Հայաստանի Հանրապետության Կառավարություն

Այսօր ՀՀ վարչապետ Տիգրան Սարգսյանն ընդունել է Հայաստանում Միավորված ազգերի կազմակերպության մշտական համակարգող Կոնսուելո Վիդալին, ով ավարտում է Երևանում իր դիվանագիտական առաքելությունը։
Վարչապետը առանձնահատուկ ընդգծեց այն աշխատանքի կարևորությունը, որ տիկին Վիդալն իրականացրել է Հայաստանի Հանրապետությունում` առաքելության չորս տարիների ընթացքում, առանցքային համարելով ոչ միայն ՄԱԿ-ի բոլոր գործակալությունների իրականացրած աշխատանքներն, այլև կազմակերպության մշտական համակարգողի անձնական ներդրումը, որի համար կառավարության ղեկավարը հայտնեց իր երախտագիտությունը։
Ի պատասխան, տիկին Վիդալը հավաստիացրեց, որ նա հետայսու նույնպես կմնա Հայաստանի բարեկամը և համոզմունք հայտնեց, որ հաջորդ մշտական համակարգողը կշարունակի համագործակցության բարի ավանդույթները և Հայաստանի կառավարության ու ՄԱԿ-ի կապերը կբարձրացնի նոր մակարդակի։
Ամփոփելով հանդիպումը, վարչապետը կրկին շնորհակալություն հայտնեց կատարած աշխատանքի համար ու հաջողություններ մաղթեց տիկին Վիդալին Իրանի իսլամական հանրապետությունում իր առաքելությունն իրականացնելիս։