Հայաստանի Հանրապետության Կառավարություն

Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր -Սիմոնյանը:

Հանձնաժողովը քննարկել է 6 բարեգործական ծրագիր: Մասնավորապես, քննարկվել և հաստատվել են՝ «Բժիշկներ առանց սահմանների» Ֆրանսիական միության հայաստանյան մասնաճյուղի կողմից իրականացվող «Տուբերկուլյոզի դեղորայքակայուն ձևերի բացահայտում, ախտորոշում և բուժում» ծրագիրը, որի նպատակն է Երևանի և Աբովյանի հակատուբերկուլյոզային դիսպանսերները, Երևանի Շենգավիթ համայնքի թիվ 18 և Մալաթիա-Սեբաստիա համայնքի թիվ 19 պոլիկլինիկաներն ապահովել դեղորայքակայուն տուբերկուլյոզի (ԴԿ) համապատասխան անվճար բուժմամբ և վերահսկողությամբ: Գեղարքունիքի մարզում ակնաբուժական ծառայությունների հզորացման ծրագիրը, որի նպատակն է Սևան քաղաքում ստեղծել «Շրջանային ակնաբուժության կենտրոն» հիմնադրամ և հզորացնել Գեղարքունիքի մարզի ներկա ակնաբուժական ծառայությունները, կիրականացվի Հայաստանի Ամերիկյան համալսարանի հիմնադրամի կողմից: «Հայաստան» համահայկական հիմնադրամը կիրականացնի ԼՂՀ Մարտակերտի շրջանի Դրմբոն գյուղի միջնակարգ դպրոցի կահույքի պատրաստման և Մաղավուզ գյուղի ջրամատակարարման ներքին ցանցի վերականգման նախագծային աշխատանքների ծրագրերը: ՄԱԿ-ի փախստականների հարցերով գերագույն հանձնակատարի Հայաստանյան գրասենյակի ֆինանսավորմամբ «Օթևան» երիտասարդ մարդկանց քրիստոնեական ընկերակցություն» հասարակական կազմակերպության կողմից Շիրակի մարզում շինարարական ծրագրի իրականացման արդյունքում Գյումրի քաղաքի «Մուշ-2» թաղամասի թիվ 2-3 հասցեներում գտնվող շենքի վերակառուցումից հետո 24 բնակարանով բնակելի շենքը կտրամադրվի Հայաստանում ապաստան գտած փախստական ընտանիքներին:

Նիստում քննարկվել և հաստատվել են նաև տարբեր կազմակերպությունների հասցեներով ուղարկված բեռների ներմուծման ծրագրեր, այդ թվում՝ Հայկական բարեգործական ընդհանուր միության կողմից Հայաստանի ամերիկյան համալսարանի, Գիտության և առաջատար տեխնոլոգիաների ազգային հիմնադրամի, «Հայաստանի ֆուտբոլի ֆեդերացիա» իրավաբանական անձանց միության և առողջապահության նախարարության «Մարդասիրական օգնության հանրապետական կենտրոն» ՊՈԱԿ-ի հասցեներով ուղարկված և անհատույց տրամադրման համար ստացված բեռների բաշխման մասին որոշումները։