երկուշաբթի, 1 սեպտեմբերի 2003
ՀՀ վարչապետ Անդրանիկ Մարգարյանի շնորհավորական ուղերձը ԼՂՀ Անկախության հռչակման օրվա առթիվ
Սիրելի հայրենակիցներ,
Շնորհավորում եմ Լեռնային Ղարաբաղի Հանրապետության անկախության հռչակման 12-րդ տարեդարձի առթիվ:
Պատմական հայրենիքում իր անկախ պետականությունը կերտելու Արցախի հայության ձգտումը իրականություն դարձավ 12 տարի առաջ, 1991 թ. սեպտեմբերի 2-ին՝ Անկախության հռչակագրի ընդունմամբ: Դրանով արցախահայությունը ոչ միայն հաստատեց հայրենի հողի վրա ազատ ու անկախ ապրելու իր իրավունքը, այլև այս ամբողջ ընթացքում աշխարհի առջև հավաստեց նվիրվածությունը ժողովրդավարական համընդհանուր արժեքներին, որը Լեռնային Ղարաբաղի Հանրապետության միջազգային ճանաչման կարևոր կռվաններից է: Այսօր, երկրի պաշտպանունակության ամրապնդման ճանապարհին, անչափ կարևոր է ներքին ու արտաքին կայունության ապահովումը՝ այն զուգակցելով տնտեսության վերականգնման, սոցիալական հիմնախնդիրների աստիճանական լուծման գործի հետ:
Վստահ եմ, որ Հայաստանի Հանրապետության հետ միասին, աշխարհասփյուռ հայության աջակցությամբ, Լեռնային Ղարաբաղի Հանրապետությունը այսուհետ ևս կկարողանա դիմագրավել այդ խնդիրների լուծման ընթացքում հանդիպող դժվարությունները, ապահովել իր քաղաքացիների անվտանգությունը, հավատարիմ մնալ հակամարտության խաղաղ կարգավորման որդեգրած ուղուն և տեր կանգնել Անկախության հռչակագրում ամրագրված սկզբունքներին:
Հավերժ փառք անկախությանն իրենց կյանքը նվիրաբերած մեր հերոսներին, որոնց ոգով այսօր սերունդներ են կրթվում և որոնց հիշատակի ամենամեծ տուրքը՝ նվաճած հաղթանակը պահելն ու մեր հայրենիքը հզորացնելն է:
Կրկին շնորհավորում եմ բոլորիս ԼՂՀ անկախության տարեդարձի առթիվ, ցանկանում հարատև խաղաղություն ազատաբաղձ արցախահայությանը, ստեղծագործ աշխատանք՝ ի շահ Արցախի հետագա բարգավաճման ու հզորացման:
