երկուշաբթի, 2 փետրվարի 2004
ՀՀ վարչապետ Անդրանիկ Մարգարյանի մոտ այսօր լսվել է ՀՀ արտաքին գործերի նախարարության 2003թ. գործունեության հաշվետվությունը, որը գնահատվել է բավարար: Նախարար Վարդան Օսկանյանը ներկայացրել է հաշվետու ժամանակաշրջանում մի շարք ոլորտներում՝ գլոբալ քաղաքականության (ահաբեկչության դեմ պայքարի, միջազգային կազմակերպություններում մեր երկրի ներգրավվածության), ինչպես նաև տարածաշրջանային քաղաքականության ոլորտում կատարված աշխատանքները և դրանց արդյունքները, տարվա ընթացքում արտերկիր կատարած այցերը, դրանց նպատակը և արդյունքները, միջազգային հարցերի վերաբերյալ միջգերատեսչական հանձնաժողովների աշխատանքը, Հայաստան-Սփյուռք համագործակցության ոլորտում իրականացված միջոցառումները, ստորագրված միջազգային պայմանագրերը, ՀՀ օրենքներն ու կառավարության որոշումները և այլն: Նախարարն անդրադարձել է նաև 2004թ. նախատեսված աշխատանքներին, նշելով, որ արտգործնախարարությունը շարունակելու է իր գործունեությունը ՀՀ կառավարության ծրագրի իրականացման ուղղությամբ: Աշխատանքներ են տարվելու միջազգային կազմակերպություններում Հայաստանի գործուն ներգրավվածության ապահովման, անմիջական հարևանների, տարածաշրջանային պետությունների և համաշխարհային ուժային կենտրոնների հետ փոխհարաբերությունների զարգացման ուղղությամբ: Գերակայություն է տրվելու արտաքին քաղաքականության տնտեսական բաղադրիչի ամրապնդմանը և հետագա զարգացմանը, Հայաստանի եվրոպական ինտեգրման գործընթացին:
