Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

Բաժանորդագրություն










Պաշտոնական էլ. փոստ

(միայն www.e-citizen.am համակարգով ծանուցումների համար)
Հետադարձ կապ պատասխանատուների հետ
iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Էլ. կառավարում

Տառատեսակներ

«Հայաստանի Հանրապետության պետական պաշտոնական փաստաթղթաշրջանառությունում պարտադիր կիրառման հայկական համակարգչային տառատեսակները հաստատելու մասին» Հայաստանի Հանրապետության Կառավարության որոշմամբ հաստատված «Գրապալատ» և «Մարիամ» համակարգչային տառատեսակները:

Հարցազրույցներ, ճեպազրույցներ

Երկուշաբթի, 5 Դեկտեմբեր 2016

Վարչապետ Կարեն Կարապետյանը պատասխանել է ԶԼՄ-ների ներկայացուցիչների մի շարք հարցերի

ՀՀ վարչապետ Կարեն Կարապետյան - Բարև ձեզ, հարգելի գործընկերներ: Շատ շնորհակալ եմ, որ հրավերն ընդունել եք, ուրախ եմ ձեզ տեսնելու և հուսով եմ, որ ձեր տրամադրությունը լավ է: Այսօր մտադրված ենք հանգիստ խոսել և ես կաշխատեմ պատասխանել այն բոլոր հարցերին, որոնք ձեզ հուզում են:
«Արմենպրես» լ/գ, Արամ Անանյան – Շնորհակալություն հնարավորության համար, պարոն վարչապետ: Առաջին հարցը վերաբերում է կառավարության ծրագրին և ավելի կոնկրետացնելով, Դուք բեկումնային զարգացման մասին խոսեցիք և ո՞ր գերատեսչություններից եք առաջնահերթ ակնկալում այդ բեկումը: Իհարկե, կարծում եմ՝ ակնկալում եք բոլորից, բայց որո՞նք պիտի լինեն այդ լոկոմոտիվը: Շնորհակալություն:
ՀՀ վարչապետ Կարեն Կարապետյան - Շատ լավ: Կառավարության ծրագրի մասին մենք ասել ենք հետևյալը. երկու փուլից է բաղկացած լինելու, առաջին փուլը պրակտիկորեն ներկայացրել ենք կառավարության ծրագրով, որը ներկայացրել ենք Ազգային ժողով: Երկրորդ փուլը երկարաժամկետ ծրագիր է, թե ինչպես ենք մենք պատկերացնում՝ դեպի ուր պետք է գնա մեր երկիրը: Հայտարարել ենք, որ ստեղծելու ենք Ստրատեգիական նախաձեռնությունների կենտրոն, որը վերջնական փուլում է, որ լինելու է մասնավոր-պետություն համագործակցության շրջանակում, որ մաքսիմալ ընդգրկելու ենք մեր հայրենակիցներին՝ սփյուռքում հայտնի, որոշակի կենսագրություն ունեցող, որոշակի պոտենցիալ ունեցող, որպեսզի ներգրավվեն, և կարծում եմ, որ շատ հետաքրքիր հարթակ ենք ստեղծելու, որտեղ բաց և պրոֆեսիոնալ մակարդակով քննարկելու ենք, թե ուր ենք գնալու: Ինչ վերաբերում է այն ոլորտներին, որոնք կարող են որոշակի դրայվերի ֆունկցիա իրենց վրա վերցնել, առաջինը IT-ն ու Hightech-ն են: Կարծում եմ, որ գյուղատնտեսության մեջ մենք բավական անելիքներ ունենք և հիմնականում այնտեղ փորձելու ենք մաքսիմալ հաշվի առնել այն երկրների փորձը, որոնք, էսպես ձևակերպեմ, խելոք գյուղատնտեսություն են վարում: Հետաքրքիր ոլորտ է, իհարկե, մեր հանքային ոլորտը, էներգետիկան, տուրիզմը, ոսկերչությունը և դրա նման ուղղությունները: Բայց դա չի նշանակում, որ մենք այլ ուղղություններով՝ փոքր ու միջին բիզնես, ինչ-որ նորարարական տեխնոլոգիաներ, դրանցով չենք զբաղվելու:
«Aravot.am», Աննա Իսրայելյան – Առանց որևէ ագրեսիվության, բայց, կարծում եմ՝ պատրաստ եք քննադատական հարցեր լսելու: Բարեգործական ընդհանուր միությունում Ձեր դիտարկումն այն կապակցությամբ, թե ինչու եք նշանակում այն մարդկանց, ովքեր գոնե նախկինում ղեկավարել են կամ հիմա էլ ունեն բիզնես շահագրգռվածություն որոշակի ոլորտներում, Դուք պատասխանեցիք, թե չեք ուզում որ նշանակվեն մարդիկ, որոնք աչքերն աջ ձախ կնետեն: Հիմա ժողովրդական լեզվով ասած, Դուք ասացիք, ես նույն ձևով շարունակեմ, ժողովրդական լեզվով՝ աչքը կշտանալու հատկություն ունի՞, պարոն Կարապետյան, և քանի կադրային քաղաքականության մասին է խոսքը, տեսեք, բավական քննադատությունների տեղիք տվեց այն, որ կառավարությունը բավական շատ համալրվեց մարդկանցով, ովքեր Ձեզ ուղեկցում էին Ձեր նախորդ աշխատանքում՝ տեղիք տալով բազմաթիվ հումորների, թե կառավարությունը գազաֆիկացվեց, գազ տվեց և այլն:
ՀՀ վարչապետ Կարեն Կարապետյան – Օրինակ, Ձեր աչքը կշտանալու հատկություն ունի՞: Ես այդ կարծիքին չեմ. աչքը կշտանալու կամ չգիտեմ կուշտ հոգեբանություն ունենալու հատկությունը փողի քանակից և դրամապանակի հաստությունից չէ: Ես գիտեմ բազմաթիվ մարդկանց, ովքեր այդ առումով, եթե կուշտ բառը հնարավոր է օգտագործել, կուշտ են: Սա առաջին: Երկրորդը, թիմն ընտրելուց ընտրել եմ այն մարդկանց, ովքեր բարոյական կերպարը և նաև պաշտոնը, համոզված եմ, որ չեն օգտագործի անձնական հարստացման և բիզնեսի լոբբինգ անելուն: Եթե այդպես չլինի, ապա ես առաջինը հենց կնախատեմ և դրա դեմը կառնեմ: Երրորդը, իրականում մենք ռեֆորմ անելու ժամանակ խնդիր ենք ունենալու՝ ոնց ենք պետական համակարգի վարձավճարները փոխելու, որպեսզի կարողանանք մոտիվացնենք, լավ մասնագետների ներգրավենք, որպեսզի իրենց համար հետաքրքիր լինի թե´ պրոֆեսիոնալ աճի առումով, թե´ կենցաղային, ընտանեկան և այլ խնդիրներ լուծելու առումով, որովհետև այսօր լավագույն տեղը չէ դա: Չորրորդը, թիմ ընտրելուց, իհարկե, ես ընտրում եմ այն մարդկանց, ովքեր իմ հետ ճանապարհ են անցել, և իրականում գազաֆիկացիայի մասին որ խոսում են, որ վերցնեք, այդ քանակը վերջավոր է, շատ չէ, բայց ո՞նց եք դուք պատկերացնեմ՝ ես իմ թիմն ընտրեմ: Թիմ ընտրելու ժամանակ, գործընկերներ ընտրելու ժամանակ ես բազմաթիվ պրոբլեմներ եմ ունեցել: Կան մարդիկ, որ ես որոշակի ավանսով եմ նշանակել, որովհետև այդ պահին ավելի լավ թեկնածու չեմ ունեցել: Եվ, ցավոք, մենք պետք է ֆիքսենք, որ մեր կադրերի պահեստային հարթակն այնքան էլ մեծ չէ: Եթե դուք ունեք լավ կադրեր, որոնց ձեր առջև տեսնում եք, որոնք կարող են որոշակի ոլորտներ կառավարել, ես միայն շնորհակալ կլինեմ, եթե ինձ խորհուրդ տաք, և մենք հետագայում ունենանք այդ տվյալների բազան, որովհետև ինձ թվում է՝ այդ պրոցեսն անընդհատ է, ռեգուլյար առաջանալու են տեղեր, որտեղ մենք նոր կադրի կարիք ենք ունենալու, սիրով կքննարկեմ այն:
«Արմենիա» հ/ը, Արտակ Ալեքսանյան - Պարոն վարչապետ, ասացեք խնդրեմ, Դուք ավարտե՞լ եք պրոբլեմների ինվենտարիզացիան, այսինքն, թե ինչպիսի տնտեսություն եք ժառանգել, ինչպիսին է պատկերը, որպեսզի անցնեք դրանց լուծմանը: Դա առաջին հարցը և երկրորդ հարցը՝ հասկանալի է, որ ամենակարևորը 2017-ի համար նաև օտարերկրյա ներդրումներն են: Ձեր թիմն ունի՞ հաշվարկ՝ քանի միլիոն դոլարի օտարերկրյա ուղիղ ներդրումներ կլինեն, և որքա՞ն աշխատատեղ կբացվի, որովհետև այլ բան է, երբ վարչարարությունն են ուժեղացնում, երբ կառավարումը դարձնում են արդյունավետ, այլ բան է, երբ արդեն տնտեսական հստակ թվեր կան: Շնորհակալ եմ:
ՀՀ վարչապետ Կարեն Կարապետյան – Շնորհակալություն: Մեկը մյուսի հետ իրականում փոխկապակցված են: Գույքագրում արել ենք ամբո՞ղջը, թե՝ ոչ, դեռ ամբողջը չենք գույքագրել, յուրաքանչյուր օր մի նոր բան ենք պարզում, բայց այսպես մակրո առումով քիչ թե շատ պատկերացնում ենք: Մակրո առումով՝ քիչ թե շատ ուղղությունները ոնց ենք գնալու, որ ուղղություններով, որ ոլորտներով՝ պատկերացնում ենք, տեղ կա՝ ավելի խորը, տեղ կա՝ ոչ: Հաշվարկ, թե 2017 թվականին ինչքան կլինեն ներդրումները, և ինչքան աշխատատեղ կունենանք՝ հստակ չունենք, բայց մենք պատկերացնում ենք՝ եթե մեզ հնարավորություն տրվի երկարատև աշխատելու, ապա մոտավորապես ինչքա՞ն ներդրումներ են տարեկան պետք, որպեսզի մենք ՀՆԱ-ն երկու անգամ աճ տանք N տարվա ընթացքում կամ ՀՆԱ-ն երեք անգամ աճ տանք և այսպես ասած այն նպատակներին, ինչին մենք պետք է ձգտենք, ձևակերպել ենք: Ես բազմիցս ասել եմ, այսօր էլ եմ ցանկանում ասել, այս նախընտրական փուլը ռեալ շատ է խանգարում տնտեսության ակտիվացմանը, որովհետև բազմաթիվ մարդիկ, պրակտիկորեն կամայական մարդ, նույնիսկ տան գույքն առնելուց, չգիտես ինչու, հետաձգում է ապրիլի 2-ից հետո առնելը, բիզնեսմենները նույն կերպ: Կառավարման էֆեկտիվությունը, վարչարարությունը, ինչպես Դուք ասացիք, շատ խիստ փոխկապակցված է այդ երկրորդ հարցի հետ, եթե մենք ռեալ կարողանանք արդար միջավայր ստեղծել, և բիզնեսմենը հասկանա, որ ինքն իր համար անսպասելի զարգացումներ չի ունենա, խոչընդոտներ չի ունենա, գումար դնելու իր համարձակությունը բավական աշխուժանում է, և դա շատ հետաքրքիր հետադարձ կապով գործընթաց է, որը ռեգուլյար ստուգվում է: Հիմա էլ մեզ ստուգում են, սահմանն անցնելուց ինչ որ ապրանք, որը նախկինում, ասում են, խոչընդոտներ կար, ստուգում են՝ կանցնի, թե չի անցնի: Այս գործընթացը, ինչքան շուտ մեկս մյուսին այդ ազդակները տանք և գործարար մարդը, ներդրողը, բիզնեսմենը ոգևորվի կամ որոշում կայացնի, որ ներդնի, դրանից շատ խիստ կախված է: Երբ բնականոն ռեժիմի ընկնենք, ռիսկային որոշակի կետեր չլինեն, ապրիլից հետո կանխատեսելը, հաշվարկներ անելը շատ ավելի հեշտ գործընթաց կլինի, քան այսօր, բայց կարծում եմ, որ մենք վերջ առաջ նման թվեր, մեր կանխատեսումները հայտարարելու ենք:
«Արմենիա» հ/ը, Արտակ Ալեքսանյան - Ամենահամեստ հաշվարկներով, նվազագույնը, չգիտեմ՝ 200 աշխատատեղ և 3 միլիոն, չունե՞ք որևէ թիվ:
ՀՀ վարչապետ Կարեն Կարապետյան- 200 աշխատատեղ և 3 միլիոն առնվազն Ձեզ խոստանում եմ, եթե այդ թիվը բավարարում է (ծիծաղում է): Կլինի ավելին:
«Արմինֆո» լ/գ, Էմանուել Մկրտչյան - Հարցս Հարկային օրենսգրքի մասին է: Դա այն մեծ փաստաթուղթն էր, որ պետք է սկսեր ինչ որ բան փոխել, արմատական փոխել Հայաստանում և դաշտը լավացնել և ավելացնել հարկային բազան:
ՀՀ վարչապետ Կարեն Կարապետյան - Հարկային օրենսգրքի վերաբերյալ և Դուք ճիշտ եք ասում, երկար աշխատել ենք այդ օրենսգրքի վրա, կառավարություններկար աշխատել է, և մենք ունեինք պարտավորություն որոշակի ժամկետում ընդունել: Ինչ վերաբերում է մեր վերաբերմունքին, մասամբ Դուք ճիշտ ձևակերպեցիք, մասամբ՝ ոչ այնքան: Կասեմ հետևյալը. Հարկային օրենսգիրքն իր էությամբ վատ փաստաթուղթ չէ, նույնիսկ իրավունք ունի և գործում է: Այնտեղ դժգոհություն էր առաջացել այն բիզնեսի ներկայացուցիչներից, այն պոտենցիալ հարկատուներից, որոնց վրա հարկն ավելացել էր, և որոնք աշխատում էին սպիտակ դաշտում: Իրենց առարկությունը ձևակերպվում է հետևյալ կերպ. դուք ձեր հարկային մուտքերը միայն ավելացնում եք մեր հաշվին, քանի որ մենք աշխատում ենք սպիտակ դաշտում և ձեր քայլերը չեք ձեռնարկում, որպեսզի ստվերը բերեք, և մենք մեղավո՞ր ենք կամ մենք ե՞նք միակ թիրախը: Այդ առումով, իրենց դժգոհությունն իրավունք ունի լինելու: Հետագայում մենք Հարկային օրենսգրքին և հարկային ռեֆորմին անդրադառնալո՞ւ ենք՝ այո: Ստրատեգիական մեր նախաձեռնությունների կենտրոնում մենք նախատեսել ենք բարեփոխումների առաջին 5-6 ուղղությունը, որոնց թվում է նաև հարկային ռեֆորմը:
«Blognews.am», Կոնստանտին Տեր-Նակալյան - Պարոն վարչապետ, ինձ համար մեր արտաքին տնտեսական կապերից ամենաառեղծվածային հարցերից մեկը մեր գազի գնի գնագոյացումն է: Ինձ միշտ հետաքրքրել է՝ ո՞նց է ստացվում, որ Տյումենից գազը գալիս է հասնում Հայաստանի սահման մոտավորապես նույն գնով, ինչ այդ 40 կիլոմետրը մինչև գալիս է Երևան: Այս առումով, հաճախ են հնչում մեկնաբանություններ ոչ միայն իմ կողմից, այլև համացանցում առավել հաճախ հնչող մեկնաբանություններից մեկն այն է, որ «Գազպրոմ»-ն ինքն իրեն գազն էժանացնում է, բայց մեզ վրա դա չի անդրադառնում: Կարելի՞ է արդյոք ակնկալել, որ գազի էական էժանացում կլինի, որովհետև անգամ ԵԱՏՄ մտնելուց հետո մեզ մոտ սպառողին գազը հասնում է ավելի թանկ, քան ոչ ԵԱՏՄ անդամ հանդիսացող շատ երկրներում: Շնորհակալություն:
ՀՀ վարչապետ Կարեն Կարապետյան - Օրինակ, ո՞ր:
«Blognews.am», Կոնստանտին Տեր-Նակալյան - Համաձայն Սոլովյովի երեկվա իր հաղորդման հայտարարության՝ օրինակ, Լեհաստանում:
