Հայաստանի Հանրապետության Կառավարություն

Վարչապետ Տիգրան Սարգսյանն այսօր ընդունել է Հեռահաղորդակցության միջազգային միության (ՀՄՄ) գլխավոր քարտուղար Հանադուն Տուրեին։
Վարչապետը ողջունել է հյուրին և նշել, որ նրա առաջին այցը Հայաստան կնպաստի երկկողմ կապերի սերտացմանը և ամրապնդմանը։
Հանդիպման ընթացքում քննարկվել են տեղեկատվական տեխնոլոգիաների և հեռահաղորդակցության ոլորտի խնդիրները և հեռանկարները։ Կառավարության ղեկավարը տեղեկացրել է, որ հեռահաղորդակցության ոլորտի զարգացումը գերակա ուղղություն է համարվում Հայաստանի համար։ Ոլորտի զարգացման համար Տիգրան Սարգսյանը կարևորել է ՀՄՄ-ի տեխնիկական օժանդակությունն ու խորհրդատվության տրամադրումը։
Հանադուն Տուրեն շնորհակալություն է հայտնել վարչապետին ընդունելության համար և տեղեկացրել, որ ՀՀ կապի և տրանսպորտի նախարարի հետ հանդիպման ընթացքում պայմանավորվածություն է ձեռք բերվել համագործակցությունը երեք ուղղություններով ընդլայնելու մասին։ Դրանք են` կարողությունների զարգացում, ոլորտային կառավարում և ռադիոհեռուստատեսային հեռարձակման թվայնացում։
Տիգրան Սարգսյանը ներկայացրել է Հայաստանի Հանրապետությունում կապի և հեռահաղորդակցության ոլորտներում առկա իրավիճակը։ Նշվել է, որ Հայաստանում դեռևս անելիքներ կան համացանցի արագ հասանելիության ցուցանիշների բարելավման ուղղությամբ։