չորեքշաբթի, 22 հոկտեմբերի 2003
Այսօր ՀՀ վարչապետ Անդրանիկ Մարգարյանն ընդունել է «Ռուսաստանի միասնական էներգահամակարգեր» (ՌԱՕ «ԵԷՍ ՌՈՍՍԻԻ» բաժնետիրական ընկերության նախագահ Անատոլի Չուբայսին և նրա գլխավորած պատվիրակությանը:
Նշելով, որ էներգետիկան Հայաստանի տնտեսության կարևորագույն բաղկացուցիչն է, վարչապետն ընդգծել է այդ ոլորտի զարգացման, էներգահամակարգի անվտանգության և հուսալիության բարձրացման, առկա խնդիրների լուծման հարցում պետության շահագրգռությունը և հույս հայտնել, որ «Ռուսաստանի միասնական էներգահամակարգեր» ընկերության հետ համագործակցությունը կօգնի բնագավառի զարգացմանը, տարածաշրջանում Հայաստանի էներգետիկ արտադրանքի իրացման շուկաների ընդլայնմանն ու փոխշահավետ ծրագրերի իրագործմանը:
Ընկերության նախագահ Անատոլի Չուբայսը, վկայակոչելով այս ոլորտում Իրանի հետ Հայաստանի հաջող համագործակցությունը և ողջունելով այն՝ նշել է, որ իրենք էլ հնարավորինս կնպաստեն ամրապնդելու և զարգացնելու այդ գործակցությունը, քանի որ «Ռուսաստանի միասնական էներգահամակարգեր» ընկերության ծրագրերում ևս մեծ տեղ է տրվում էներգետիկ բնագավառում տարածաշրջանի երկրների ջանքերի համադրմանը, ԱՊՀ երկրների միասնական էներգետիկ համակարգի ձևավորմանը, որը, ըստ Ա.Չուբայսի, օգտակար կլինի համակարգի մաս կազմող բոլոր երկրների համար, կկարգավորի էլեկտաէներգիայի արտահանման և ներմուծման խնդիրները:
Վերահաստատելով Հայաստանի դիրքորոշումը՝ հարևանների հետ տնտեսական համագործակցությունն առանց նախապայմանների սկսելու պատրաստակամության մասին, վարչապետ Անդրանիկ Մարգարյանը Հայաստանի կառավարության կողմից աջակցություն է հայտնել միասնական էներգետիկ համակարգի ձևավորման գաղափարը կյանքի կոչելու հարցում:
ՀՀ վարչապետը և Անատոլի Չուբայսը հանդիպումից հետո ստորագրել են «Էլեկտրաէներգետիկայի բնագավառում ՀՀ-ի և ՌԴ-ի միջև համագործակցությունը խորացնելու հարցում ՀՀ վարչապետի և «Ռուսաստանի միասնական էներգահամակարգեր» բաժնետիրական ընկերության նախագահի բանակցությունների արդյունքների մասին արձանագրություն», որի ստորագրմանը, ըստ փաստաթղթի, կհաջորդի մեկ ամսվա ընթացքում համապատասխան կառույցների կողմից արձանագրության մեջ հիշատակված միջոցառումների հետ կապված խնդիրների լուծումը: Արձանագրության ստորագրումից հետո, ՀՀ կառավարությունում տեղի է ունեցել Անդրանիկ Մարգարյանի և Անատոլի Չուբայսի մամուլի ասուլիսը:
