ուրբաթ, 8 օգոստոսի 2003
Այսօր տեղի ունեցավ ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարեց հանձնաժողովի նախագահ Վլադիմիր Մովսիսյանը:
Հանձնաժողովը քննարկեց 2003 թվականի ընթացքում իրականացվող բարեգործական 17 ծրագիր: Մասնավորապես քննարկվեցին և հաստատվեցին՝
«Հայաստան» համահայկական հիմնադրամի կողմից իրականացվող ճանապարհաշինարարական ծրագիրը, որի նպատական է ԼՂՀ «Հյուսիս-Հարավ» ավտոմայրուղու «Ստեփանակերտ-Բալուջա» և «Ծակուռի-Հադրութ» հատվածների համար բիտումի ձեռքբերումը,
Հայաստանի սոցիալական ներդրումների հիմնադրամի կողմից իրականացվող «Գեղարքունիքի մարզի Բարեպատ գյուղի դպրոցի կառուցման աշխատանքների ավարտում», «Շիրակի մարզի Գյումրիի N 9 դպրոցի վերակառուցում» և «Արագածոտնի մարզի Երնջատափ գյուղի դպրոցի նոր շենքի կառուցում» ծրագրերը։
Երևանի պետական համալսարանի երկու ծրագրերը՝ Ֆիզիկայի ֆակուլտետում իրականացվող CRDF (AR2-2302-YE-02) դրամաշնորհային ծրագիրը, և ուսումնական մասնաշենքի կառուցման և կահավորման ծրագիրը,
«Մինասյան» առողջապահական բարեգործական հիմնադրամի կողմից իրականացվող ծրագիրը, որի նպատակն է Սյունիքի մարզի Մեղրի քաղաքում բժշկական կենտրոնի հիմնումը,
«ԱՌԴԱ» բարեգործական հիմնադրամի՝ «Շիրակի մարզի Պեմզաշենի երաժշտական դպրոց», «Բարեկեցիկ մանկություն-15», «Բարեկեցիկ մանկություն-181» և «Գյումրիի բարեգործական կլինիկայի կառուցում» ծրագրերը,
Նիստում հաստատվեց Հրեական կրոնական համայնքի կողմից իրականացվող ծրագիրը, որի նպատակն է սոցիալապես անապահով ընտանիքներին կրթական, մշակութային, առողջապահական և սոցիալական օգնության ցուցաբերում, տարբեր քաղաքներում բարեգործական ճաշարանների կազմակերպում։
«Ռոմըն Վիրջինս» բարեգործական հասարակական կազմակերպության կողմից իրականացվող «Բժշկական շրջիկ կենտրոն» ծրագիրը, որը կծառայի մանկահասակ բնակչության սոցիալապես առավել անապահովների շրջանում մահացության և հիվանդացության իջեցմանն ու մանկաբուժական ծառայությունների մատուցմանը։
Նիստում քննարկվեցին և հաստատվեցին նաև 6 կազմակերպության հասցեներով ուղարկված բեռների ներմուծման ծրագրեր, ինչպես նաև 9 ծրագրերի շրջանակներում իրականացվող հարակից գործարքներ։