երեքշաբթի, 9 դեկտեմբերի 2003
ՀՀ վարչապետ Անդրանիկ Մարգարյանն այսօր ընդունել է Հայաստանում Եգիպտոսի Արաբական Հանրապետության նորանշանակ արտակարգ և լիազոր դեսպան Աբլա Մոհամեդ Աբդ Էլ-Ռահման Օսմանին:
Վարչապետը շնորհավորել է դեսպանին մեր երկրում իր դիվանագիտական առաքելությունն սկսելու կապակցությամբ:
Զրույցի ընթացքում կողմերը նշել են Հայաստանի և Եգիպտոսի միջև քաղաքական հարաբերությունների բարձր մակարդակը, ընդգծելով, որ դրանք հաջողությամբ զարգանում են ինչպես երկկողմ, այնպես էլ բազմակողմ հիմքի վրա՝ միջազգային կազմակերպությունների, մասնավորապես, ՄԱԿ-ի շրջանակներում: Նրանք Հայաստանի և Եգիպտոսի համագործակցությունը կարևոր են համարել նաև Եգիպտոսի արտգործնախարարության՝ ԱՊՀ երկրների հետ տեխնիկական գործակցության հիմնադրամի շրջանակում:
Վարչապետ Անդրանիկ Մարգարյանը և Եգիպտոսի դեսպանը նշել են նաև երկու երկրների միջև տնտեսական կապերի հետագա խորացման անհրաժեշտությունը, ինչի համար, ըստ նրանց, արդեն իսկ լավ նախադրյալներ են ստեղծված: Այդ գործում նրանք կարևորել են հայ-եգիպտական միջկառավարական համատեղ հանձնաժողովի դերը, որի հերթական նիստը նախատեսվում է անցկացնել 2004թ. Կահիրեում:
Որպես երկկողմ համագործակցության հեռանկարային ոլորտներ, կողմերը նշել են նաև առողջապահության՝ մասնավորապես դեղագործության, գիտության, կրթության և մշակույթի բնագավառները:
Հանդիպման ավարտին վարչապետը հաջողություններ է մաղթել նորանշանակ դեսպանին՝ հույս հայտնելով, որ առաջիկա տարիներին նրա գործունեությունը կնպաստի հայ-եգիպտական համագործակցության հետագա զարգացմանը:
