երեքշաբթի, 25 նոյեմբերի 2003
ՀՀ վարչապետ Անդրանիկ Մարգարյանն այսօր ընդունել է Հայաստանում Բահրեյնի Թագավորության նորանշանակ արտակարգ և լիազոր դեսպան Քամալ Սալեհ Աս Սալեհին (նստավայրը՝ Թեհրան):
Շնորհավորելով դեսպանին մեր երկրում իր դիվանագիտական առաքելությունն սկսելու կապակցությամբ՝ վարչապետը հույս է հայտնել, որ լինելով Բահրեյնի Թագավորության առաջին դեսպանը Հայաստանում, պարոն Քամալ Սալեհ Աս Սալեհին իր աշխատանքով ամուր հիմք և լավ նախապայմաններ կստեղծի երկու երկրների հարաբերությունների զարգացման, փոխադարձ շփումների ակտիվացման համար: Կառավարության ղեկավարը նշել է, որ արաբական երկրների՝ այդ թվում Բահրեյնի Թագավորության հետ բազմաբնույթ հարաբերությունների զարգացումը Հայաստանի արտաքին քաղաքականության կարևոր ուղղություններից է: Անդրանիկ Մարգարյանն ընդգծել է, որ Հայաստանը շահագրգռված է մերձավորարևելյան տարածաշրջանում խաղաղության և կայունության հաստատմամբ, արաբա-իսրայելական հակամարտության և իրաքյան խնդրի կարգավորմամբ, ինչը, ըստ նրա, պայմանավորված է նաև այդ երկրներում մեծաթիվ հայկական համայնքների գոյությամբ:
Դեսպանը ՀՀ վարչապետ Անդրանիկ Մարգարյանին է փոխանցել իր երկրի վարչապետի ջերմ ողջույնները: Նա կարծիք է հայտնել, որ հայ-արաբական հարաբերությունները պատմական ու մշակութային կապերի մեծ ավանդույթներ ունեն և Հայաստանում Բահրեյնի Թագավորության դեսպանության գործունեությունը կնպաստի երկու երկրների և ժողովուրդների միջև գոյություն ունեցող հարաբերությունների առավել խորացմանը:
Զրույցի ընթացքում հայ-բահրենյան հարաբերությունների զարգացման համար կողմերը կարևորել են, մասնավորապես, երկու երկրների միջև իրավապայմանագրային դաշտի ձևավորման, փոխայցելությունների կազմակերպման, միմյանց ներդրումային հնարավորություններն ուսումնասիրելու նպատակով՝ համատեղ գործարար համաժողովների անցկացման, բանկային ոլորտում համագործակցության, համատեղ ձեռնարկությունների ստեղծման հնարավորությունների քննարկման անհրաժեշտությունը: Անդրադարձ է եղել նաև գիտական ու մշակութային ոլորտներում երկկողմ համագործակցությունն ակտիվացնելուն:
Հանդիպման ավարտին վարչապետ Անդրանիկ Մարգարյանը հաջողություններ է մաղթել նորանշանակ դեսպանին՝ մեր երկրում իր դիվանագիտական առաքելությունն իրականացնելու գործում:
