երեքշաբթի, 19 փետրվարի 2002
Այսօր ՀՀ վարչապետ Անդրանիկ Մարգարյանն ընդունեց Հայ Առաքելական եկեղեցու Ամերիկայի Արևելյան թեմի առաջնորդ, արքեպիսկոպոս Խաժակ Պարսամյանին և «Կոչ խղճին» միջազգային կրոնական հիմնադրամի նախագահ ռաբբի Արթուր Շնեերին: Ըստ ռաբբի Շնեերի, իրենց հիմնադրամի պատվիրակության այցը տարածաշրջան նպատակ ունի աջակցելու տարբեր կրոնների միջև երկխոսության հաստատմանը, կրոնի միջոցով ժողովուրդներին ոչ թե իրարից հեռացնելու, այլ մերձեցնելու նպատակ:
Վարչապետ Անդրանիկ Մարգարյանը, ողջունելով պատվիրակության այդօրինակ առաքելությունը, նշեց, որ Հայաստանի կառավարությունը պատրաստ է օժանդակելու ժողովուրդների միջև բարիդրացիությանը, փոխըմբռնմանն ու երկխոսությանն ուղղված ցանկացած քայլ: Ընդգծելով ղարաբաղյան հակամարտության ոչ կրոնական բնույթը, վարչապետը միաժամանակ հույս հայտնեց, որ նաև միջազգային հեղինակավոր կազմակերպությունների որոշակի օժանդակությամբ հնարավոր կլինի լուծել տարածաշրջանում կուտակված հիմնախնդիրները, նպաստել տարբեր կրոններ դավանող հարևան ժողովուրդների երկխոսությանն ու կայուն խաղաղության հաստատմանը: