հինգշաբթի, 6 հոկտեմբերի 2011
Անվանի արվեստագետի մահվան կապակցությամբ ստեղծվել է կառավարական հանձնաժողով
ՀՀ ժողովրդական արտիստ Վանուշ Խանամիրյանի մահվան կապակցությամբ ցավակցական ուղերձ է հղել վարչապետ Տիգրան Սարգսյանը, որում, մասնավորապես, ասվում է. «Խոր վշտով տեղեկացա անվանի արվեստագետ, պարարվեստի երախտավոր Վանուշ Խանամիրյանի մահվան մասին:
Վանուշ Խանամիրյանը մեկն էր այն քչերից, ում մեծությունը մեր ժողովուրդն ընդունում էր անվերապահորեն: Դա պատահական չէ, քանզի Խանամիրյանն իր վառ տաղանդով, անմնացորդ նվիրումով և անսպառ էներգիայով աշխարհի համար բացահայտեց հայկական պարարվեստը, այն դարձրեց ճանաչելի ու գնահատված:
Երկար կարելի է թվարկել մեծ վարպետի կոչումներն ու արժանիքները, ով մեր ժողովրդի հիշողության մեջ կմնա ոչ միայն որպես շռայլորեն օժտված արվեստագետ, այլև մշակույթի կազմակերպիչ, օրինակելի քաղաքացի և կենսախինդ ու դրական լիցքեր ճառագող նահապետ: Թերևս նրա կյանքի ու գործի լավագույն գնահատականը այն համաժողովրդական սերն է, որ վայելում էր Վանուշ Խանամիրյանը:
Հայաստանի Հանրապետության Կառավարության և անձամբ իմ անունից ցավակցակցում եմ Վանուշ Խանամիրյանի ընտանիքի անդամներին, հարազատներին, սաներին և նրա արվեստի բոլոր երկրպագուներին»:
***
ՀՀ վարչապետ Տիգրան Սարգսյանի որոշմամբ Հայաստանի Հանրապետության ժողովրդական արտիստ Վանուշ Խանամիրյանի մահվան կապակցությամբ ստեղծվել է կառավարական հանձնաժողով ՀՀ մշակույթի նախարար Հասմիկ Պողոսյանի գլխավորությամբ:
