հինգշաբթի, 17 մայիսի 2007
ՀՀ վարչապետ Սերժ Սարգսյանն այսօր ընդունել է ՀՀ-ում Ռումինիայի նորանշանակ արտակարգ և լիազոր դեսպան տիկին Քրինա Ռոդիքս Պրունարիուին:
Վարչապետը շնորհավորել է տիկին Պրունարիուին մեր երկրում իր դիվանագիտական առաքելությունն սկսելու կապակցությամբ և մաղթել հաջողություններ: Նշելով, որ հայ-ռումինական հարաբերությունները զարգանում են բարձր մակարդակով մշտական երկխոսության պայմաններում, զրուցակիցներն անդրադարձել են նաև երկու երկրների միջև առևտրատնետեսական հարաբերություններին: Նրանք արձանագրել են, որ ի տարբերություն քաղաքական երկխոսության մեջ նկատվող ակտիվացման միտումներին, տնտեսական համագործակցությունը և երկու երկրների միջև առկա ապրանքաշրջանառության ծավալները դեռևս բավարար չեն և չեն արտացոլում կողմերի իրական հնարավորությունները:
Հանդիպման ընթացքում Ռումինիայի դեսպանը, առիթից օգտվելով շնորհավորել է ՀՀ վարչապետին՝ Հայաստանում անցկացված խորհրդարանական ընտրությունների և այդ ընտրություններում Հանրապետական կուսակցության ունեցած հաջողության կապակցությամբ: Տիկին Քրինա Պրունարիուն Սերժ Սարգսյանին տեղեկացրել է իր երկրում այս օրերին տեղի ունեցող ներքաղաքական գործընթացների մասին, խոսելով նաև առաջիկա շաբաթ օրն անցկացվելիք հանրաքվեի մասին:
ՀՀ վարչապետը և Ռումինիայի դեսպանն ընդգծել են տարածաշրջանային համագործակցության և տարածաշրջանի ընդհանուր զարգացմանն ու կայունության ամրապնդմանն ուղղված Սևծովյան տարածաշրջանի բոլոր պետությունների մասնակցության կարևորությունը ևս, այդ համատեքստում անդրադառնալով նաև ԵՄ հովանու ներքո իրականացվող տնտեսական ծրագրերին Հայաստանի մասնակցությանը:
Հանդիպման ավարտին ՀՀ վարչապետ Սերժ Սարգսյանը ՀՀ կառավարության և իր անունից համագործակցության պատրաստակամություն է հայտնել Ռումինիայի նորանշանակ դեսպանին:
