չորեքշաբթի, 24 նոյեմբերի 2010
Քննարկում Հայաստանի գործարար միջավայրի արմատական բարելավման վերաբերյալ
Այսօր կառավարությունում տեղի է ունեցել խորհրդակցություն` Հայաստանի գործարար միջավայրի բարելավման վերաբերյալ, որը վարել է վարչապետ Տիգրան Սարգսյանը:
Կարևորելով գործարար միջավայրի բարելավմանը նպատակաուղղված քայլերի իրականացումը` վարչապետը նշել է, որ բոլոր գերատեսչություններին տրվել էր հանձնարարական Doing Business-ի ցուցանիշների բարելավման ուղղությամբ: Կառավարության ղեկավարը հիշեցրել է, որ Հայաստանի Հանրապետության Նախագահի նախընտրական ծրագրի կարևոր կետերից մեկը Doing Business-ի ցուցանիշով աշխարհի պետությունների առաջին տասնյակում տեղ գրավելն է, մինչդեռ ցայսօր առաջընթաց չկա: Պատճառները մեր երկրում բարեփոխումների հապաղումն է ու այն, որ այլ պետություններն ավելի արագ են իրականացնում ռեֆորմներ: Տիգրան Սարգսյանը նշել է, որ մեր հիմնական խնդիրը հարկերի վճարման վարչարարության մասնաբաժինն է, որի կտրվածքով Հայաստանը գտնվում է 159-րդ տեղում: Հայաստանը 82-րդ հորիզոնականն է զբաղեցնում անդրսահմանային առևտրի ցուցանիշով, (այդ ոլորտում մեր երկրի դիրքը 21 կետով բարելավվել է): Խնդրահարույց է ներդրողների պաշտպանվածության հարցը, որտեղ մենք զբաղեցնում ենք 93-րդ հորիզոնականը:
6 կետով վատացել է շինարարական թույլտվությունների ստացման ցուցանիշը. այստեղ մեր երկիրը 78-րդն է: Մտահոգիչ են ընկերությունների փակման, վարկերի հասանելիության և նոր բիզնես սկսելու ցուցանիշները: Սեփականության գրանցման ցուցանիշով, որտեղ 5-րդ հորիզոնականում ենք, անցած տարվա համեմատությամբ վիճակը 1 կետով վատացել է:
Խորհրդակցության ժամանակ ՀՀ էկոնոմիկայի նախարարի առաջին տեղակալ Կարինե Մինասյանը ներկայացրել է Հայաստանի գործարար միջավայրի բարելավման միջոցառումների ծրագրի նախագիծը: Հաջորդած քննարկման ընթացքում արծարծվել են բիզնես սկսելու և զարգացնելու համար պահանջվող վարչարարական ընթացակարգերի պարզեցմանը, փոքր և միջին ձեռնարկությունների աճի, ինչպես նաև արտաքին առևտրի խթանմանը, հարկային և մաքսային քաղաքականության իրականացմանն առնչվող հարցեր:
Ամփոփելով քննարկման արդյունքները` կառավարության ղեկավարը հանձնարարել է ստեղծել շահագրգիռ գերատեսչությունների ներկայացուցիչներից բաղկացած աշխատանքային խմբեր և մինչև հաջորդ ուրբաթ ներկայացնել առաջարկություններ գործարար միջավայրի արմատական բարելավման ուղղությամբ միջոցառումների իրականացման վերաբերյալ:
