երկուշաբթի, 27 սեպտեմբերի 2010
Քննարկվել են պիլոտային ծրագրի արդյունքները
Այսօր կառավարությունում տեղի է ունեցել առողջապահության ոլորտում իրականացվող պիլոտային ծրագրի արդյունքների վերաբերյալ խորհրդակցություն, որը վարել է վարչապետ Տիգրան Սարգսյանը։ Խորհրդակցությանը մասնակցել են խոշոր բուժհաստատությունների տնօրեններ։
ՀՀ Ազգային Ժողովի առողջապահության, մայրության և մանկության մշտական հանձնաժողովի նախագահ, «Արաբկիր» բժշկական համալիր-երեխաների և դեռահասների առողջության ինստիտուտի տնօրեն Արա Բաբլոյանը զեկուցել է համավճարի սկզբունքի կիրառմամբ իրականացված պիլոտային ծրագրի շրջանակներում հուլիս-օգոստոս ամիսներին կատարված աշխատանքների մասին։
Այնուհետև տեղի է ունեցել մտքերի փոխանակում ծրագրի հետագա ընթացքի վերաբերյալ։ Մասնավորապես, քննարկվել են պետական պատվերի համակարգի բարեփոխմանը, ստվերայնության վերացմանն ու առողջապահական ապահովագրության զարգացմանն առնչվող հարցեր։
Կառավարության ղեկավարն ընդհանուր առմամբ դրական է գնահատել պիլոտային ծրագրի արդյունքները` ընդգծելով, որ ֆինանսական հոսքերի բացահայտումը հնարավորություն է տալիս վերացնել ստվերային վճարները ու բարելավել բարոյական միջավայրը բուժհաստատություններում։ Նա կարևորել է գնագոյացման մեխանիզմի, այն է` մատուցվող ծառայությունների շուկայական գնի ամրագրումը, ինչը ոլորտում կնվազեցնի կոռուպցիոն ռիսկերն ու կբարելավի մատուցվող ծառայությունների որակը։
Ամփոփելով քննարկման ընթացքում հնչած կարծիքներն ու առաջարկությունները` վարչապետը հանձնարարել է առողջապահության նախարար Հարություն Քուշկյանին մեկ շաբաթվա ընթացքում կատարված աշխատանքների հիման վրա ներկայացնել ծրագրի հետագա միջոցառումների ժամանակացույց։
