Հայաստանի Հանրապետության Կառավարություն

ՀՀ վարչապետ Անդրանիկ Մարգարյանի հանձնարարականի համաձայն, հունվարի 19-ից վարչապետի մոտ սկսվում են ՀՀ նախարարությունների և ՀՀ կառավարությանն առընթեր պետական կառավարման մարմինների 2003 թ. գործունեության հաշվետվությունների քննարկումները։ Հանձնարարականով հստակեցված են հաշվետվությունների կազմման համար պարտադիր պահանջները, որոնց համաձայն, տարվա ընթացքում կատարված աշխատանքներից բացի, պետք է նշված լինեն դրանց արդյունքները, թերացումները և չկատարված աշխատանքները (այդ թվում` ՀՀ կառավարության 2002 թ. դեկտեմբերի 26-ի N2141–Ն որոշմամբ հաստատված ցանկում ներառվածների մասով), ինչպես նաև կառավարության գործունեության ծրագրի ապահովման ու նախորդ տարվա բացթողումների վերացման համար 2004 թ. նախատեսվող միջոցառումները։

ՀՀ վարչապետի հանձնարարականով, սահմանված ժամանակացույցի համաձայն, հաշվետվությունների քննարկումները կտևեն մինչև փետրվարի 6-ը.

Հունվարի 19-ին իրենց տարեկան հաշվետվությունները կներկայացնեն ՀՀ աշխատանքի և սոցիալական հարցերի նախարարությունը, ՀՀ սոցիալական ապահովագրության պետական հիմնադրամը, ՀՀ կառավարությանն առընթեր արտակարգ իրավիճակների վարչությունը, հունվարի 20-ին` ՀՀ առողջապահության, կրթության և գիտության նախարարությունները, ՀՀ կառավարությանն առընթեր ֆիզիկական կուլտուրայի և սպորտի պետական կոմիտեն, հունվարի 21-ին` ՀՀ բնապահպանության, գյուղատնտեսության նախարարությունները և ՀՀ կառավարությանն առընթեր ջրային տնտեսության պետական կոմիտեն, հունվարի 22-ին` ՀՀ քաղաքաշինության նախարարությունը և ՀՀ կառավարությանն առընթեր անշարժ գույքի կադաստրի պետական կոմիտեն, հունվարի 23-ին` ՀՀ կառավարությանն առընթեր պետական գույքի կառավարման վարչությունը, միգրացիայի և փախստականների վարչությունը, քաղաքացիական ավիացիայի գլխավոր վարչությունը, փետրվարի 2-ին` ՀՀ արդարադատության, արտաքին գործերի, մշակույթի և երիտասարդության հարցերի նախարարությունները, փետրվարի 3-ին` ՀՀ ֆինանսների և էկոնոմիկայի նախարարությունը, ՀՀ կառավարությանն առընթեր հարկային պետական ծառայությունը և մաքսային պետական կոմիտեն, փետրվարի 4-ին` ՀՀ պաշտպանության նախարարությունը, ՀՀ կառավարությանն առընթեր ոստիկանությունը և ազգային անվտանգության ծառայությունը, փետրվարի 5-ին` ՀՀ էներգետիկայի նախարարությունը, փետրվարի 6-ին` ՀՀ առևտրի և տնտեսական զարգացման, տրանսպորտի և կապի նախարարությունները։