ՀՀ վարչապետ Կարեն Կարապետյան - Վստահ չեմ: Սոլովյովն իմ շատ լավ ընկերն է և բարեկամը, բայց վստահ չեմ, որ ինքը գազի գների մեջ նույնչափ կոմպետենտ է, ինչ որ…: Տեսեք, ոնց է: Գինը Հայաստանի սպառողների համար որոշվում է շատ պարզ մեխանիզմով: Մեխանիզմը հետևյալն է. գազի գին սահմանին, հաստատուն ծախսեր ամբողջ համակարգով մեկ՝ բաժանած գազի այն քանակ, որը վաճառվում է: Դրանով որոշվում է միջին մարժան և համապատասխան շահութաբերություն է տրվում: Հանրային կարգավորող հանձնաժողովը հաստատուն ծախսերը ռեգուլյար վերստուգում է և կարծում եմ, որ դուք համոզված եք, որ իշխանությունը որևիցե ռեզոն չունի բարձրացնելու այդ սակագինը, որովհետև մեր քաղաքացիները, մեր բիզնեսը, մեր սպառողները բավական գրգռված են դրան վերաբերվում: Երբ մենք վաճառում ենք 2 միլիարդ, երբ համակարգը թույլ է տալիս վաճառելու 8 միլիարդ, մի միավոր գազի վրայի մարժան ընկնում է բավական բարձր: Հարց՝ ինչո՞ւ է մեր երկրում մարժան այսքան, Ուկրաինայում, Բելառուսում, Վրաստանում՝ ոչ այսքան: Գազի գնի վրա ազդում են մի քանի գործոններ, բացի այդ մատակարարից՝ սեփական գազ ունի-չունի, տրանզիտային հնարավորություն ունի-չունի: Այդ իսկ առումով, բոլոր այն երկրները, որոնց հետ համեմատվել են Հայաստանի գազի գները և մարժաները, տարբերվում են Հայաստանից: Մենք միակն ենք, որ սեփական գազ չունենք և տրանզիտի գործոն չունենք, որովհետև երկրներ կան, որոնք որոշակի զանգվածին տալիս են գազի մատակարարման գնից էժան: Այսինքն, որ ինքը 200 դոլարով գազի գին է առնում, ներքին գինը 140 է: Դա չի նշանակում չէ՞, որ ինքը մինուս 60 դոլար է, որովհետև ինքն ունի սեփական գազ և տրանզիտից, օրինակ՝ Բելառուսը, ֆանտաստիկ թիվ է առնում, Ուկրաինան ֆանտաստիկ թիվ է առնում տրանզիտից, Վրաստանը և´ սեփական գազ ունի ոչ մեծ քանակի և´ ունի բազմաթիվ տրանզիտներ՝ ռուսական տրանզիտը դեպի մեզ, ադրբեջանական տրանզիտը դեպի Թուրքիա: Շատ պարզ հաշվարկելի բան է: Սա է բացատրությունը:
«Blognews.am», Կոնստանտին Տեր-Նակալյան - Չի՞ էժանանալու:
ՀՀ վարչապետ Կարեն Կարապետյան- Հունվարի 1-ից չեժանացա՞վ: Մենք սենսացիա ենք ակնկալում մի բանի վրա, որ այնքան բնականոն է: 150 դոլար սահմանի վրա գազի գին. Իրանի դեպքերը շատ են բերում, թե ինչո՞ւ Իրանից չեք վերցնում: Իրանի գազի գինը եթե մենք դոլարով գնենք, ավելի թանկ է, քան 150 դոլարը:
«Հայկական Ժամանակ», Հայկ Գևորգյան- Պարոն վարչապետ, հավատո՞ւմ եք արդյոք դուք Ազգային վիճակագրական ծառայության տված տվյալներին, մասնավորապես, եթե հավատում եք, ապա խնդրում եմ բացատրեք՝ ի՞նչ եղավ մեր գյուղատնտեսության հետ հոկտեմբերին, որ 30 տոկոսով անկում ապրեց, 20 տոկոսով շինարարությունն անկում ապրեց և այլն, և այլն: Երկրորդը, հավատո՞ւմ եք, որ մեր ծառայությունների ոլորտում 16 տոկոս թռիչքային աճ է եղել, ի՞նչքանով է դա պայմանավորված, օրինակ կազինոներով:
ՀՀ վարչապետ Կարեն Կարապետյան- Վիճակագրական մեր տվյալներին, ընդ որում ոչ միայն ես, նաև վիճակագրական ծառայության նախագահն ունենք որոշակի, ինչպես ձևակերպեմ, մտավախություններ, որովհետև գյուղատնտեսության ոլորտում վիճակագրական տվյալների հավաքագրումը կազմակերպվում է համայնքապետերի, մարզպետների միջոցով, որտեղ սուբյեկտիվ գործոնի ազդեցությունը բավականին մեծ է: Գյուղատնտեսության անկումը, կարծում եմ, բացատրվում է և օբյեկտիվ պատճառներով, և գուցե վիճակագրական տվյալների ավելի սուր, օբյեկտիվ վերահսկողությունով: Սերվիսն ի՞նչի է աճել՝ չեմ կարող բացատրել, բայց սերվիսի ոլորտի մեջ, կարծում եմ, հավատալու հավանականությունն ավելի բարձր է, որովհետև դա հաշվարկելի է, հիմնականում հետադարձ կապը և ստուգիչ, այսպես ասեմ, ռեպերները բավականին շատ են:
«Hayeli.am», Անժելա Թովմասյան- Ինձ հետաքրքիր է, ԽՍՀՄ-ի նկատմամբ կարոտախտ կա՞ Ձեր մեջ, թե ոչ, որովհետև երբ ասվեց 7000 մարդ մեկ օրվա մեջ անդամագրվեցին, մենք բոլորս գնացինք մեր պատանեկություն, ոմանք էլ երիտասարդություն և կուզենայի կրկնել գործընկերոջս հարցը, այնուամենայնիվ, 2018 թվականին ո՞րտեղ եք տեսնում Ձեզ:
ՀՀ վարչապետ Կարեն Կարապետյան- ԽՍՀՄ-ի նկատմամբ շատ անտարբեր եմ և հանգիստ: 7000 մարդն ընդունվել է՝ ստիպողակա՞ն է, թե չէ. Դուք այնքան հնարավորություն ունեք դա ստուգելու: Համենայն դեպս, իմ կողմից որևէ պարտադրանք չի եղել: Ես չեմ բացառում, որ տեղերում որոշակի մարդիկ կարող են գերլծված լինել այդ աշխատանքի մեջ, բայց չգիտեմ ինչի, որ ասեք հիմնավորի, գուցե չեմ հիմնավորի, եթե նույնիսկ մարդիկ կան, որոնք ստիպված են ընդունվել, իրենք կրիտիկական զանգված չունեն: Այդ թվում իմ թիմակիցներից մարդիկ են ընդունվել կուսակցություն, որոնք երբևէ չեն մտածել ապրել կուսակցական կյանքով: Ինչո՞ւ, որովհետև այսօրվա իրողությունը, այսօրվա այն մարտահրավերը և բեռը, որ մեր վրա դրված է, պահանջում է ունենալ քաղաքական հենարան: Քաղաքական հենարանի մեջ մեր գործընկերները ցանկացել են մասնակցել իրենց՝ կուսակցություն ներգրավվելով: Երրորդ հարցը՝ ո՞րտեղ եմ տեսնում 2018 թվականին, ինձ թվում է մաքսիմալ պատասխանել եմ: Եթե մեր կառավարությունը, մեր թիմն էֆեկտիվ աշխատի և եթե պահանջված լինի, վարչապետ եմ տեսնում:
«Հ1» հ/ը, Հարություն Հարությունյան- Պարոն վարչապետ, տարիներ շարունակ մեզ թվեր են հրամցրել Ձեր նախորդները և իրենց աշխատանքն էլ պակաս էֆեկտիվ չի եղել ըստ իրենց գնահատման: Հիմա վերադառնալով Ձեր ասած էֆեկտիվությանը, ի՞նչպես հասկանալ, ի՞նչպես եք Դուք որոշելու էֆեկտիվության չափը՝ թվերով, հանրապետականով, միջին խավով, գործարարներով, ո՞ւմ միջոցով: Այսինքն, ի՞նչի վրա եք հիմնվելու, էլի թվե՞ր եք հրապարակելու, որովհետև որպես կանոն թվերը բարձր հրապարակվում են, բայց հասարակության ավելի վատ ապրուստին զուգահեռ:
ՀՀ վարչապետ Կարեն Կարապետյան- Ինձ թվում է, երևի ակնկալվում է, թե ինչ պատասխան պետք է տամ: Ամենամեծ էֆեկտիվությունը և ցուցանիշը Հայաստանի Հանրապետության քաղաքացու, գյուղացու, բանվորի, ուսուցչի, զինվորի, սպայի կյանքի, ապրելակերպի, որակի մակարդակի բարձրացումն է: Բայց դրան զուգահեռ մենք թվեր տալո՞ւ ենք, թե՝ չէ. իհարկե, թվեր տալու ենք: Սա է, վերջնական ցուցանիշը նա է, երբ Հայաստանի Հանրապետության քաղաքացին, անկախ նրանից՝ իր սոցիալական ստատուսից, իր կարգավիճակից իր վրա զգում է, որ կյանքը լավանում է:
«Հ1» հ/ը, Հարություն Հարությունյան –
Այսինքն աղքատությա՞ն շեմին հասած քաղաքացիները:
ՀՀ վարչապետ Կարեն Կարապետյան- Առաջին հերթին մենք պետք է նայենք, իհարկե, ամենախոցելի զանգվածը, որովհետև ամենախոցելի զանգվածի ապրուստի լավ լինելը բառացիորեն բոլոր շերտերի վրա դրական է ազդում: Իհարկե, առաջին հերթին իրենց:
«Ժողովուրդ» օրաթերթ, Թագուհի Թովմասյան – Պարոն վարչապետ, երբ Դուք անդամագրվեցիք Հանրապետական կուսակցությանը՝ դիմումի մեջ այսպիսի ձևակերպում կար, որ ես ամբողջությամբ համաձայն եմ Հանրապետական կուսակցության վարած քաղաքականության հետ: Այսինքն, արդյոք սա ենթադրում է, որ Դուք նաև Ձեր նախորդների վարած քաղաքականությունն եք ընդունում:
ՀՀ վարչապետ Կարեն Կարապետյան- Բա ասում եք ագրեսիվ չենք տրամադրված այսօր (ծիծաղում է): Ճիշտն ասած կա դիմումի ձև, ես չեմ այդ ձևը դրել. ինչի հետ համաձայն եմ՝ 7 կետով հայտարարել եմ: Ինձ թվում է, եթե սխալվում եմ, պատրաստ եմ հիմա այդ բաց թողած մասը լրացնել. Հանրապետականում լինելը երաշխավորո՞ւմ է, որ եթե դու վաղը մյուս օրը ճիշտ չես պահում քաղաքացիական կյանքում մեր օրենսդրության հետ և այլն՝ իհարկե, չի երաշխավորում: Դա ի՞նչ կապ ունի: Հիմա ինքը նախկինում հանրապետական է եղել, հիմա է հանրապետական, թե չէ. դրվելու են խաղի կանոններ, ըստ որոնց՝ մենք պետք է աշխատենք, ապրենք: Այդ խաղի կանոնները խախտողները պետք է համապատասխան վերաբերմունք ունենան, անկախ նրանից, թե իրենք ինչ քաղաքացիական պատկանելություն ունեն:
«Ժողովուրդ» օրաթերթ, Թագուհի Թովմասյան - Ես ուզում եմ իմանալ՝ Հայաստանի արտաքին իմիջի համար արդյոք կառավարությունում ինչ որ քայլեր մշակվել են, մասնավորապես, եվրաասոցացումից մեր կտրուկ անցումը ԵԱՏՄ՝ արտաքին աշխարհում մի տեսակ այդ երևույթն անհասկանալի ըմբռնում ունեցավ և կարծում եմ, որ դա կտրուկ ազդեցություն ունեցավ նաև ներդրումների վրա: Այս մասով ինչ որ քայլեր մշակվո՞ւմ են: Շնորհակալ եմ:
ՀՀ վարչապետ Կարեն Կարապետյան- Ինչ վերաբերում է մեր արտաքին իմիջին՝ արտաքին իմիջը գիտեք ի՞նչ է, դա այնպես չէ, որ գնաս վարսավիրանոց, սանրվես, հագնվես և իմիջդ փոխվում է: Իմիջը ձևավորվում է ռեգուլյար քո աշխատանքով: Ինչ վերաբերում է Եվրամիությանը և ԵԱՏՄ-ին, ես պատասխանել եմ, այս պահին ասեմ հետևյալը. համարում եմ ԵԱՏՄ մտնելը տրամաբանական քայլ, որովհետև մեր տնտեսության պոտենցիալն ամենաշատը հավանականություն ունի, հնարավորություն ունի իր տեղը գտնել այդ շուկայում: Ցավոք, մենք շատ ապրանք, արտադրանք, ծառայություններ չունենք, որոնք Եվրոպայում մրցունակ են, ընկալելի են, ընդունելի են: Մտնելով այդ ակումբ, մենք հնարավորություն ունենք աշխատել 200 միլիոնանոց շուկայում, էֆեկտի՞վ կաշխատենք` լավ կլինի, ո՞չ էֆեկտիվ, լավ չի լինի, եթե լավ չի լինի` դա չի նշանակում, որ այդ ակումբ մտնելու փաստն է վատը: Դա նշանակում է, որ մենք էֆեկտիվ չենք եղել՝ մեկ: Երկրորդը, ընկերություն անելով կամ մի ակումբի անդամ լինելով` մենք մերժո՞ւմ ենք բոլոր մնացած հարթակներում աշխատելը, իմ կարծիքով` ոչ: ԵԱՏՄ անդամ լինելով մեր ձեռքը մեկը բռնե՞լ է Եվրամիություն չգնալու` փորձելու բիզնես անել, կամ դրանով խանգարո՞ւմ է` իհարկե, ոչ: Դուք գիտե՞ք մի բիզնես, որը ԵՄ-ում պոտենցիալ ունի և չի գնում այնտեղ կամ նրան չեն ընդունում այնտեղ, որովհետև ասում են չէ, քո երկիրը ԵԱՏՄ անդամ է, այդ իսկ պատճառով ես քո հետ չեմ համագործակցելու, ներդրում չեմ անելու: Ավելին ասեմ, ԵԱՏՄ ակումբի անդամ լինելով՝ Հայաստանն ունիկալ շանս ունի: Բոլոր հինգ երկրները գիտեք, Ռուսաստանի սահմանափակումները, սանկցիաները գիտեք, Եվրոպայում բիզնեսներ կան, որոնք այդքան էլ գոհ չեն այդ սակցիաներից, իրենք ուզում են այդ շուկայի մեջ մնալ: Լավագույն հարթակը, եթե մենք այդ ազդակները տանք, որպեսզի Հայաստանով մտնեն ԵԱՏՄ երկրներ, իմ պատկերացմամբ, ամենամեծ հնարավորությունն ունի Հայաստանը, որովհետև ամեն երկիր ունի մի սպեցիֆիկա՝ լիբերալ օրենսդրություն, մյուս, մյուս բաները: Եթե մենք ներդրումների համապատասխան ֆոնը, միջավայրն այնպես ենք անում, որ այն ընկերությունը, որը Ռուսաստանի շուկան կորցնելուց այդուհետ այս հրապարակը կարող է համարել հնարավոր ներդրում անելու միջոց, որպեսզի այստեղով ԵԱՏՄ մտնի նաև որոշակի արտոնյալ վիճակով, դա հնարավորությո՞ւն չէ:
ATV հ/ը, Արկադի Գրիգորյան- Պարոն վարչապետ, մի խնդիր, ավելի շուտ ոլորտ, որը կարծում եմ, չի ուզում համառորեն լուծվել, խոսքը կոմունալ ծառայությունների մասին է, որը հետաքրքրում է յուրաքանչյուր բնակչի՝ ջրամատակարարում, ջրահեռացում, վերելակներ և ընդհանրապես, այդ ամենը բավականին լայն է:
ՀՀ վարչապետ Կարեն Կարապետյան - Ենթակառուցվածքների հետ կապված, կարծում եմ, հետխորհրդային երկրներում մեր երկիրը չեմ ասում անելիք չունի, այսինքն վատագույնը չէ, գուցե կյանքն է մեզ ստիպել, հավաքագրման տեսակետից, տոկոսների տեսակետից և մնացած բոլոր տեսակետներից, այդ առումով կայացած է: Հիմա ջրային ռեսուրսներում մենք ունենք նոր օպերատոր, որը եկել է երկարատև աշխատելու և իր հետ ունենք ստորագրված հստակ պայմանագիր, եթե իրենք չեն կատարում այսինչ-այսինչ կետերը՝ դուք իրավունք ունեք իրեն դատելու և մնացած բոլոր սանկցիաները: Թույլ կտա՞ք ավարտելու:
Newsbook, Գոհար Վեզիրյան- Հարցի շրջանակներում է:
ՀՀ վարչապետ Կարեն Կարապետյան- Խնդրեմ:
Newsbook, Գոհար Վեզիրյան - Ես ուզում եմ գործընկերոջս հարցի՝ ջրամատակարարման հետ կապված, որ ասում եք պետք է պատժել, Դուք տեղյա՞կ եք, որ Երևանի բազմաթիվ համայնքներում 24-ժամյա ջրամատակարարում չկա, ավելին, Երևան ջուրը երբ ուզում, առանց իրազեկելու քաղաքացիների ջուրն անջատում է: Ամեն օր գրեթե նման խնդրի հետ բախվում ենք: Եվ, ասենք, զուգահեռ Սերժ Սարգսյանը հայտարարում է, որ 24-ժամյա ջրամատակարարում կա և դա լուրջ առաջընթաց է մեր երկրի համար: Գումարած դրան, հայտարարում եք, որ հունվարի 1-ից գազն 8 դրամով էժանանում է, իսկ տեղյա՞կ եք, որ ջուրն 8 դրամով թանկանալու է հունվարի 1-ից:
ՀՀ վարչապետ Կարեն Կարապետյան – Կարո՞ղ եմ պատասխանել: Ջրամատակարարման վերաբերյալ, իմ տվյալներով, գուցե սխալվեմ, կխնդրեմ գործընկերներս ուղղեն, մենք ունենք, եթե չեմ սխալվում, 22 ամբողջ չգիտեմ ինչքան տասնորդական ժամ միջին մատակարարում Երևանում, դա չի նշանակում, որ մի տեղ չկա 24 ժամ, մեկ այլ տեղ չկա 16-18 ժամ: Այդ իսկ պատճառով ջրային համակարգն ունի բազմաթիվ ինվեստիցիոն խնդիրներ: Մենք հետևողական հետևելու ենք դրան, որպեսզի մեր ինվեստրը ներդրումները կատարի, որպեսզի դա լուծվի: Չեմ կարծում, որ դա իրենց միայն վատ աշխատանքի կամ անմարդկային աշխատանքի հետևանք է, որոշակի տեխնիկական խնդիրներ կան դրա համար: Ինչ վերաբերում է սակագնի աճին, մենք ունենք մարզեր, որտեղ նվազել է, ունենք տեղ, որտեղ աճել է: Եթե չեմ սխալվում, աճած տեղը 3-4 դրամ է, բայց եթե այդ գործընթացը կազմակերպվի 24 ժամ, բոլոր այն նպատակները, որոնք պայմանագրի մեջ դրված են, ապա դա մեր հաշվարկով շատ մեծ բեռ չի լինի բաժանորդների վրա, որովհետև մինչ այդ՝ սակագնի անհավասար բաժանումը եղել է շատ ավելի վատը և եղել է Արմավիրի մարզում ֆանտաստիկ թանկ, քան Երևանում: Այդ առումով, սակագների փոփոխումը բերել է հարթեցման: Հիմա Արմավիրի մարզի բնակիչը երջանկացել է, Երևանինը գուցե մի քիչ պակաս, բայց այլ տարբերակ մենք չունենք:
«Հետք», Էդիկ Բաղդասարյան - Պարոն վարչապետ, դուք տեղյա՞կ եք, թե ինչքան են Երևանում ջրի կորուստները:
ՀՀ վարչապետ Կարեն Կարապետյան –Նորմատիվից շատ բարձր է: Տասնյակ տարիներ այդ համակարգում ներդրում չի եղել: Բացի նրանից, որ այնտեղ կարող է գող, ավազակ լինել, ինչը ես չեմ բացառում, բայց կան տեխնիկական օբյեկտիվ պատճառներ էլ: Դուք գիտե՞ք մի ձև, որ մի օրվա մեջ այդ բոլոր ներդրումները դնում են, սակագին չեն բարձրացնում և բոլորին երջանկացնում են, գիտե՞ք դուք այդպիսի ձև: Եթե վաղն, օրինակի համար, անհրաժեշտություն լինի 50 մլն դոլար դնելու և այդ փողը դնողն ասում է, որ ուզում եմ այդ փողը վերադարձնեմ, հո ինքը բարեգործ չի՞:
«Հետք», Էդիկ Բաղդասարյան - Մենք մի հետաքննություն ենք արել և պարզել ենք, թե որտեղ ով չի վճարում: Վերցրեք այդ հետաքննությունը և կպարզեք, ո՞ր մասում ով ընդհանրապես չի վճարել տարիներ շարունակ: Որպես գործարար ինչո՞ւ պետք է ներդրում անեք Հայաստանում, եթե դրսի գործարար եք:
ՀՀ վարչապետ Կարեն Կարապետյան – Նույն պատճառով, ինչո՞ւ պետք է անեք Շվեդիայում: Գործարարը ներդրում անում է նրա համար, որպեսզի ստանա տրամաբանական եկամուտ:
«Հայկական ժամանակ», Հայկ Գևորգյան - Դուք ասում եք նույն պատճառով, ինչ որ Շվեդիայի, լիովին համաձայն եմ, բայց այս տարվա կտրվածքով երկու ամենախոշոր օտարերկրյա ներդրումներն եկել են Հայաստան օֆշորից ու ընդհանրապես, օֆշորների մասնաբաժինը Հայաստանի տնտեսությունում ներդրումների առումով միշտ եղել է բարձր: Դուք, ընդհանրապես, օֆշորների ազդեցությունը մեր տնտեսության վրա ուսումնասիրե՞լ եք արդեն, թե՝ ոչ: Խոսքս միայն օտարերկրյա ներդրումների մասին չէ, այլ ներկրումների ու արտահանումների շղթայում օֆշորային ընկերությունների գոյությունը, որոնք կուտակում են շահույթը օֆշորներում՝ այստեղից հարկերից խուսափելու շնորհիվ: Ընդհանրապես, օֆշորներից եկած փողերն այդ ի՞նչ փող է, չե՞ք ենթադրում, որ դա մերոնց փողն է, գնացել է այնտեղ, հիմա այնտեղից եկել է:
ՀՀ վարչապետ Կարեն Կարապետյան – Հայկ, նույնիսկ եթե այդպես է, լավ է, թող գա, քան գնա ու չգա: Ես վստահ չեմ, օֆշորային ընկերություններին ես վերաբերվում եմ շատ ռացիոնալ: Եթե նույնիսկ ժամանակին փողը գնացել է, ինչ-որ տարբերակով մենք կարողանանք Հայաստան բերել, լավ արդյունք է: Օֆշորային ընկերություններին վերաբերվում եմ բավականին պրագմատիկ, որովհետև բոլոր երկրներում բոլոր ընկերությունները, այդ թվում՝ ամենաթափանցիկները, օֆշորային ընկերությունների հետ համագործակցում են: Հարկի վճարման վերաբերյալ, եթե օֆշորդ ներդրում է անում և այստեղ սուբյեկտ է ստեղծում, որը ենթարկվում է այստեղի օրենքներին, ինքը հարկերից չի կարող խուսափել: Տեսեք, ինչ վերաբերում է այստեղի արտահանմանը, եթե մենք արտահանման հետ կապված խնդիր ունենք, որ ինքն իջեցնում է արտահանման գինը և հետո վերավաճառում է, ապա դուք գիտեք, որ ռոյալթիով հանքարդյունաբերության մեջ մենք փորձում ենք կարգավորել դրա հարկերը: Պե՞տք է դրան հետևել, թե՝ չէ, այո՛, բայց Դուք ասում եք ինքն ինչ-որ մի X երկրում առնում է, հետո օֆշորին վաճառում է, օֆշորից հետո Z գնով բերում է այստեղ. կարող է այդպես է, կարող է այդպես չէ, ես տեսնում եմ, որ ինքը Z գնով առել է ու ապրանքը բերել է Հայաստան: Կարո՞ղ է չէ այդպես լինել, որ ինքը չէ այդ ցիկլի և՛ սկզբին, և՛ վերջում: Իսկ Դուք ո՞նց եք պատկերացնում՝ Վիրջինյան կղզիներում Հայկը եթե առնում է A գնով, վաճառում է X գնով, հետո Z գնով առնում է, մենք ո՞նց պետք է ստուգենք, մենք ընդամենը տեսնելու ենք, որ Հայկը Z գնով մտնում է, որ եթե մենք մրցունակ դաշտ ենք ստեղծում, Հայկն էլ Z գնով չի կարող բերել, եթե մոնոպոլ չէ: Վիրջինյան կղզիները դու ո՞նց ես ուզում հետազոտել: Ամերիկյան ՑՌՈՒՆ (ԿՀՎ) չի կարողանում հետազոտի:
«Հայկական ժամանակ», Հայկ Գևորգյան - Գերիշխող դիրք ունեցողների ներդրման, մարտավարման շուկա է:
ՀՀ վարչապետ Կարեն Կարապետյան – Բա քիչ առաջ ես ասում էի, եթե մենք մրցունակ դաշտ ենք ստեղծում, դու ուզում ես Z գնով բեր, թե Z մինուս էքսիլոն գնով բեր, էլ այդ սխեմադ չի աշխատելու, բայց որ գնամ ստուգեմ Վիրջինյան կղզիներում մինչև Z-ը ո՞նց է առաջացել, անհեռանկարային և անհնարին գործ է: Իսկ մրցունակ դաշտում դու արդեն կմտածես, քեզ ձե՞ռք է տալիս Z գնով բերել, թե՝ ոչ: Համաձա՞յն ես:
«Հայկական ժամանակ», Հայկ Գևորգյան - Եթե մրցունակ լինի, այո, ընդհանրապես խնդիրները վերանան:
ՀՀ վարչապետ Կարեն Կարապետյան – Եթե մրցունակ էլ չլինի, այդ հետազոտությունն անհեռանկար է: Միակ լուծումը հավասար մրցունակ դաշտ ստեղծելն է:
«Ա1+», Կարինե Ասատրյան - Պարոն վարչապետ, Ձեր խոսքի սկզբում Դուք նշեցիք, որ հանքարդյունաբերությունը դիտում եք որպես բեկումնային ճյուղ:
ՀՀ վարչապետ Կարեն Կարապետյան – Զարգացող: Բեկումնային բառն ընդհանրապես իմ լեքսիկոնի մեջ չկա:
«Ա1+», Կարինե Ասատրյան -Հարցն էր բեկումնայինին վերաբերում: Հաշվի առնելով բազմաթիվ հրապարակումները, որ մեր երկրում անխնա շահագործվում են հանքերը, վտանգավոր չե՞ք համարում, արդյոք դա և երկրորդը, երբ ձևավորվում էր Ձեր կառավարությունը, թվում էր, որ ամենամեծ փոփոխությունը պետք է լինի արտաքին գերատեսչությունում, չփոխվեց: Արդյո՞ք դա կադրերի պակասից էր:
ՀՀ վարչապետ Կարեն Կարապետյան – Ուրեմն ձեր առաջին հարցի մեջ պատասխանը կա, անխնա օգտագործմանը դեմ եմ՝ եթե անխնա է: Երկրորդ հարցը, մասնավորապես, այո: Շնորհակալություն:
«Aravot.am», Աննա Իսրայելյան – Տնտեսության վիճակի վերաբերյալ Ձեր և նախագահի պատկերացումները տարբե՞ր են: Ես սա ասում եմ՝ հաշվի առնելով այն, երբ Դուք նոր նշանակվեցիք վարչապետ և տնտեսության վիճակի վերաբերյալ տվեցիք ծանր գնահատական, մինչդեռ ՀՀԿ համագումարում ունեցած իր ելույթում այն պատկերը, որ իր տնտեսական բլոկի մասին ասում էր նախագահը, բավական կայունության, զսպանակը գործելու…այնտեղ էիք, լսել եք: Եվ մեկ հարց ևս, այսօր «Բարև Երևան» խմբակցությունն էր իր դժգոհությունը հաղորդագրությամբ տարածել, որ կառավարությունից չեն պատասխանում իր հարցադրումներին: Ես այս մասին հնչեցնում եմ այն իմաստով, երբ Դուք էլի որպես վարչապետ նշանակվում էիք, էլի եղան դժգոհություններ, որ չեք հանդիպել, այդ թվում ընդդիմադիր խմբակցությունների հետ: Արդյո՞ք ընդդիմադիր քաղաքական ուժերին, չեմ ուզում ասեմ անտեսելը, բայց դառնալու է գործելակերպ:
ՀՀ վարչապետ Կարեն Կարապետյան – Պատասխանեմ առաջին հարցին. նախ և առաջ նախագահի հետ այսօր մեր աշխատանքը կառուցվում է հետևյալ առումով, որ տնտեսական բլոկում մեր այսօրվա թիմն ունի որոշում կայացնելու ազատության աստիճան: Տնտեսական առումով մեր պատկերացումները տարբեր են, մակրո առումով՝ չէ, կարող են հարցեր լինել, որ մենք տարբեր ձև նայենք և դա նորմալ է, տրամաբանական է, նույնը և մեր թիմի մեջ, ես մի ձև կարող եմ նայել, մեկ այլ նախարար մեկ ուրիշ ձև և դրա շուրջ բանակցենք:
Ինչ վերաբերում է օպոզիցիոն խմբակցությունների հետ չհանդիպելուն, ճիշտն ասած, ես այդպես հատուկ խնդիր չէի էլ դրել: Երբ որ կառավարության ծրագիրը ներկայացվում էր ու ասացին դուք ինչո՞ւ չեք հանդիպել, ես ինչքան գիտեմ, նման պարտադիր պայման մեզ վրա չկար: Ավելին, մտքովս չէր էլ անցնում, որ պետք է հանդիպեմ: Ոչ թե, որ դա ավելորդ էր, նույնիսկ պրոտոկոլային կամ ռեգուլյատիվ չէի մտածում, բայց ես ծրագիրը գրելու ժամանակ բազմաթիվ, ինչպես Դուք եք ասում, օպոզիցիոն, քաղաքական գործիչների հետ եմ հանդիպել: Ես հանդիպել եմ, ինձ ներառած, 10 վարչապետի հետ, որոնց հետ քննարկել եմ այդ ծրագրերը և այլն: Այսինքն, այդպիսի խնդիր չկա, այդպիսի պարտադրանք չկա:
«Շանթ» հ/ը, Աղասի Հունանյան- Մենք խոսեցինք ավտո գազալցակայաններից, գնից:
ՀՀ վարչապետ Կարեն Կարապետյան – Այն տպավորությունն է, ոնց որ ես էլ դեռ գազի հիմնարկի ղեկավարն եմ: Հարցերի հիմնական մասը գազից է:
«Շանթ» հ/ը, Աղասի Հունանյան- Չէ, հաճույքով եք պատասխանում, դրա համար:
ՀՀ վարչապետ Կարեն Կարապետյան – Փաստ չէ, այդպես ձև եմ անում (ծիծաղում է):
«Շանթ» հ/ը, Աղասի Հունանյան - Խնդիրը գազալցակայանների գինը չէ, ամենալուրջ խնդիրը գազն է, գազի որակն է և սպասարկումը, որը շատ մեղմ ասած երկու մասով այսօր այնպիսի քրոնիկ խախտում կա, համատարած բոլորի մոտ, որը բերում է նրան, որ բոլորս ինչ-որ փուլերում սկսում ենք իրար հետևից պայթյունները լուսաբանել: Առաջին՝ թույլատրվածից շատ է լցվում գազը՝ 30-50 մինիմում, իսկ որոշ տեղերում՝ 70–ից ավելի խորանարդ մետր: Այսինքն 200-ի փոխարեն լցվում է մինչև 270 խորանարդ մետր: Ինչո՞ւ է շատ լցվում, որովհետև գազի որակն այնպիսին է, որ իր չափով լցնելու պարագայում, այդ գազը շատ արագ վերածվում է ուրիշ ճնշման, անգամ առանց վարելու: Այսինքն, այն տեխնիկան, որը դրված է այդ տների ներսում, ոչ թե գեղեցիկ լցակայանները, կարմիր ներկած, այլ այն՝ ինչ աշխատում է, ներսում դռռում է՝ դա վատն է, վատ որակի է, ի սկզբանե շատ մաշված է, շատ տեղերում խորհրդային է և չի համապատսախանում նորմատիվին: Ավելի լցնելուց ճնշմամբ մենք այդ բալոնները լոճում ենք և հերթով մարդկանց կյանքերին վերջ ենք տալիս լցնելու ժամանակ: Դա այն ոլորտն է, որը փող է աշխատում, կարող ենք ասել՝ լավ գազ լցրեք:
ՀՀ վարչապետ Կարեն Կարապետյան – Տեխնիկական տեսչության հարցով՝ Արտակարգ իրավիճակների նախարարություն, Սննդի անվտանգության ծառայություն, և բոլոր մնացած տեսուչներին հանձնարական է տրված, որպեսզի այդ բոլոր ատյաններով անցնեն և ոչ թե պատժողի ֆունկցիա կատարեն՝ տուգանք դնեն, կաշառք վերցնեն, վախեցնեն, այլ զգուշացնեն, որ մենք մեկ ամիս հետո գալու ենք: Լինի դա շուկա, լինի ԱԳԼՃԿ, լինի սննդի անվտանգություն, կոնյակի գործարան, թթվասերի, կաթի գործարան, որպեսզի մեկ ամիս հետո մենք բարոյական իրավունք ունենանք՝ գանք. ոչ թե մենք պատժող ենք, այլ մենք հսկող ենք, վերահսկողություն կատարող ենք: Վերջերս, 10-12 օր առաջ Արտակարգ իրավիճակների նախարարությանը հանձնարարվել է, որ բոլոր ԱԳԼՃԿ-ներով անցնեն: Դա, իհարկե, շատ վատ փաստ է, որի մասին Դուք ասում եք: Երբ մենք հայտնաբերենք, ոնց որ Դուք եք ասում՝ «դռդռացողը», որը չի համապատասխանում տեխնիկական պայմաններին, շատ խիստ չի համապատասխանում, մենք դրանք փակելու ենք: Պրոբլեմ է դա, իրականում անհանգստացնող պրոբլեմ է: Էլ չեմ ասում, այս մեր երթուղային տաքսիների մեջի բալոնները: Բաց եմ խոսում, որ այսօր մտնենք բոլոր ավտոբուսները, տեխնիկան, որոնք չեն համապատասխանում չափանիշներին, վերացնենք, տրանսպորտային կոլապս ենք ունենալու: Տրանսպորտային կոլապս չունենանք՝ ինվեստիցիա պետք է բերենք, ինվեստիցիա բերենք՝ սակագին պետք է փոխենք, սակագին փոխենք՝ պատկերացնում եք ինչ կլինի: Եվ այս իրավիճակը բավականին անհեռանկարային է, եթե մենք համարձակություն չունենանք այդ լուծումները բարձրաձայնենք, բացատրենք, լուծում տանք:
«Yerkir.am» լ/կ, Ագնեսա Խամոյան- Պարոն վարչապետ, շարունակվո՞ւմ են արդյոք կրճատումները պետական ապարատում, ունե՞ք արդյոք թվեր, թե Ձեր պաշտոնավարման այս մի քանի ամիսների ընթացքում քանի մարդ է կրճատվել և կան արդյոք թվեր, թե քանի աշխատատեղ է ստեղծվել Ձեր պաշտոնավարման այս երեք ամիսների ընթացքում, և մտավախություն չունե՞ք արդյոք, որ 80-150 հազար դրամ աշխատավարձ ստացող մարդիկ, ովքեր, ըստ էության, ընտանիք են պահում այդ գումարով, կարող են բողոքի ալիք բարձրացնել, օրինակ՝ հունվարին: Եվ գուցե մի փոքր անլուրջ հարց, շատ բծախնդի՞ր եք փողկապների և կոստյումների ընտրության հարցում:
ՀՀ վարչապետ Կարեն Կարապետյան –Օրինակ՝ Դուք, ի՞նչպես եք համարում, մենք ճի՞շտ ենք անում, որ պետական կառավարման համակարգն օպտիմալացնում ենք: Եթե էֆեկտիվ չէ, եթե շատ մարդ է, շատ մարդու դեպքում՝ պատասխանատվությունը լղոզվում է, փոխանակ պերսոնալ, անձնական պատասխանատվություն լինի, կոլեկտիվ անպատասխանատվություն է: Ես՝ որպես ՀՀ քաղաքացի, մի քիչ էլ վարչապետ, ասում եմ՝ այստեղ աշխատում է 120 մարդ և բյուջեից 40 կամ 50-ն ավելի փող են ուտում, ես որ 70-ով աշխատեմ՝ 40-50 մարդու աշխատավարձը մեկ ուրիշ տեղ կարող եմ դնել, մի չրի գործարան, մեկ այլ արտադրություն կարող եմ դնել, որտեղ աշխատատեղ կլինի: Ճի՞շտ եմ անում, թե՞ սխալ: Դե եկեք 120 մարդու փոխարեն 180-ին վերցնենք: Բայց յուրաքանչյուր անգամ, երբ ասում են այ այս ԾԻԳ-ի կրճատման ընթացքում այսքան մարդ է կրճատվել և 264 մլն դրամ միջոց է տնտեսվում, ես միանգամից մտածում եմ՝ 264 մլն դրամը տրամաբանական քանի աշխատատեղ կարող է ստեղծել: Այ հիմա պետական կառավարման համակարգում, վաղը գործազրկության դեմ պայքար անեմ և պետական ապարատն ուռճացնեմ, կասե՞ք, որ ես հերոս եմ և պայքարում եմ գործազրկության դեմ, կձևակերպե՞ք այդպես, չեք ձևակերպի, չէ՞:
Երկրորդ հարցի հետ կապված՝ ոչ, բծախնդիր չեմ, շատ հեշտ ստացվում է ինձ մոտ:
Sputnik Armenia, Ալինա Օրդյան- Ես կցանկանայի հարցս շեղել դեպի փոքր և միջին բիզնես, որովհետև, կարծում եմ, կհամաձայնեք, որ մեր նման փոքր երկրների համար ՓՄՁ-ն բավականին կարևոր ոլորտ է: Դուք գերակայությունները նշեցիք՝ ՏՏ ոլորտ, գյուղատնտեսություն և այլն: Այս ոլորտի համար նպաստավոր պայմաններ ի՞նչպես եք ստեղծելու, որպեսզի խոշորներն այդպես չխժռեն փոքր և միջին բիզնեսը: Մեր հասարակության մեծ մասը, կարծում եմ, այդ ոլորտում կարող է գտնել իր տեղը, որոնք տարիների ընթացքում փակվեցին: Ես կարող եմ նաև օրինակներ ասել:
ՀՀ վարչապետ Կարեն Կարապետյան – Մենք ունենք մի քանի հարթակներ, որտեղ ՓՄՁ-ների մասին անհանգստացող մարդիկ կան: Իրականում ՓՄ բիզնեսը չափազանց կարևոր հարթակ է մեզ համար: Երբ մարզերում մենք հանդիպում ենք, հիմա փորձում ենք հետադարձ կապը ստեղծել այնպես, որ մարդն ինչ-որ նախաձեռնություն ունի, ինչ-որ մի գումարի չափ ունի, ինչ-որ մի փոքր մաս կամ պոչի մասը պակասում է, որպեսզի այդ ձեռնարկությունը ստեղծի, մենք անպայման, եթե տրամաբանական է, եթե ինքը բիզնես-պլան է ներկայացնում՝ իրեն օգնելու ենք: Ի՞նչ կերպ՝ ժամանակը ցույց կտա և կախված է մեր ֆինանսական կարողություններից:
Sputnik Armenia, Ալինա Օրդյան - Իսկ հարկային դաշտի առումո՞վ:
ՀՀ վարչապետ Կարեն Կարապետյան – Հարկային դաշտի առումով, այսօր չեմ կարծում, որ իրենց մոտ ամենանեղ տեղը դա է:
Sputnik Armenia, Ալինա Օրդյան – Ես պարզապես վստահ եմ, որ Դուք այդ բանաձևը կգտնեք՝ հավասար դաշտ ստեղծեք նաև, որպեսզի խոշորներն իրենց տեղում լինեն, չխժռեն փոքրերին:
ՀՀ վարչապետ Կարեն Կարապետյան- Ասեմ Ձեզ, ես էլ եմ վստահ:
Sputnik Armenia, Ալինա Օրդյան - Բայց դրա համար, հասկանում եմ, ժամանակ է պետք: Նպաստավոր պայմաններ ստեղծելու համար առաջնահերթ ի՞նչ քայլ եք անելու:
ՀՀ վարչապետ Կարեն Կարապետյան – Ամեն ինչն էլ առաջին հերթ է՝ հարկայինը, մաքսայինն առաջանային է, բիզնես ռեգիստրացիան, իրավապահները, լիցենզիան ստանալը՝ առաջնային է: Կառավարության մեր նիստի օրերին, պրակտիկորեն օր չկա, որի ժամանակ մենք հանձնարարական չունենանք, որն ուղղված չէ հակակոռուպցիոնին: Ասում ենք՝ լիցենզիան առանց մարդու հետ շփվելու պետք է ստանաս, ասում ենք՝ դեղորայքը եկեք ստուգենք, ասում ենք՝ ոչ օրինական հարստացման դեմ… Բոլոր քայլերը, ես մի կառավարության նիստ չեմ հիշում, որտեղ մենք հակակոռուպցիոն հանձնարարական չունենանք: Բազմաթիվ են, լիցենզիա ստանալը պրոբլեմ է, կադաստրից թուղթ վերցնելը, հարկայինի հետ շփվելը: Ի՞նչ պետք է անենք՝ մեթոդաբար պետք է գնանք, մի օրվա մեջ բոլորը փոխվելո՞ւ են՝ չէ, ինչի՞ց է կախված դա, ինչքանո՞վ ենք մենք հետևողական լինելու՝ մինչև վերջ: Այլ տարբերակ էլ չունենք:
«Արարատ» հ/ը, Միհրան Հակոբյան- Պարոն վարչապետ, ես մի փոքր գլոբալ հարց ունեմ՝ աշխարհաքաղաքական նկատառումներից ելնելով: Մենք երկար տարիներ խոսում ենք, որ եթե Ադրբեջանի հետ ռազմական հավասարակշռությունը չպահենք՝ ստանալու ենք պատերազմ: Համենայն դեպս, կային գնահատականներ անգամ, որ ապրիլին Ադրբեջանին թվացել էր, որ հավասարակշռությունը խախտված է, բայց երբեք չենք խոսում կամ չենք քննարկում հասարակական, անգամ պետական մակարդակով ի՞նչ փողի մասին է խոսքը և ի՞նչ տնտեսություն մենք պետք է ունենանք, ի՞նչ բյուջե հավաքենք, որի համապատասխան տողով կկարողանանք բանակին այսքան փող տրամադրել, որպեսզի, հաշվի առնելով Ադրբեջանի եկամուտները, մենք այդ սպառազինությունների մեզ թելադրված մրցավազքում տանուլ չտանք:
ՀՀ վարչապետ Կարեն Կարապետյան- Նախ ասեմ, որ ես չեմ հիշում, որ մենք ասել ենք հավասարություն պահպանենք: Մի օրինակ եմ հիշում, դեռ Սովետ միությունից՝ ասում է, Ամերիկան կարող է աշխարհը 12 անգամ ոչնչացնի, Սովետ միությունը՝ 7, բայց աշխարհին բավական է մեկ անգամը: Այդ իսկ պատճառով, մենք ոնց անենք, մեր կարողություններից ելնելով մեր անվտանգության խնդիրը մաքսիմալ լուծենք, որպեսզի մեր հակառակորդը հույսերը կորցնի կամ նման հույսեր չփայփայի, թե կարող է ինքն այդ հարցը լուծել… Իսկ բյուջեն ի՞նչքան պետք է լինի, որպեսզի ՀՆԱ-ն աճի, որպեսզի մենք պաշտպանության մեր ծախսերը և բոլոր մնացած ծախսերը հոգանք, դրա համար, բարդ թվաբանություն չէ, կարող ենք հաշվել, այլ խնդիր է՝ ո՞նց հասնել այդ բյուջեին: Մենք ունենք խնդիրներ, Դուք գիտեք, ՀՆԱ-ն ինչքան է, արտաքին պարտքը ինչքան է, մեր ներքին սեփական եկամուտներն ինչքան են, առևտրային ակտիվությունն ինչքան է, բիզնես ակտիվությունն ինչքան է: Դրանք բոլորն այն հարցերն են, որոնց լուծումները մենք պետք է տանք:
«Հրապարակ», Արմինե Օհանյան – Ձեր՝ Հանրապետականին անդամագրվելու որոշումը ե՞րբ է կայացվել՝ Ձեր վարչապետ նշանակվելու օրերի՞ն և եթե այդ օրերին, արդյոք խոսվել է այդ թեմայով, Ձեր և նախագահի միջև խոսակցություն եղե՞լ է: Երկրորդ հարցը, Դուք անընդհատ խոսում եք էֆեկտիվ կառավարումից, հետաքրքիր է, արդեն մոտ երեք ամիս է ղեկավարում եք, այս երեք ամիսը Դուք էֆեկտիվ համարո՞ւմ եք, թե՝ ոչ, Ձեր հիասթափությունները, Ձեր սպասելիքներն արդարացե՞լ են, թե՝ ոչ, ձեր թիմից արդյոք գո՞հ եք, Ձեր նշանակած կադրերին ի նկատի ունեմ:
ՀՀ վարչապետ Կարեն Կարապետյան - Առաջին օրը նման հարց չենք քննարկել, բայց ես էլ ուզում եմ Ձեզ հարցով պատասխանել. օրինական լրագրողները և այն քաղաքացիները, որոնք մեր քաղաքական իրավիճակը գիտեն, իրենց համար շա՞տ անկանխատեսելի էր, որ ես պետք է դառնամ Հանրապետական, եթե այսօրվա կարգավիճակը…Տիգրան Սարգսյանը մի քիչ ուրիշ միջավայրում էր, իրեն կարող էր շքեղություն թույլ տալ: Առաջին օրը նման խոսակցություն չի եղել: Էֆեկտի՞վ ենք կառավարում, թե՝ չէ, թիմի անդամներից գո՞հ եմ, թե՝ չէ. այսպես ասեմ՝ մեկից գոհ եմ, մեկից դժգոհ, մեկից սպասումներս ավելի շատ են, մեկից՝ ոչ և այս պահին, որոշակի ժամանակ է, որպեսզի յուրաքանչյուրը տեղավորվի…Կառավարությունն իմ ընտանիքն է և ես մեր ներքին խոսակցություններն իրավունք ունեմ չբարձրաձայնելու: Երբ ես որոշում կայացնեմ, դուք կիմանաք՝ ումից եմ գոհ, ումից՝ դժգոհ:
«Հրապարակ», Արմինե Օհանյան - Ոչ թե կադրերի մասին է խոսքը, այլ աշխատանքի ծանրությունը, բարդությունը, նախապես, Ձեր նշանակվելու պահին սպասելիքները և այս ընթացքում Ձեր տպավորությունները:
ՀՀ վարչապետ Կարեն Կարապետյան – Ունեմ անակնկալներ և ունեմ ոչ անակնկալներ: Իրականում կան բաներ, որ ինձ շատ զարմացրել են՝ ՊՈԱԿ-ների, ԾԻԳ-երի սարսափելի մեծ քանակը, անձնակազմերի և հաստատուն ծախսերի մեծ թիվը. ծույլ պաշտոնյաները չեն զարմացրել:
«Հրապարակ», Արմինե Օհանյան - Ձեր նշանակման օրերին Դուք ասացիք, որ տնտեսության վիճակը ծանր է: Այդ առումով, այսօր Ձեր կարծիքը փոխվե՞լ է, ավելի ծանրի տպավորություն ունե՞ք, թե հակառակը:
ՀՀ վարչապետ Կարեն Կարապետյան – Նույն կարծիքն ունեմ, բայց դրա լուծման ճանապարհներ եմ տեսնում:
«Հայելի», Անժելա Թովմասյան- Եվ մի հարց, ի՞նչպես եք գնահատում Գագիկ Ծառուկյանի վերադարձը, ճի՞շտ է, որ Դուք անձնական հանդիպումներ եք ունեցել և ունենում եք շատ հաճախակի: Այս հարցը տալիս եմ քաղաքական մենաշնորհի դեմ պայքարի տեսանկյունից, եթե հանկարծ Հանրապետականը պարտվի, նորից վերադառնալո՞ւ եք Ռուսաստան, թե մնալու եք Հայաստանում:
ՀՀ վարչապետ Կարեն Կարապետյան- Գագիկ Ծառուկյանը գալիս է քաղաքականություն, թե՝ չէ. Գագիկ Ծառուկյանի խնդիրն է և որևք մեկը որևէ մեկի փոխարեն չի կարող պատասխանել, ինքն իրավունք ունի գալու, թե՝ չէ: Եթե որոշում կայացնի…
«Հայկական ժամանակ, Հայկ Գևորգյան- Անցած անգամ այդպես չեղավ:
Վարչապետ Կարեն Կարապետյան- Դե անցած անգամ այդպես չեղավ, այդ հարցն անցած անգամ ի՞նձ եք տվել: Ե՞ս եմ որոշել Գագիկ Ծառուկյանը…
«Հայելի», Անժելա Թովմասյան- Ձեր կուսակցությունն էր՝ ՀՀԿ-ն էր:
Վարչապետ Կարեն Կարապետյան - Ես պատասխանում եմ հարցին, հարցը հնչեցնում եմ՝ ինչպե՞ս եք վերաբերվում Գագիկ Ծառուկյանի քաղաքականություն գալուն: Պատասխանում եմ՝ վերաբերվում եմ շատ հանգիստ: Անձնական հանդիպումներ ունենում եմ Գագիկ Ծառուկյանի հետ, այդ հարցն անձնական հանդիպումների ժամանակ չենք քննարկում:
«Հայկական ժամանակ», Հայկ Գևորգյան- Ի՞նչ հարցեր եք քննարկում, ամենախոշոր գազալցակայանները ոնց որ թե իրենն են:
Վարչապետ Կարեն Կարապետյան- Հայկ, քեզ ո՞նց է թվում, ես որ մարդկանց հետ հանդիպում եմ, անպայման պետք է գազից խոսե՞մ (ծիծաղում է):
«Հայկական ժամանակ», Հայկ Գևորգյան- 15 տարի դրանից եք խոսել:
Վարչապետ Կարեն Կարապետյան- Դե հոգնել եմ այ մարդ:
«Ժողովուրդ» օրաթերթ, Թագուհի Թովմասյան - Երբ մենք անդամակցեցինք Եվրասիական տնտեսական միությանը՝ պաշտոնապես հայտարարվեց, որ մեր գործարարների համար լինելու է կանաչ միջանցք, բայց մինչև հիմա հայկական բեռնատարները շարունակում են օրերով հերթ կանգնել Լարսի անցակետում, այնպես, ինչպես Թուրքիայի, Վրաստանի, Ադրբեջանի և մյուս երկրների բեռնատարները: Այսինքն, մենք որևէ առումով արտոնյալ վիճակում չենք: Եվ երկրորդը՝ նույն ԵԱՏՄ-ին առնչվող: Երբ մենք անդամակցում էինք, պաշտոնական քարոզչությունն այսպիսին էր, նաև Դուք ասացիք, որ մենք ունենալու ենք 200 միլիոնանոց շուկա, բայց մենք անդամակցելուց անմիջապես հետո Ազգային վիճակագրական նաև պաշտոնական մյուս ծառայությունները տալիս են տեղեկություններ այն մասին, որ Հայաստանից ԵԱՏՄ անդամ երկրներ արտահանվող ապրանքների քանակը կտրուկ նվազել է: Կարող եմ թվեր բերել.
ՀՀ վարչապետ Կարեն Կարապետյան - Պետք չէ, առաջին հարցի պատասխանը. նույն ձև չեն վերաբերվում Թուրքիային և մյուս երկրներին, բայց քանի որ որոշակի մեր երկրներ սանկցիաներ ունեն, ապա մտածելով, որ կարող են մեր երկիրը տրանզիտային երկիր լինելի, որոշակի ստուգումներ են անում: Ստուգումներն անում են այն շրջանակների մեջ, որոնք պայմանավորվել են: Դեպքեր լինո՞ւմ են, որ խախտում են՝ այո: Ռեգուլյար այդ դեպքերին մենք անդրադառնում ենք: ԵԱՏՄ մտնելու ժամանակ…ես նորից եմ ասում, մենք մտնում ենք մեծ շուկա: Մեծ շուկա մտնելու ժամանակ, եթե անկում ունենք, որևէ մեկը հաշվարկ չունի, եթե մենք ԵԱՏՄ չմտնեինք, անկումն ինչքա՞ն կլիներ: Իսկ եթե ԵԱՏՄ չմտնեինք, գուցե անկումն ավելի շատ լիներ: Այդ իսկ պատճառով ինչքա՞ն է ԵԱՏՄ փայաբաժինն այդ անկման մեջ, և ինչքանը՝ ոչ, համենայն դեպս, չեմ կարող ես ինչ-որ տրամաբանական մի բացատրություն տալ, որ ԵԱՏՄ-ի մեջ լինելն է խանգարել, որ մեր տնտեսությունը չի զարգացել: Ես նման բացատրություն չունեմ:
«Ժողովուրդ» օրաթերթ, Թագուհի Թովմասյան - Պարոն վարչապետ, ըստ Գելափի վերջին հարցումների, Ձեր վարկանիշը շատ ավելի բարձր է, քան նախագահ Սերժ Սարգսյանինը: Ձեզ համար անակնկա՞լ է այդ փաստը, ակնկալում եմ կարճ պատասխան՝ այո կամ ոչ:
ՀՀ վարչապետ Կարեն Կարապետյան - Այո: Դե եթե ինքը գրում է՝ այդպես է, ես ի՞նչ ասեմ, ասեմ՝ այդպե՞ս չէ:
«Ժողովուրդ» օրաթերթ, Թագուհի Թովմասյան – Եվ ի՞նչ եք կարծում, Հանրապետականին անդամակցելուց հետո Ձեր վարկանիշն անկում ապրե՞լ է, թե՞ ոչ:
ՀՀ վարչապետ Կարեն Կարապետյան - Կարծում եմ՝ այո:
«Ժողովուրդ» օրաթերթ, Թագուհի Թովմասյան – Շա՞տ:
ՀՀ վարչապետ Կարեն Կարապետյան - Չգիտեմ: Հաջորդ հարցմանը կստուգենք:
«Ա1+» լ/գ, Կարինե Ասատրյան - Դուք մասնակցելո՞ւ եք Հանրապետականի քարոզարշավին, և եթե այո, արձակուրդ գնալո՞ւ եք՝ Դուք և հանրապետական նախարարները:
ՀՀ վարչապետ Կարեն Կարապետյան – Ես, ճիշտն ասած, չգիտեմ, դրա համար պե՞տք է արձակուրդ գնալ: Եթե պետք է, ուրեմն գնալու եմ, եթե պետք չէ, չեմ գնալու:
Newsbook, Գոհար Վեզիրյան - Այսինքն՝ մասնակցելո՞ւ եք:
ՀՀ վարչապետ Կարեն Կարապետյան – Բա եթե Հանրապետական կուսակցության անդամ եմ, և մենք որոշում ենք, որ պետք է այս ինչն անենք, ներսում կռիվ տալով, համաձայնվելով, չհամաձայնվելով, ընդդիմախոսելով ձևերի վերաբերյալ, իսկ եթե պետք է գնամ արձակուրդ՝ ուրեմն կգնամ, եթե պետք չէ գնալ՝ չեմ գնա, որ արձակուրդս ավելի լավ բանի վրա օգտագործեմ:
«Հայելի», Անժելա Թովմասյան – Ես ուզում էի հարցնել՝ Ձեր իմիջով հատուկ խո՞ւմբ է զբաղվում, թե Դուք էդպես բարձրաճաշակ, Ձեր փողկապները, Ձեր կոստյումները…
ՀՀ վարչապետ Կարեն Կարապետյան - Դուք ո՞ւմ վրա եք կասկածում (ծիծաղում է):