կիրակի, 4 հուլիսի 2010
Մշակույթի նոր պալատ` Չքնաղ համայնքում
Վարչապետ Տիգրան Սարգսյանն այսօր մասնակցել է Արագածոտնի մարզի Չքնաղ գյուղի մշակույթի տան բացման արարողությանը։ Միջոցառմանը ներկա էին նաև Սահմանադրական դատարանի նախագահ Գագիկ Հարությունյանը, ՀՀ գլխավոր դատախազ Աղվան Հովսեփյանը, կառավարության անդամներ, միջազգային կազմակերպությունների ներկայացուցիչներ, բազմաթիվ հյուրեր։
Կառավարության ղեկավարը շնորհավորել է համայնքի բնակիչներին կարևոր իրադարձության կապակցությամբ ու հույս հայտնել, որ մշակութային օջախը նոր ազդակ կհաղորդի համայնքի զարգացմանը։ Այնուհետև վարչապետը ներկա է գտնվել նորակառույց մշակույթի տանը տեղի ունեցած համերգին։
Նորակառույց մշակույթի տունը իր ճարտարապետական լուծումներով, մարզադահլիճի տեխնիկական հագեցվածությամբ, հանդիսությունների դահլիճի ձևավորմամբ, հանդիսանում է մարզի լավագույն մշակույթի օջախներից մեկը։ Գտնվելով Ապարանի շրջանի մի շարք համայնքների կենտրոնում` Չքնաղ համայնքի մշակույթի այս նոր օջախը շրջակա համայնքների երիտասարդության և մանուկների համար հանդիսանալու է մարզական և մշակութային կենտրոն։
Մարզադահլիճը, որը մոտ 400 քմ տարածք ունի, հագեցված է մարզական գույքով և բացմանը հաջորդող իսկ պահից պատրաստ է ընդունել պատանիներին ու մանուկներին։ Մշակույթի տան տարածքում գործելու է նաև ամբողջովին կահավորված բուժկետ։ Առաջին օգնության դեղամիջոցներն ու անհրաժեշտ բժշկական գործիքները տրամադրել է ՀՀ առողջապահության նախարարությունը։ Գործելու են նաև բնակչությանը սպասարկող այլ սոցիալական ծառայություններ։
Մշակույթի տունը կառուցվել է բյուջետային հատկացումների, սոցներդրումների հիմնադրամի աջակցության, համայնքի, ինչպես նաև այլ նվիրատվությունների մասնակցության շնորհիվ։
