շաբաթ, 27 նոյեմբերի 2010
Տիգրան Սարգսյանը մասնակցել է եվրոպական ինտեգրման թեմայով կազմակերպված համաժողովին
Վարչապետ Տիգրան Սարգսյանն այսօր մասնակցել է «Եվրոպական հեռանկարները «Արևելյան գործընկերություն» ծրագրի շրջանակներում և Հայաստան-Եվրոպական միություն Ասոցացման համաձայնագրի շուրջ բանակցությունների գործընթացում» 6-րդ համաժողովին։ Այն կազմակերպվել է «Մարդկային զարգացման միջազգային կենտրոն» հասարակական կազմակերպության կողմից` Հայաստանում ԵՄ պատվիրակության և «Ֆրիդրիխ Էբերտ» հիմնադրամի օժանդակությամբ։ Ամեն տարի կազմակերպվող համաժողովի շրջանակում փորձագետներին ու հասարակությանն է ներկայացվում ԵՄ-ի հետ Հայաստանի ինտեգրման գործընթացը` նպատակ ունենալով նպաստել Հայաստանում քաղաքականության մշակման և որոշումների կայացման գործընթացում քաղաքացիական հասարակության ու հասարակական կազմակերպությունների դերի բարձրացմանը։
Տիգրան Սարգսյանը կառավարության անունից ողջունել է համաժողովի մասնակիցներին և ընդգծել ԵՄ-ի հետ համագործակցության կարևորությունը ՀՀ պետական կառավարման ինստիտուտների կատարելագործման, տնտեսական զարգացման, եվրոպական երկրների հետ արտաքին առևտրի ընդլայնման և ժողովրդավարության ու օրենքի գերակայության ամրապնդման համատեքստում։
Վարչապետ Սարգսյանը խոսել է ԵՄ-ի հետ համագործակցության խորացման հեռանկարների մասին` նշելով, որ ինստիտուցիոնալ բարեփոխումների իրականացման արդյունքում հայաստանյան հասարակության ինքնակազմակերպումը պետք է համահունչ լինի ժամանակակից Եվրոպայի ինքնակազմակերպմանը:
Կառավարության ղեկավարն անդրադարձել է նաև քաղաքացիական հասարակության ձևավորման խնդիրներին։ Նրա խոսքով` անհրաժեշտ է, որպեսզի ոչ պետական հասարակական կազմակերպություններն ունենան էական դերակատարություն. «Քաղաքացիական հասարակության հենքը կազմում են մարդիկ, ովքեր իրենց տնտեսական, ընտանիքի ու սեփական ապագան ինքնուրույն են կառուցում և հիմնվում են սեփական ուժերի ու կարողությունների վրա»։ Այս համատեքստում Տիգրան Սարգսյանը կարևորել է փոքր և միջին բիզնեսի դերը քաղաքացիական հասարակություն կառուցելու գործում։
Այնուհետև վարչապետը պատասխանել է համաժողովի մասնակիցների հարցերին:
