Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու
Ներքին և արտաքին ազդարարման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Պաշտոնական էլ. փոստ

(միայն www.e-citizen.am համակարգով ծանուցումների համար)

Էլ. կառավարում

Պաշտոնական լրահոս

ուրբաթ, 13 մայիսի 2011

Վարչապետ Տիգրան Սարգսյանի ելույթը ՀՀ Ազգային ժողովում՝ Հայաստանի Հանրապետության 2010 թվականի պետական բյուջեի կատարման տարեկան հաշվետվության ժամանակ

Ազգային ժողովի հարգելի նախագահ,
Հարգելի պարոն նախագահող,
Հարգելի գործընկերներ,

Ավանդաբար պետական բյուջեի հաշվետվությունը ներկայացնելիս վարչապետը ներկայացնում է ընդհանուր բնութագրիչները, և ինչ միջավայրում է իրականացվել բյուջեի կատարողականը: Մինչև բուն առարկային անցնելը, ես ցանկանում եմ անդրադառնալ երեկվա Վերահսկիչ պալատի հաշվետվությանը: Ցավոք սրտի, մենք չենք օգտվել հարակից զեկույցով հանդես գալու մեր իրավունքից: Մեղավորները կպատժվեն, որ մեզ տեղյակ չեն պահել, որ մենք այդ իրավունքից օգտվենք, քանի որ մենք չափազանց կարևորում ենք Վերահսկիչ պալատի կողմից կատարված աշխատանքները, և այն բացահայտումները, որոնք առկա են, և ես այսօր էլ կանդրադառնամ այդ հարցին` լրացնելով այն բացը, որ երեկ արձանագրեց Ազգային ժողովի նախագահը և պատգամավորները, ովքեր մասնակցում էին այդ քննարկմանը:
Ըստ մեզ` 2010 թվականի իրականացրած ծրագրերի ամենազգալի արդյունքը կայանում է նրանում, որ այն հակաճգնաժամային միջոցառումները, որ մենք իրականացրել էինք 2009-2010 թվականների ընթացքում, սկսեցին տալ իրենց դրական արդյունքները: 2010 թվականը կարելի է բնութագրել որպես աստիճանաբար, բայց կայուն վերականգման տարի, որի ընթացքում մենք շարունակեցինք աշխատել շատ պարզ և հասկանալի հակաճգնաժամային ծրագրի տրամաբանության ներքո: Մասնավորապես, էապես բարելավել ենթակառուցվածքները` կատարելով մեծածավալ պետական ներդրումներ: Երկրորդը` բարելավել բիզնես միջավայրը և առավել բարենպաստ պայմաններ ստեղծել փոքր և միջին բիզնեսի համար, ինչպես նաև խթանել կոնկրետ ծրագրեր, որոնք բերելու են մեր տնտեսության դիվերսիֆիկացիայի աստիճանի բարձրացմանը:
Այդ տեսակետից ես կցանկանայի անդրադառնալ մակրոտնտեսական ցուցանիշներին, որ մենք արձանագրեցինք 2010 թվականի ընթացքում:
Այսպես` համախառն ներքին արդյունքի աճը ծրագրավորված 1.2 տոկոսի փոխարեն կազմեց 2.1 տոկոս, ընդ որում` չափազանց կարևոր է համախառն ներքին արդյունքի կառուցվածքը` մասնավորապես արդյունաբերությունում մենք արձանագրեցինք 10.5 տոկոս աճ, մշակվող արդյունաբերությունում` 13.6 տոկոս աճ, հանքարդյունաբերությունում` 19.1 տոկոս աճ:
Երկրորդ խոշոր ոլորտը, որ աճ էր ապահովել, ծառայությունների ոլորտն է, որն ապահովել է 4.5 տոկոս աճ: Հասկանալի է, որ մակրոտնտեսական ցուցանիշները կլինեին ավելի բարվոք, և ՀՆԱ-ի ցուցանիշը կրկնակի անգամ կլիներ ավելի բարձր, եթե գյուղատնտեսության ոլորտում մենք չունենայինք աննախադեպ անկում` 15.7 տոկոս, որը պայմանավորված էր այլ հանգամանքների հետ միասին նաև բնակլիմայական պայմաններով: Միևնույն ժամանակ մակրոտնտեսական ցուցանիշների տեսակետից մենք տեսնում ենք, որ էապես բարելավվում են արտահանման ցուցանիշները, և մեր առևտրի հաշվեկշիռը շուրջ 1.3 տոկոսով բարելավվել է ի հաշիվ նրա, որ արտահանման տեմպերը գերազանցել են ներմուծման աճի տեմպերին, ինչպես նաև բարելավվել է ընթացիկ հաշիվը` 15.8 տոկոս ճեղքվածքից` հասնելով 13.9 տոկոսի, որն էական նշանակություն ունի, ինչպես նաև բարելավվել է ընթացիկ հաշիվը` 16.8 տոկոսից ճեղքվածքը իջել է 14.7 տոկոսի: Սրանք դրական միտումներ են, որոնք մենք պետք է պահպանենք մոտակա երեք տարիների ընթացքում, որպեսզի նաև բյուջեի պակասուրդը նվազի` հասնելով մեր ծրագրային ցուցանիշներին: Այդ տեսակետից մենք նույնպես պետք է արձանագրենք, որ բյուջեի դեֆիցիտը 7.7 տոկոսային կետից 2010 թվականին էապես նվազել է և կազմել է 5 տոկոս: Ճշգրտված ցուցանիշներով, քանի որ Ազգային վիճակագրական ծառայությունը ճշգրտել է մակրոտնտեսական բոլոր ցուցանիշները, 2009 թվականի պետական բյուջեի դեֆիցիտը համախառն ներքին արդյունքի մեջ կազմել է 7.6 տոկոս, իսկ 2010 թվականի արդյունքներում կազմել է 5 տոկոս: Սա նշանակում է, որ արտաքին պարտքի սպասարկման տեսակետից և մակրոտնտեսական ցուցանիշներ ապահովելու տեսակետից մենք հայտնվելու ենք ավելի բարվոք միջավայրում:
2010 թվականին պետական բյուջեի եկամուտները կազմել են 780 մլրդ դրամ, ինչը գերազանցում է 2009 թվականի ցուցանիշը 13 %-ով, իսկ ծախսային մասը գերազանցել է 2009 թվականի նույնանուն ցուցանիշը մոտ 3%-ով: Սա կարևոր ցուցանիշ է մեզ համար, քանի որ դուք հիշում եք, որ 2009թ. մենք պետբյուջեի ծախսերը ֆինանսավորելու համար աննախադեպ մեծ ծավալի պարտքեր ներգրավվեցինք, որպեսզի ի վիճակի լինենք չկրճատելու պետբյուջեի ծախսերը, իսկ 2010թ. արդեն հիմնականում ծախսերը կատարվել են մեր եկամուտների հաշվին և բյուջեի դեֆիցիտի կրճատման պայմաններում այնամենայնիվ մենք կարողացել ենք շուրջ 3 տոկոսով ավելացնել մեր ծախսերը:
2010 թվականի վերջին գնաճի մակարդակը կազմել է 9.4%, որի պայմանավորող հիմնական գործոնները երկուսն են` հիմնական պարենային և հումքային ապրանքների միջազգային գների բարձրացումը և նախորդ տարի գյուղատնտեսական ապրանքների առաջարկի աննախադեպ անկման հետևանքով վերջիններիս բարձր գների պայմանները: Նշված գնաճի 5 տոկոսային կետը եղել է ի հաշվի գյուղմթերքների գների աճի, իսկ 2.4 տոկոսային կետը` ներմուծվող ապրանքների գների աճի:
2010 թվականին մենք շարունակեցինք զարգացնել ենթակառուցվածքները և բարելավել գործարար միջավայրը: Մասնավորապես.
• 2010 թվականի ընթացքում կատարվել են շուրջ 350 կմ երկարությամբ ճանապարհահատվածների վերանորոգման աշխատանքները, այդ թվում` 224 կմ-ը` ներգրավված վարկային միջոցների հաշվին, իսկ 126 կմ պետական բյուջեի ֆինանասավորմամբ:
• 2010 թվականին հիմնանորոգվել են 8 կամուրջներ: Այդ թվում պահուստային ֆոնդի միջոցներով իրականացվել են բնածին և տեխնածին աղետների հետևանքով վնասված 44 ճանապարհահատվածների վերականգնման, ինչպես նաև 9 ճանապարհահատվածների և 5 կամուրջների հիմնանորոգման աշխատանքներ՝ շուրջ 5.6 միլիարդ դրամի չափով:
• 2010 թվականի ընթացքում կառուցվել և վերանորոգվել են 901 կմ խողովակաշարեր, սա աննախադեպ ծավալ է կազմում, որից խմելու ջրի ջրագծերը կազմում են 697 կմ, կոյուղու կոլեկտորները` 23 կիլոմետր (5 քաղաքներում), իսկ ոռոգման ջրանցքներ և ջրատարները` 181 կմ:
• 2010 թվականին կատարվել են դրենաժների մաքրման և խորացման աշխատանքները ընդհանուր 346 կմ երկարությամբ:
• Ճապոնիայի կառավարության վարկի հաշվին 2010թ, շահագործման է հանձնվել Երևանի ՋԷԿ-ը:
• ՀՀ կառավարության և Ճապոնիայի միջազգային համագործակցության գործակալության միջև կնքված պայմանագրի համաձայն` 2010թ. սեպտեմբերին ամբողջությամբ ավարտվել են թվով 17 110 կՎ ենթակայանների վերականգնման աշխատանքները:
• 2010թ. ապահովվել է 3G ստանդարտով գործող համակարգերի՝ շահագործումը, որոնք ծածկում է Հանրապետության ողջ տարածքի ծածկույթը: Ինչպես նաև առաջին անգամ Հայաստանի Հանրապետությում գործարկվել են 4G ստանդարտի կապի տեխնոլոգիաներ:
• 2010 թվականի ընթացքում արագագործ ինտերնետի միջինացված մանրածախ սակագները գրեթե կրկնակի նվազել են: Ինտերների մեծածախ սակագները կրճատվել են ավելին, քան 2 անգամ՝ կազմելով 71000 դրամ և այս միտումը շարունակվում է նաև այս տարի: Ինտերնետից օգտվողների ընդհանուր թվաքանակը (ներառյալ նաեւ բջջային հեռախոսների միջոցով օգտվողները) 2010 թվականին կազմել է 1,5 միլիոն, իսկ լայնաշերտ ինտերնետի բաժանորդների քանակը աճել է գրեթե 2.5 անգամ կազմելով 173 հազար:
• Ինտերնետը 2010թ. հասանելի է դարձել ևս 300 դպրոցում: Ընդհանուր առմամբ, այսօր ՀՀ 944 դպրոց արդեն ապահովված է ինտերնետի մուտքով:
• ՀԲ-ի վարկային ծրագրի շրջանակներում 2009-2010թթ. ընթացքում իրականացվել են 8 մարզային բժշկական կենտրոնի արդիականացման, հիմնովին վերանորոգման, նորագույն բժշկական սարքավորումներով և կահույքով հագեցման աշխատանքներ, ավարտվել են 5 բժշկական կենտրոնների մասնաշենքերի հիմնանորոգման աշխատանքները, ավարտին են մոտենում Ապարանի բժշկական կենտրոնի հիմնանորոգման աշխատանքները: 2010թ. սկսվել և ընթացքի մեջ են Գավառի բժշկական կենտրոնի ծննդատան շենքի հիմնանորոգման և Գյումրիի նոր բժշկական կենտրոնի կառուցման աշխատանքները:
• 2010թ. ընթացքում գյուղական համայնքներում կառուցվել են 10 նոր և վերանորոգվել 20 համայնքային ամբուլատորիա, ինչպես նաև տրամադրվել են ժամանակակից բժշկական սարքավորումներ:
Ընդհանուր առմամբ, մարզային հիվանդանոցային համակարգում 2009-2010թթ. ընթացքում իրականացվել են շուրջ 17 մլն ԱՄՆ դոլարի ներդրումներ, որից 4,4 մլն ԱՄՆ դոլարի ներդրումները՝ նորագույն բժշկական սարքավորումների և կահույքի մասով:
• Երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով աղետի գոտու բնակարանային շինարարության ծրագրի շրջանակներում ավարտվել են` Գյումրի քաղաքում` 1056 բնակարաններից բաղկացած 22 բազմաբնակարան շենքերի աշխատանքները: Սպիտակ քաղաքում հանձնվել են շահագործման` 220 բնակելի տներ, իսկ ՀՀ Լոռու մարզի գյուղական բնակավայրերում կառուցվել են 303 բնակելի տներ: Դրա հետ մեկտեղ սկսվել է Գյումրի քաղաքում 1756 բնակարաններից բաղկացած 38 բազմաբնակարան շենքերի և Լոռու մարզի գյուղական բնակավայրերում 375 բնակելի տների շինարարությունը:
• ՀՀ 2010 թվականի բյուջեի հաշվին՝ 5.3 մլրդ դրամ գումարի շրջանակներում իրականացվել են 154 օբյեկտների կառուցման և հիմանորոգման աշխատանքներ:

Գործարար միջավայրի բարելավման բնագավառում.

• 2010 թվականին պարզեցվել են բիզնեսի գրանցման ընթացակարգերը, համաձայն որոնց, հիմնադրման ընթացակարգերի իրականացումը կրճատվել է նախկինում 20 օրվա փոխարեն հասնելով մինչև 5 օրվա: Եթե նախկինում անհրաժեշտ էր այցելել 6 մարմին ֆիրման գրանցելու համար, ապա այսօր բավական է այցելել համացանցի www.e-register.am կայքը և գրանցել իրավաբանական անձ /անհատ ձեռներեցի դեպքում՝ հաշվառել ֆիզիկական անձ/ ընդհամենը 15 րոպեի ընթացքում:
• Բիզնեսի բեռի թեթևացման նպատակով կառավարությունը երկարաձգել է 2009 թվականին ընդունված այն որոշումը մինչև 70 մլն. դրամ շրջանառություն ունեցող ձեռնարկատիրական գործունեությամբ զբաղվող տնտեսվարող սուբյեկտների մոտ տեսչական ստուգումները արգելում է: Արդյունքում, եթե 2008 թվականին վերջին 2 եռամսյակների տվյալներով պետական մարմինները կազմակերպել են 15,663 ստուգում, ապա 2010 թվականի նույն ժամանակաշրջանի ընթացքում իրականացվել է ընդհամենը 331 ստուգում: Ակնհայտ է, որ այս միջոցառման հետևանքով էականորեն կրճատվել են կոռուպցիոն ռիսկերը, որոնք հատկապես վնաս են հասցնում փոքր և միջին բիզնեսին:
• Քայլեր են ձեռնարկվել նաև արտաքին առևտրով զբաղվելու ընթացակարգերի պարզեցման ուղղությամբ: Իրականացվել են մի շարք օրենսդրական փոփոխություններ, որոնց հետևանքով պարզեցվել է արտահանվող` երկակի նշանակության ապրանքների համար համապատասխան փորձագիտական տեղեկանք տալու ընթացակարգը. կրճատվել են փորձագիտության ժամկետը 1 ամսից դառնալով առավելագույնը 10 օր, ինչպես նաև կրճատվել է փորձաքննության վճարը՝ 180000 դրամից դառնալով 60000 դրամ:
• Լիցենզավորման ենթակա գործունեության տեսակների կրճատման, պարզեցման և հստակեցման միջոցառումների արդյունքում նախկինում գործող 169 կետից կազմված ցուցակը ներկայումս պարունակում է 96 լիցենզավորման ենթակա գործունեության տեսակ: Պարզեցվել է նաև լիցենզավորման ենթակա գործունեությամբ զբաղվելու համար լիցենզիաներ ստանալու գործընթացը` շնորհիվ ներմուծված էլեկտրոնային համակարգի, որը կհեշտացնի անհրաժեշտ փաստաթղթերի ներկայացումը:
• Օրենսդրական բարեփոխումների արդյունքում շահութահարկի գծով տարեկան վճարումները կրճատվել են 8-ով, նույնքանով կրճատվել են նաև պարտադիր սոցիալական ապահովության վճարների հաշվետվությունները: Եթե նախկինում շահութահարկ վճարող իրավաբանական անձիք ներկայացնում էին հաշվապահական հաշվեկշիռ, շահութահարկի և ֆինանսական արդյունքների մասին հաշվետվություններ, ապա ներկայումս նրանք ներկայացնելու են միայն հարկային մարմնի կողմից հաստատված շահութահարկի հաշվետվություն:
• ֆիզիկական անձանց կողմից մաքսային սահմանով միջազգային փոստային և սուրհանդակային ծառայություններով փոխադրվող ապրանքների տեղափոխման դեպքում մաքսատուրքից ազատման արտոնությունը կիրառվում է 150 հազար դրամ մաքսային արժեքը չգերազանցող ապրանքների նկատմամբ` նախկին 50 հազար դրամի փոխարեն:
• Միասնականացվել են հարկային հաշվետվությունների ներկայացման ժամկետները, հաստատագրված վճարներ վճարողները դադարել են հարկային մարմիններին ներկայացնել հաշվապահական հաշվեկշիռ և ֆինանսական արդյունքների մասին հաշվետվություն, որի փոխարեն ներկայացնում են միայն շահութահարկի հաշվարկ: Ընդունվել է օրենքում փոփոխություն, որի համաձայն անհատ ձեռնարկատեր չհանդիսացող ֆիզիկական անձանց կողմից իրավաբանական անձանց կանոնադրական կամ բաժնետիրական կապիտալում գույքի ներդրման գործարքները ազատվում են ԱԱՀ-ից:
• Ներդրվել է էլեկտրոնային հարկային հաշվետվությունների ներկայացման համակարգը, որը արդեն հնարավորություն է տալիս 27 տեսակի հաշվետվություններ ներկայացնել էլեկտրոնային տեսքով: Այս ամենը նվազագույնի է հասցնում հարկատու-հարկային տեսուչ ֆիզիկական շփումը` նվազեցնելով կոռուպցիոն ռիսկերը:
• Պարզեցվել է սպառողական կոոպերատիվների հիմնադրման գործընթացը, որի արդյունքում գյուղացիական տնտեսությունները հնարավորություն են ստացել ստեղծել կոոպերատիվներ առավել հարմար պայմաններով և վերացվել են նախկինում օրենսդրությամբ սահմանված խոչընդոտները: Սահմանվել է արոտավայրերից և խոտհարքերից օգտվելու նոր կարգը, որի արդյունքում գյուղացիները ազատվել են չորս տեսակի վճարումներից, և նրա բեռը շուրջ 250 հազար դրամով կրճատվել է:
• Շինարարական թույլտվությունների ստացման ոլորտում իրականացված բարեփոխումների շնորհիվ նախկինում պահանջվող 200 օրվա փոխարեն այսօր արդեն անհրաժեշտ է ընդհամենը 53 օր, իսկ այս թույլտվություններ հետ կապված տարբեր տիպի պարտադիր վճարները կրճատվել են 4 անգամ: Հասկանալի է, որ այս փոփոխությունների արդյունքները մենք կզգանք նաև 2011թ. ընթացքում:

Տնտեսության իրական հատվածում.

300 մլն դրամի և ավելի սարքավորումների ներմուծման ժամանակ ավելացված արժեքի հարկի վճարման մինչև 3 տարի ժամկետով հետաձգման ռեժիմից այս պահին օգտվում են 14 ընկերություններ: 2010 թվականին 6 ընկերություններ ստացել են նմանատիպ արտոնություն, և 15 մլրդ դրամի ներդրումներ են կատարվել միայն այս ծրագրերի շնորհիվ: Այս պահի դրությամբ՝ ընդհանուր ներդրումների ծավալը 58 մլրդ դրամ է, և ստեղծվել են շուրջ 1400 լրացուցիչ աշխատատեղեր:
• 7 տարվա դադարից հետո առաջին անգամ «ՀՀ-ում 2010-2014թթ. ցորե¬նի սերմնաբուծության և սերմար¬տադրության զարգացման ծրագիրի» շրջանակներում ՌԴ-ից գնվել է 1010 տոննա, իսկ տեղական սերմար¬տադրողներից՝ 117 տոննա աշնանացան ցորենի էլիտային վերարտադրության սերմացու: Սերմացուները տրամադրվել են այն տնտեսություններին, որոնք զբաղվելու են սերմաբուծությամբ և այդ սերմերը վերադարձնելու են 1:2 փոխ¬հարա¬բերությամբ: Հետագայում ստացված ցորենը նույնպես օգտագործվելու է սերմաբուծության զարգացման համար:
• Տավարաբուծության զարգացման ծրագրի շրջանակներում 2010թ. արտերկրից ներկրվել են 262 գլուխ կաթնատու և կաթնամսատու տոհմային երինջներ: Ներկրված առանձին կենդանիների կաթնատվությունը արդեն իսկ կազմում է 8-9 հազար լիտր, ինչը 4-5 անգամ գերազանցում է տեղական կովերի կաթնատվությունը:
Այս ծրագրի շրջանակներում արդեն ներկրվել են 1222 գլուխ տոհմային երինջներ, ՀՀ-ում ձևավորվել են 14 նոր տոհմային տնտեսություններ, ստացվել է ավելի քան 1100 գլուխ տոհմային մատղաշ:
• 2010 թվականի ընթացքում արտահանվեց շուրջ 135 հազ. գլուխ ոչխար, որոնց մաքսային արժեքը գերազանցեց 2009 թվականի ցուցանիշը շուրջ 56%-ով և կազմեց մոտավորապես 14 մլն դոլար:
• 2010 թվականին թարմ և սառեցված ձկնեղենի արտահանումը ՌԴ ավելի քան կրկնապատկվել է՝ կազմելով շուրջ 400 տոննա: Ընդ որում, ծրագրերը, որոնք իրականացվում են այս ոլորտում բերելու են նաև այս ցուցանիշի կրկնապատկում 2011-2012թթ. ընթացքում, քանի որ ոլորտում կատարվում են մեծածավալ ներդրումներ և շուկաների բացվելը մեզ համար ստեղծեց այդ հնարավորությունը: Այս բնագավառում ներդրումները դարձել են շահավետ:
• Օրգանական գյուղատնտեսության զարգացման նպատակով կազմակերպվել է «Ազոտովիտ-1» և «Ազոցեովիտ-1» կենսապարարտանյութերի արտադրությունը: Եվ ՀՀ կառավարությունը հավանության է արժանացրել ազգային կենսապարարտանյութի արտադրության ծրագիրը, որը ենթադրում է, որ փուլ առ փուլ մենք ի վիճակի կլինենք սելիտրայից անցնելու մեր ազգային պարարտանյութերի օգտագործմանը: Դրա համար բյուջեից հատկացվել են միջոցներ:
• «Մատչելի բնակարան երիտասարդ ընտանիքներին» ծրագրի շրջանակներում Երևան քաղաքում բնակարան ձեռք բերելու համար տրամադրվող հիպոտեքային վարկի տոկոսը կազմում է 8.5-ից 9 տոկոս, իսկ մարզերում` 6.5-ից 7 տոկոս, ինչը զգալիորեն ավելի ցածր է քան առևտրային բանկերի կողմից տրամադրվող հիփոտեքային վարկերի տոկոսադրույքները: 2010թ. մարզերի բնակչության համար կրճատվել է նաև կանխավճարի ծավալը, և այն այսօր կազմում է ընդամենը 10 տոկոս:

Հարգելի գործընկերներ,

Ամփոփելով, բյուջեի հատվածը, հարկ եմ համարում ընդգծել Ազգային Ժողովի նշանակալի դերը վերոհիշյալ միջոցառումների արդյունավետ իրականացման գործում, քանի որ առանց Ազգային ժողովի օրենսդրական աջակցության և նախաձեռնողական ակտիվ մասնակցության հնարավոր չէր լինի կյանքի կոչել մեր նախագծերը:

Այժմ ես կցանկանայի անդրադառնալ Վերահսկիչ պալատի երեկվա հաշվետվությանը, որը նույնպես առնչվում է կառավարության 2010 թվականի գործունեության միջոցառումների ծրագրին: Վերահսկիչ պալատի աշխատանքների առանձնահատկությունը կայանում է նրանում, որ կառավարությունը, Հանրապետության Նախագահի նախընտրական ծրագրի կարևորագույն դրույթների հիման վրա, որդեգրել է այն քաղաքականությունը, որ մենք ինքներս բացահայտելու ենք մեր պրոբլեմները, և այդ պրոբլեմները բացահայտելու այս մոտեցումն այն երաշխիքն է, որ մենք կարողանալու ենք հաղթահարել այն բացասական երևույթները, որոնք այսօր առկա են Հայաստանի Հանրապետությունում: Մասնավորապես, ես ուզում եմ անդրադառնալ սոցիալական ոլորտում ստեղծված իրավիճակին և ներկայացնել, թե ինչու ենք մենք ձեռնամուխ եղել այս խնդիրներով զբաղվելուն: Ինչպես իր ելույթում նշեց Վերահսկիչ պալատի նախագահը, այս գործառույթներն սկսել ենք Հայաստանի Հանրապետության Նախագահի հանձնարարականի հիման վրա, և դեռևս 2010թ. մենք կայացրեցինք քաղաքական որոշում այն մասին, որ Սոցիալական ապահովության պետական ծառայության վճարման ծառայությունը պետք է լուծարենք, և այդտեղից էլ սկսվեց այս ամբողջ պատմությունը, երբ այդ լուծարման գործընթացում սկսվեցին փուլ առ փուլ բացահայտվել բոլոր կոռուպցիոն երևույթները: Այդ կոռուպցիոն երևույթները բացահայտվելու պարագայում Հանրապետության Նախագահի կողմից տրվեց հանձնարարական Վերահսկիչ պալատին և կառավարությանը` սկսել այս բնագավառում ստեղծված իրավիճակի լայնածավալ ուսումնասիրություններ: Այդ ուսումնասիրությունները բացահայտեցին այն երևույթները, որոնց մասին երեկ բավական մանրակրկիտ իր զեկույցում խոսեց Վերահսկիչ պալատի նախագահը: Ինչպես նաև Վերահսկիչ պալատի նախագահը ներկայացրեց, որ այդ աշխատանքները շարունակվում են այսօր ֆինանսների նախարարության աուդիտի կողմից, Երևան քաղաքի արդյունքներն ամփոփված են և ներկայացված են դատախազություն. 500 էջից ավելի փաստաթղթեր են, որտեղ բացահայտված են այս բոլոր երևույթները, և համոզված ենք, որ դատախազությունն այս բոլոր բացահայտումների առումով արդյունավետ կկազմակերպի իր աշխատանքները: Միևնույն ժամանակ մենք 3 ամսվա ընթացքում պետք է ամփոփենք Հայաստանի Հանրապետությունում ստեղծված իրավիճակը: Խոսքն առաջին փուլում գնում է թոշակների վճարումների մասին, երկրորդ փուլում` սոցիալական նպաստների մասին: Այսօր արդեն իսկ ՀՀ աշխատանքի և սոցիալական հարցերի նախարարության կողմից կատարված աշխատանքների շնորհիվ էապես պարզեցվել են սոցիալապես անապահով ընտանիքների թիրախային խմբերի ընտրության ցուցանիշները, պարզեցվել է բյուրոկրատիան, որի արդյունքում 105 հազար ընտանիքներից ցուցանիշը հասցվել է 95 հազարի՝ այն պարզ պատճառով, որ բացահայտվել են բազմաթիվ կեղծարարություններ փաստաթղթերի ներկայացման պարագայում: Ավելորդ փաստաթղթեր են պահանջվում, իրենց բովանդակության առումով ոչինչ չասող փաստաթղթեր, այն պարագայում, երբ շատ ավելի պարզ փաստաթղթերի միջոցով հնարավոր է բացահայտել այն ընտանիքներին, որոնք իրապես սոցիալական կարիքներ ունեն: Եվ այսօր այդ աշխատանքները շարունակվում են, երեկ էլ կառավարությունը համապատասխան որոշումներ է ընդունել` պարզեցնելով այդ փաստաթղթերը, որոնք պետք է ներկայացվեն:
Ընդհանուր առմամբ մենք դրական ենք գնահատում մեր համագործակցությունը Վերահսկիչ պալատի հետ. բոլոր հաշվետվությունները քննարկվում են, և Վերահսկիչ պալատի կողմից ներկայացված առաջարկությունները դառնում են կառավարության քննարկման առարկա: Մասնավորապես, կառավարության երեկվա նիստում Վերահսկիչ պալատի հետ համատեղ քննարկումների արդյունքում տրվել են համապատասխան հանձնարարականներ, և մենք փոխում ենք գործընթացները Համաշխարհային բանկի հետ վարկային ծրագրերի աշխատանքի առումով, մասնավորապես` ինչպես ենք ներկայացնում հայտեր տեխնիկական օժանդակության առումով, երբ վարկերի հաշվին մեր պետությունն ստանում էր տարբեր տիպի խորհրդատվություններ: Այսուհետև մենք դա պետք է ընդհանրապես բացառենք: Երկրորդը` հանձնաժողովները, որ ստեղծվում են Հայաստանի Հանրապետությունում, որոնք հայտարարում են տենդերներ, որոնք սահմանում են որակական չափանիշներ, պատասխանատու են լինելու ոչ միայն ընթացիկ գործառույթներին հետևելու, այլև բովանդակության համար, որը նույնպես կարևոր երևույթ է: Եվ հետվարկային ծրագրերի իրականացման առումով մենք մտադիր ենք ներդնել պարտադիր աուդիտի անցկացման պահանջը, որպեսզի այդ ծրագրերն իրականացնողներն իմանան, որ հրապարակային քննարկվելու է ծրագրերի արդյունավետությունը:
Համենայն դեպս, մենք արձանագրում ենք, որ Վերահսկիչ պալատի կողմից կատարվող ստուգումների արդյունքների հիման վրա ընդունված որոշումները Հայաստանի Հանրապետությունում էապես կրճատում են կոռուպցիոն ռիսկերը: Միևնույն ժամանակ ուզում եմ նշել, որ, իհարկե, կան բազմաթիվ կետեր, որոնք վիճահարույց են, և մենք այդ բանավեճը շարունակում ենք Վերահսկիչ պալատի հետ, քանի որ դեռևս գտնված չեն լուծումներ, որոնք կբավարարեն նաև գործադիր իշխանությանն՝ այս կամ այն գործառույթը կանոնակարգելու տեսակետից:
Շնորհակալություն ուշադրության համար, հարգելի գործընկերներ: Հայաստանի Հանրապետության գլխավոր գանձապետը մանրակրկիտ կներկայացնի ձեր դատին 2010 թվականի բյուջեի կատարողականը, ինչպես նաև մեր գործընկերները կպատասխանեն ձեզ հետաքրքրող բոլոր հարցերին:
Շնորհակալություն:
 

Մայիս 2020
ԵրկԵրքՉրքՀնգՈւրՇբթԿրկ
 123
45678910
11121314151617
18192021222324
25262728293031

-

Արխիվ