Հայաստանի Հանրապետության Կառավարություն

Վարչապետ Տիգրան Սարգսյանն այսօր ընդունել է Օրենբուրգի մարզի նահանգապետ Ալեքսեյ Չեռնիշևի գլխավորած պատվիրակությանը։ Կառավարության ղեկավարը ողջունել է հյուրերին և բարձր գնահատել հայ-ռուսական ռազմավարական փոխշահավետ համագործակցությունը։
Տիգրան Սարգսյանի և Ալեքսեյ Չեռնիշևի հանդիպման ընթացքում քննարկվել են Հայաստանի Հանրապետության մարզերի և Ռուսաստանի Դաշնության սուբյեկտների միջև փոխգործակցության հետագա խորացման մանրամասներ։ Ընդգծելով տնտեսական ոլորտում առկա ներուժի լիարժեք իրացման անհրաժեշտությունը` զրուցակիցները խոսել են ապրանքաշրջանառության ծավալների մեծացման անհրաժեշտությունից։ Հեռանկարային է համարվել գյուղատնտեսության, սերմնաբուծության, մեքենաշինության, առողջապահության ոլորտներում սերտ կապերի հաստատումը։
Ալեքսեյ Չեռնիշևը բարձր է գնահատել Օրենբուրգի նահանգի հայ համայնքի ունեցած կարևոր դերը մարզի զարգացման գործում։ Առանձնակի ուշադրության է արժանացել անցյալ տարի Օրենբուրգում բացված Հայկական ազգային տան գործունեությունը։ Նշվել է, որ մարզում առկա մեծաթիվ հայկական սփյուռքի մասնակցությունը համատեղ ծրագրերում կխթանի միջմարզային համագործակցությունը։
Վարչապետ Տիգրան Սարգսյանը կարևորել է գործարար շփումների ակտիվացումը բիզնեսի ներկայացուցիչների միջև ուղղակի կապերի ստեղծումը, ինչը հնարավորություն կտա ավելի սերտացնել տնտեսական հարաբերությունները։