ուրբաթ, 3 հոկտեմբերի 2003
ՀՀ վարչապետ Անդրանիկ Մարգարյանն այսօր ընդունել է Վրաստանի Սամցխե-Ջավախեթի տարածաշրջանում Վրաստանի նախագահի պետական լիազոր ներկայացուցիչ Գելե Կվարացխելիին և նրա գլխավորած պատվիրակությանը: Գելե Կվարացխելին ՀՀ վարչապետին է փոխանցել Վրաստանի նախագահի ողջույնները և նշել, որ իր երկիրը պատրաստակամ է մինչ այժմ ՀՀ իշխանությունների հետ ձեռք բերված պայմանավորվածությունների, ստորագրված փաստաթղթերի իրագործման ուղղությամբ ակտիվ աշխատանք տանել նաև կայանալիք խորհրդարանական ընտրություններից հետո: Նա հույս է հայտնել, որ ընտրություններն իր երկրում ներքաղաքական անկայունության չեն վերաճի և աստիճանաբար կկայունանա նաև տարածաշրջանը: Ի պատասխան, ՀՀ վարչապետը նշել է, որ Վրաստանում կայուն վիճակը նաև Հայաստանի շահերից է բխում: Զրուցակիցները կարևորել են տարածաշրջանային համատեղ նախաձեռնությունների ակտիվացման անհրաժեշտությունը: Վրաստանի նախագահի պետական լիազոր ներկայացուցիչը հանդիպման ժամանակ շնորհակալություն է հայտնել ՀՀ իշխանություններին՝ էներգետիկայի բնագավառում համագործակցության, Վրաստանին մշտապես աջակցության ձեռք մեկնելու համար և վստահեցրել է, որ առկա խնդիրները՝ պարտքի մարման և այլնի հետ կապված, վրացական կողմին աշխատում է հնարավորինս շուտ լուծել: Նշելով, որ ընդհանուր թշնամիները փորձում են ցանկացած հնարքով ազգամիջյան, էթնիկական բախման պատճառներ փնտրել և սրել հարաբերությունները հայ և վրաց ժողովուրդների միջև, նա ընդգծել է, որ դա նրանց չի հաջողվի:
Գելե Կվարացխելին տեղեկացրել է նաև, որ իրենք այժմ հայ-վրացական հարաբերությունների ամրապնդման նոր մոտեցումներ են մշակում:
ՀՀ կառավարության ղեկավար Անդրանիկ Մարգարյանը վերահաստատել է Հայաստանի պատրաստակամությունը՝ մասնակցելու Ջավախքի տնտեսական ծրագրերի մշակման և իրականացման գործընթացներին:
