Հայաստանի Հանրապետության Կառավարություն

Այսօր երկօրյա աշխատանքային այցով Երևան է ժամանել Չեխիայի Հանրապետության վարչապետ Յան Ֆիշերի գլխավորած պատվիրակությունը։ ՀՀ կառավարությունում վարչապետ Տիգրան Սարգսյանն ընդունել է չեխական պատվիրակությանը և առանձնազրույց ունեցել Յան Ֆիշերի հետ, որից հետո տեղի է ունեցել ընդլայնված կազմով հանդիպում։
Տիգրան Սարգսյանը ողջունել է հյուրերին ՀՀ կառավարությունում և մասնավորապես նշել. «Մեր նախորդ հանդիպումից հետո ժամանակ ունեցանք ևս մեկ անգամ հստակեցնելու այն կետերը, որոնց մասին մենք խոսել ենք Պրահայում և նաև կոնկրետացնել մեր համագործակցության ռազմավարությունը։ Ուրախ եմ, որ մեր տեսակետները համընկնում են համագործակցության ոլորտների առաջնահերթությունների վերաբերյալ։ Միևնույն ժամանակ համոզված եմ, որ մեր այսօրվա հանդիպումը, Ձեր այցը Հայաստանի Հանրապետություն և բիզնես ֆորումի աշխատանքները նոր լիցք են հաղորդելու հայ-չեխական հարաբերություններին»։
Չեխիայի Հանրապետության վարչապետ Յան Ֆիշերը շնորհակալություն է հայտնել ջերմ ընդունելության համար և նշել, որ իր այցը ևս մեկ դրական քայլ կլինի հայ-չեխական հարաբերությունների սերտացման գործում։
ՀՀ կառավարության ղեկավարը կարևորել է երկկողմ իրավապայմանագրային դաշտի ընդլայնումը։
Որպես առաջնահերթ ուղղություններ` նշվել են տեղեկատվական տեխնոլոգիաների, էներգետիկայի, հանքահումքային և քիմիական արդյունաբերության, փոքր ՀԷԿ-երի կառուցման, կրթության, երիտասարդության և սպորտի, զբոսաշրջության, ոլորտներում համագործակցության ընդլայնման հեռանկարները։ Տիգրան Սարգսյանը մատնանշել է մշակութային կապերի զարգացման և սերտացման անհրաժեշտությունը, որն անպայման ծառայելու է բարեկամական հարաբերությունների ամրապնդմանը։
Կողմերը կարևորել են այսօր Երևանում բացված հայ-չեխական գործարար ֆորումի դերը համագործակցության նոր ոլորտների բացահայտման առումով։ «Մեր պարտականությունն է ստեղծել բիզնես միջավայր, որը կնպաստի մասնավոր հատվածի ներկայացուցիչների միջև հարաբերությունների ամրապնդմանը»,- նշել է Տիգրան Սարգսյանը։
Զրուցակիցները քննարկել են ԵՄ «Արևելյան Գործընկերություն» ծրագրի շրջանակներում համագործակցության խորացման մանրամասներ։ Մասնավորապես, ՀՀ վարչապետը կարևորել է Եվրոպական Հարևանության «Թվինինգ» գործիքի օգնությամբ չեխական փորձի փոխանցումը ՀՀ կառավարման մարմիններին։
Երկու երկրների վարչապետներն անդրադարձել են տարածաշրջանային խնդիրներին։ Վարչապետ Տիգրան Սարգսյանը ողջունել է Լեռնային Ղարաբաղի հիմնահարցի վերաբերյալ Չեխիայի դիրքորոշումը և նշել. «Մեզ համար չափազանց կարևոր է Ղարաբաղի հարցի կարգավորման գործում մեր չեխ գործընկերների հավասարակշռված մոտեցումը և այն հանգամանքը, որ նրանք նույնպես գտնում են, որ Մինսկի խմբի շրջանակներում բանակցությունների գործընթացն այն միջոցն է, որը հնարավորություն կտա խաղաղ ճանապարհով կարգավորել այս հարցը»։
Հանդիպման ավարտից հետո ստորագրվել են փաստաթղթեր` միջպետական «Համաձայնագիր Հայաստանի Հանրապետության և Չեխիայի Հանրապետության միջև առանց թույլտվության բնակվող անձանց հետընդունման մասին» և միջկառավարական «Համաձայնագիր Հայաստանի Հանրապետության կառավարության և Չեխիայի Հանրապետության կառավարության միջև օդային տրանսպորտի մասին»։
Համաձայնագրերի ստորագրմանը հաջորդել է Հայաստանի Հանրապետության և Չեխիայի Հանրապետության վարչապետների մամուլի ասուլիսը ՀՀ կառավարության մամուլի կենտրոնում։