չորեքշաբթի, 14 հունվարի 2004
ՀՀ վարչապետ Անդրանիկ Մարգարյանի որոշումներով ՀՀ մշակույթի և երիտասարդության հարցերի Նախարարի տեղակալի պաշտոններից ազատվել են Կարեն Արիստակեսյանը և Ալիսա Ադամյանը: Վարչապետի մեկ այլ որոշմամբ, Ալիսա Ադամյանը նշանակվել է ՀՀ վարչապետի խորհրդական: Մշակույթի և երիտասարդության հարցերի նախարարի տեղակալներ են նշանակվել Գագիկ Գյուրջյանը և Կարինե Խոդիկյանը:
Անդրանիկ Մարգարյանի որոշմամբ ՀՀ կառավարության աշխատակազմի ազգային փոքրամասնությունների և կրոնի հարցերի վարչության պետ է նշանակվել Հրանուշ Խառատյանը:
******************
Կենսագրական համառոտ տվյալներ
Ալիսա Վաչագանի Ադամյանը ծնվել է 1943թ., Երևան քաղաքում: 1967 թ. ավարտել է Երևանի Կոմիտասի անվան պետական կոնսերվատորիան՝ ջութակահարի մասնագիտությամբ, նվագախմբի արտիստ, դասատու որակավորմամբ: Մինչ նշանակումը եղել է ՀՀ մշակույթի և երիտասարդության հարցերի փոխնախարար: ՀՀԿ անդամ է, ունի 3 երեխա:
Գագիկ Գուրգենի Գյուրջյանը ծնվել է 1948թ., Աշտարակի շրջանի Ոսկևազ գյուղում: 1972թ ավարտել է Երևանի Կ. Մարքսի անվան պոլիտեխնիկական ինստիտուտը՝ քաղաքաշինություն մասնագիտությամբ, ճարտարապետի որակավորմամբ: Հայաստանի Ճարտարապետների միության անդամ է: Մինչ նշանակունը եղել է ՀՀ մշակույթի և երիտասարդության հարցերի նախարարության պատմության և մշակույթի հուշարձանների պահպանության գործակալության պետ: Անկուսակցական է, ունի 2 երեխա:
Կարինե Կիմիկի Խոդիկյանը ծնվել է 1957թ. Վրացական ՍՍՀ Ախալքալակ քաղաքում: 1980թ. ավարտել է Երևանի պետական համալսարանը բանասեր մասնագիտությամբ, հայոց լեզվի և գրականության ուսուցչի որակավորմամբ: Մինչ նշանակումը դրամատուրգ, հրապարակախոս Կարինե Խոդիկյանը եղել է «Գրական թերթի» գլխավոր խմբագիրը: Անկուսակցական է, ամուսնացած է :
Հրանուշ Սերգեյի Խառատյանը ծնվել է 1952թ., Ադրբեջանական ՍՍՀ Շամխորի շրջանի Ջագիր գյուղում: 1975թ. ավարտել է Երևանի պետական համալսարանը, պատմություն մասնագիտությամբ, պատմության և հասարակագիտության ուսուցչի որակավորմամբ: Պատմական գիտությունների թեկնածու է: 1994-2000թթ. եղել է ԵՊՀ ազգագրության ամբիոնի վարիչ: Մինչև նշանակումը զբաղվել է գիտական հետազոտություններով՝ լինելով «Ազգաբանական հետազոտությունների հայկական կենտրոնի» նախագահը: Անկուսակցական է, ունի 2 երեխա:
