երեքշաբթի, 4 նոյեմբերի 2003
Այսօր ՀՀ վարչապետ Անդրանիկ Մարգարյանն ընդունել է ՌԴ անվտանգության խորհրդի քաղտուղար Վլադիմիր Ռուշայլոյին և նրա գլխավորած պատվիրակությանը: Ընդգծելով հայ և ռուս ժողովուրդների դարավոր բարեկամության վրա հիմնված երկու պետությունների միջև տարեցտարի ընդլայնվող և ամրապնդվող համագործակցությունը՝ ՀՀ վարչապետը և ՌԴ անվտանգության խորհրդի քարտուղարը նշել են, որ դրան մեծապես նպաստում է նաև ձևավորված անհրաժեշտ նորմատիվա-իրավական դաշտը: Այն, ըստ զրուցակիցների, հնարավորություն է տալիս զարգացնել փոխգործակցությունը ինչպես քաղաքական, այնպես էլ տնտեսական, ռազմա-տեխնիկական և մի շարք այլ ոլորտներում: Երկկողմ հարաբերություններից բացի, բավականին ակտիվ և արդյունավետ է գնահատվել նաև Հայաստանի և Ռուսաստանի համագործակցությունը ԱՊՀ-ի, Հավաքական անվտանգության պայմանագրի, «Կովկասյան քառյակի» շրջանակներում, ինչպես նաև միջազգային տարբեր ատյաններում: Նշելով, որ Հայաստանի և Ռուսաստանի միջև այս տարի ապրանքաշրջանառության ծավալները որոշակիորեն աճել են, ՀՀ վարչապետ Անդրանիկ Մարգարյանն ու ՌԴ անվտանգության խորհրդի քաղտուղար Վլադիմիր Ռուշայլոն կարևորել են Տնտեսական համագործակցության հարցերով միջկառավարական հանձնաժողովի աշխատանքը, որը մինչ օրս 5 նիստ է անցկացրել, չհաշված հանձնաժողովի համանախագահների բազմաթիվ աշխատանքային հանդիպումները: Վլ. Ռուշայլոն հույս է հայտնել, որ հանձնաժողովի ռուսական կողմի համանախագահ Իլյա Կլեբանովի այլ աշխատանքի անցնելուց հետո, հանձնաժողովի նոր նախագահի նշանակումը շատ չի ուշանա և միջկառավարական հանձնաժողովը նույնպիսի ջանադրությամբ կշարունակի աշխատանքը, քանի որ տնտեսական բնագավառում բազմաթիվ անելիքներ կան: Պրն Ռուշայլոն ՀՀ վարչապետին տեղեկացրել է, որ իր այցի ընթացքում նախատեսում է հայ գործընկերոջ հետ ստորագրել 2004 թ. համատեղ գործունեության աշխատանքային պլանը:
Հանդիպման ավարտին փաստելով, որ բազմաթիվ կարևորագույն հիմնախնդիրների շուրջ Հայաստանի և Ռուսաստանի դիրքորոշումները մոտ են միմյանց կամ համընկնում են, զրուցակիցները նշել են, որ համատեղ ուժերով և տարածաշրջանի մյուս երկրների հետ համագործակցելով միայն հնարավոր կլինի հասնել այդ հիմնախնդիրների լուծմանն ու կայունության հաստատմանը: ՀՀ վարչապետն ու ՌԴ անվտանգության խորհրդի քաղտուղարը հանդիպման ընթացքում անդրադարձել են քաղաքական ու տնտեսական մի շարք այլ հարցերի ևս:
