հինգշաբթի, 14 հուլիսի 2011
Վարչապետն այցելել է Ֆրանսիայի դեսպանատուն
Վարչապետ Տիգրան Սարգսյանն այսօր, Ֆրանսիայի Ազգային տոնի առթիվ, այցելել է Հայաստանում Ֆրանսիայի դեսպանատուն և մասնակցել տոնական ընդունելությանը: Գործադիրի ղեկավարը ազգային տոնի կապակցությամբ կառավարության անունից շնորհավորել է դեսպանատան աշխատակազմին, և նշել, որ Ֆրանսիայի ազգային տոնն այն բացառիկ տոներից է, որ նշվում է ոչ միայն Ֆրանսիայում, այլ տարբեր պետություններում, հաշվի առնելով այն մեծ խորհուրդը, որ նա իր մեջ կրում է: «Ազատության, արդարության, հավասարության, ժողովրդավարության համար մղվող պայքարում Ֆրանսիայի ազգային տոնը ոգևորում է նաև ժամանակակից աշխարհի առաջադեմ բոլոր մարդկանց: Այդ արժեքները կրող հասարակությունների, նաև մեզ համար Ֆրանսիայի ազգային տոնի խորհուրդը առաջնորդում իրականացնել ժողովրդավարական բարեփոխումներ»: Անդրադառնալով հայ-ֆրանսիական հարաբերություններին, վարչապետը նշել է, որ դրանք ունեն խորը արմատներ: Սակայն ավելի կարևոր է հայ-ֆրանսիական բարեկամական հարաբերությունների ապագան: Վարչապետի համոզմամբ՝ մեր երիտասարդ պետությունը, որ այս տարի նշելու է իր անկախության 20 ամյակը, Ֆրանսիայի հետ համագործակցության շնորհիվ ունենալու է նորանոր ձեռքբերումներ տնտեսական, սոցիալական, քաղաքական բնագավառներում:
