Երեքշաբթի, 9 Մարտ 2010
Մասնագիտացված ձեռնարկությունը կզբաղվի ներմուծման և արտահանման խնդիրներով
Վարչապետ Տիգրան Սարգսյանն այսօր ընդունել է «Ֆերմերների ազգային միավորման» խորհրդի անդամներին։ Ողջունելով հյուրերին և ընդգծելով հանդիպման կարևորությունը` վարչապետը նշել է. «Այսօրվա մեր հանդիպումը նվիրված է գյուղատնտեսության ոլորտի և, մասնավորապես, անասնապահության խնդիրներին։ Տիկին Ծառուկյանի խնդրանքով մենք հավաքվել ենք, որպեսզի քննարկենք, թե ինչ պրոբլեմներ եք դուք տեսնում ոլորտում, որոնք են առաջնահերթ խնդիրները և պետության անելիքները, որպեսզի կարողանանք 2010 թ. անասնաբուծության ոլորտում ապահովել լուրջ առաջընթաց»։
ՖԱՄ խորհրդի անդամները շնորհակալություն են հայտնել Տիգրան Սարգսյանին կառավարության կողմից գյուղատնտեսության բնագավառի նկատմամբ ցուցաբերվող ուշադրության համար։
Հանդիպման ընթացքում ֆերմերները ներկայացրել են ոլորտի զարգացման վերաբերյալ իրենց մտահոգող մի շարք հարցեր, մասնավորապես թռչնաբուծության, կարտոֆիլագործության, պտղաբուծության, մեղվաբուծության և ոչխարաբուծության ոլորտներում առկա խնդիրների վերաբերյալ։ Հատկապես առաջնային են համարվել գյուղատնտեսական մթերքների արտահանման հնարավորությունների ընդլայնումը, օրենսդրական դաշտի կատարելագործումը և գյուղատնտեսության երկարաժամկետ զարգացման մոդելի մշակումը։
Վարչապետը համապատասխան հանձնարարականներ է տվել գյուղատնտեսության նախարարին հիմնախնդիրների լուծման ուղղությամբ։ Մասնավորապես, գյուղատնտեսության նախարարությանը հանձնարարվել է «Ֆերմերների ազգային միավորման» հետ ստեղծել մասնագիտացված ձեռնարկություն, որը կզբաղվի ներմուծման և արտահանման կարգավորմամբ։ Տիգրան Սարգսյանը կարևորել է համագործակցության արդյունավետ մոդելի զարգացումը և նշել, որ անձնական վերահսկողություն է իրականացնելու համատեղ ծրագրերի իրագործման նկատմամբ։
