շաբաթ, 27 փետրվարի 2010
Տիգրան Սարգսյանը մասնակցել է հոբելյանական միջոցառումներին
Հայաստանի Հանրապետության վարչապետ Տիգրան Սարգսյանն այսօր մասնակցել է հայկական շախմատի ականավոր դեմքերից մեկի` Հենրիկ Գասպարյանի ծննդյան հարյուրամյակին նվիրված հոբելյանական միջոցառումներին։
Կառավարության ղեկավարը ներկա է եղել Հենրիկ Կասպարյանի հուշաքարի բացման արարողությանը, այնուհետև հարգանքի տուրք է մատուցել Հենրիկ Գասպարյանի և աշխարհի շախմատի 9-րդ չեմպիոն Տիգրան Պետրոսյանի հիշատակին։
Հենրիկ Գասպարյանի ծննդյան հարյուրամյա հոբելյանին նվիրված հանդիսավոր միջոցառման ընթացքում, դիմելով ներկաներին, վարչապետը նշել է. «Այսօր մեր շախմատային հանրության համար մեծ և գեղեցիկ տոն է։ Մենք նշում ենք շախմատի ակնառու ու նշանավոր գործիչերից մեկի` Հենրիկ Գասպարյանի ծննդյան հարյուրամյակը։ Ցանկացած մարդ, ով մոտ է շախմատին, ծանոթ է նրա հարուստ ժառանգությանն ու ներդրմանը շախմատի զարգացման գործում` ոչ միայն Հայաստանում, այլև միջազգային ասպարեզում»։ Ըստ կառավարության ղեկավարի` Հենրիկ Գասպարյանի կազմած էտյուդները և դասագրքերը բազմաթիվ տաղանդաշատ շախմատիստների համար եղել են ուղենիշ։
Իր խոսքում գործադիրի ղեկավարը կարևորել է նաև շախմատի պրոպագանդան ու հայկական շախմատային դպրոցի հեղինակության շարունակական բարձրացումը։
Վարչապետը միջոցառման կազմակերպիչների ու պատվո հյուրերի հետ միասին մարել է Հենրիկ Գասպարյանի հարյուրամյակին նվիրված նամականիշերը։ Հանդիսության ավարտին Տիգրան Սարգսյանը մրցանակներ է հանձնել Հայաստանի շախմատային խնդիրների ու էտյուդների լուծման անդրանիկ առաջնության հաղթողներին։
