ուրբաթ, 11 մարտի 2011
Պետությունը կարևորում է ազգային ավանդույթների վերականգնումը
Վարչապետ Տիգրան Սարգսյանն այսօր Արարատյան Հայրապետական թեմի առաջնորդարանում մասնակցել է Սուրբ Սարգսի տոնի առիթով կազմակերպված ցուցահանդես-մրցույթների հաղթողների պարգևատրման արարողությանը։ Մրցանակաբաշխությունը հանդիսապետում էր Արարատյան Հայրապետական թեմի առաջնորդական փոխանորդ Տ.Նավասարդ արքեպիսկոպոս Կճոյանը, ներկա էին Աշխարհի հայ նկարիչների միության վարչության անդամներ։
Վարչապետ Սարգսյանը պատվոգրեր և մրցանակներ է հանձնել պրոֆեսիոնալ ցուցահանդես-մրցույթում հաղթող ճանաչված 12 երիտասարդ ստեղծագործողներին, ինչպես նաև պատվոգրերով պարգևատրել ոչ պրոֆեսիոնալ մրցույթում աչքի ընկած լավագույն 16 ստեղծագործողներին` գրաֆիկայի, գեղանկարչության, քանդակի և կիրառական արվեստի ճյուղերում ներկայացված աշխատանքների համար:
Բարձր գնահատելով Սուրբ Սարգսին նվիրված տոնակատարությունների ավանդույթի վերականգնումը` կառավարության ղեկավարը նշել է. «Պետք է արձանագրենք, որ պետության և եկեղեցու հետևողական համագործակցության շնորհիվ Սուրբ Սարգսի տոնն այսուհետ մտել է մեր կենցաղի մեջ և մեր կյանքի անբաժանելի մասն է դարձել, որովհետև մեր ժողովուրդը նախապատրաստվում է այդ տոնին, սրտանց նշում է այն, և կարծես այս գեղեցիկ ավանդույթը միշտ եղել է մեզ հետ: Կարծում եմ` կհամաձայնեք, որ էական դերակատարություն ունեցավ այն հանգամանքը, որ վերջին չորս տարիների ընթացքում Սուրբ Սարգսի տոնին նվիրված միջոցառումները հովանավորվում էին Հանրապետության Նախագահի կողմից: Բնականաբար, դրա նպատակն էր շեշտադրել այն, որ պետությունը կարևորում է ազգային ավանդույթների վերականգնումը, և մեզ հաջողվեց նաև Սուրբ Սարգսի տոնը դարձնել այդպիսին»։
Տիգրան Սարգսյանը շնորհակալություն է հայտնել ցուցահանդես-մրցույթներին մասնակցած բոլոր արվեստագետներին և շնորհավորելով նրանց հաղթանակի կապակցությամբ` մաղթել նորանոր հաջողություններ իրենց ընտրած ոլորտներում:
Սիրո բարեխոսի տոնին նվիրված ցուցահանդես-մրցույթները կազմակերպել էր Աշխարհի հայ նկարիչների միությունը Արարատյան Հայրապետական թեմի հետ համատեղ: Երիտասարդ արվեստագետների պրոֆեսիոնալ մրցույթում ներկայացված շուրջ 80 ստեղծագործությունները «ԱրմենԹել»-«Բիլայն» ընկերության հովանավորությամբ տպագրվել են գունազարդ ամենամյա պատկերագրքում:
