենիի»), «Հարկային գերատեսչությունը խոստանում է «կրնկակոխ հետևել» խոշոր բիզնեսին» («Նովոյե վրեմյա»), «Հարցերը համառ են, պատասխանները՝ մշուշոտ» («ՀԱ»), «Ով է փչացրել շինարարության ոլորտի ցուցանիշները» («168 ժամ»), «Ազգային ժողովի թանկարժեք ծախսերը» («Ժամանակ»)։
Մամուլում քիչ չեն տարբեր ատյաններ հասցեագրված նամակները։ Իրենց ստացած էլիտար սերմացուն անորակ է եղել, պնդում են Վարդենիսի շրջանի մի խումբ հողագործներ («Ժողովուրդ»)։ Եղեգնաձորի բժշկական կենտրոնի մի խումբ աշխատակիցների՝ վարչապետին ուղղած և առողջապահության նախարարություն վերահասցեագրված նամակը ոչ մի կերպ «չի հայտնաբերվում» («ՀԺ»)։ ԱԺ պատգամավոր Մանվել Բադեյանին է դիմել «հրաշքով ողջ մնացած գործազուրկ, 18 հազար ստացող» Ազատը, ով շարունակում է քննադատել կառավարությանը։ Սույն նպաստը վերացնելու որոշումը սխալ է համարում «Գոլոս Արմենիին»՝ «Գոտին՝ աղետի և անգործության ֆոնի վրա»։
Հայաստան բջջային կապի չորրորդ օպերատորի մուտքը բնավ դուր չի եկել «Ժողովուրդին» և «Ժամանակին»։ «ՀԺ»-ն առաջարկում է հետաձգել կենսաթոշակային նոր համակարգի պարտադիր ներդրումը 2014-ից։
«Առավոտը» փոխանցել է գազի սակագնի վերաբերյալ ՀԱԿ պատգամավոր Արամ Մանուկյանի հարցին էներգետիկայի նախարարի պատասխանը, ըստ որի այն «սուբսիդավորելու է ռուսական կողմը»։ «Ժամանակը» «Ազատություն» ռադիոկայանի հետ զրույցում նախարարի մեկնաբանությունը, թե «Մաքսային միություն մտնելու որոշում Հայաստանը կայացրել է գազի գնի պատճառով», որակել է «սենսացիոն հայտարարություն» («30 տոկոսի տրագիկոմեդիան»)։ «Հայոց աշխարհի» «Շաբաթօրյա էներգամատակարարման կոլապսի արձագանքը» նշանառության տակ է առել Արմեն Մովսիսյանի տեսակետը՝ «արտառոց ոչինչ տեղի չի ունեցել», ինչին արձագանքել է նաև «Ժողովուրդը»՝ «Անարտառոց»։ Գազի և էլեկտրաէներգիայի թեման արծարծել են նաև «Հրապարակը» («Էներգետիկայի նախարարը մեկնել է Իրան») և «Իրավունքը», որը ի մասնավորի ներկայացրել է ՀԾԿ հանձնաժողովի նախագահ Ռոբերտ Նազարյանի վերաբերմունքը՝ «Ես շատ վատ եմ զգում, որ թե՛ գազը, թե՛ էլեկտրաէներգիան թանկացել են»։