երեքշաբթի, 7 հոկտեմբերի 2003
ՀՀ վարչապետ Անդրանիկ Մարգարյանն այսօր ընդունել է Առևտրատնտեսական համագործակցության հարցերով հայ-բելառուսական միջկառավարական հանձնաժողովի համանախագահներ Գենադի Կուրոչկինին և Կարեն Ճշմարիտյանին: Համանախագահները ներկայացրել են Երևանում անցկացված հանձնաժողովի 5-րդ նիստի ընթացքը: Նրանք դրական են գնահատել նիստի արդյունքները, հայ-բելառուսական տնտեսական համագործակցության ներկայիս վիճակն ու զարգացման հնարավորությունները, նշելով, որ այդ գնահատականն արտացոլված է նաև կողմերի միջև ստորագրված նիստի արձանագրության մեջ:
Վարչապետ Անդրանիկ Մարգարյանն իր գոհունակությունն է հայտնել վերջին շրջանում Հայաստանի և Բելառուսի միջև ապրանքաշրջանառության ծավալների աճից, նշելով, որ ապրանքաշրջանառության ցանկը համալրվել է մի շարք նոր անվանումներով, ինչը, ըստ նրա, լրացուցիչ հնարավորություններ կստեղծի երկկողմ տնտեսական ու առևտրական կապերի խթանման համար: Միջկառավարական հանձնաժողովի համանախագահ Գենադի Կուրոչկինը ևս հավաստել է հայ-բելառուսական տնտեսական համագործակցությունը խորացնելու իր երկրի կառավարության պատրաստակամությունը, ընդգծելով, հատկապես, բարձր տեխնոլոգիաների ոլորտում փոխգործակցության հեռանկարները: Նա նշել է նաև, որ չափազանց տպավորված է վերջին մեկ-երկու տարիներին Հայաստանում ընթացող շինարարական աշխատանքներից, տեղեկացնելով, որ ներկայումս լայն թափի կառուցողական աշխատանքներ են ընթանում նաև Բելառուսի Հանրապետությունում:
