հինգշաբթի, 17 հուլիսի 2003
Այսօր ՀՀ կառավարությունում տեղի է ունեցել կառավարության աշխատակազմի՝ պարտադիր վերապատրաստում և ատեստավորում անցած առաջին 32 քաղաքացիական ծառայողներին դասային աստիճանների շնորհման հանդիսավոր արարողություն: Օրենքով սահմանված կարգով կառավարության աշխատակազմում գլխավոր պաշտոններ զբաղեցնողներին դասային աստիճաններ են շնորհվել ՀՀ վարչապետ Անդրանիկ Մարգարյանի որոշումներով, իսկ առաջատար և կրտսեր պաշտոններ զբաղեցնողներին՝ կառավարության աշխատակազմի ղեկավար-նախարար Մանուկ Թոփուզյանի հրամաններով:
Կարևորելով քաղծառայության ինստիտուտի ներդնումը պետական կառավարման համակարգում, պարոն Թոփուզյանը շնորհավորել է դասային աստիճաններ ստացած բոլոր քաղծառայողներին՝ նշելով, որ դա նաև չափազանց պարտավորեցնող է: Նախարարը գոհունակություն է հայտնել քաղծառայողների վերապատրաստման և ատեստավորման առաջին փուլի ընթացքից, կառավարության աշխատակազմի պաշտոնյաների պատրաստվածության աստիճանից և հաջողություններ է մաղթել նրանց հետագա ծառայողական գործունեության մեջ:
«Քաղաքացիական ծառայության մասին» ՀՀ օրենքի ընդունումից հետո, 2002թ. դեկտեմբերի 1-ից քաղծառայողների պաշտոնների անվանացանկում ընդգրկված բոլոր մասնագետները առաջիկա երեք տարիների ընթացքում պարտավոր են անցնել վերապատրաստում և ատեստավորում՝ դասային աստիճաններ ստանալու համար: Ըստ ժամանակացույցի, 2003թ. սկսած, ամեն տարի որակավորման նշված փուլերն անցնելու է քաղծառայողների ընդհանուր թվի առնվազն 1/3-ը: Մինչև տարեվերջ դասային աստիճաններ կստանան նաև կառավարության աշխատակազմի՝ վերապատրաստման և ատեստավորման փուլերը հաջողությամբ հաղթահարած ևս 18 քաղաքացիական ծառայողներ:
