ուրբաթ, 20 հունիսի 2003
ՀՀ վարչապետ Անդրանիկ Մարգարյանն այսօր ընդունել է Հայաստանում Բուլղարիայի Հանրապետության ժամանակավոր հավատարմատար Ստեֆան Դիմիտրովին:
Նշելով Հայաստանի և Բուլղարիայի, հայ և բուլղար ժողովուրդների բարեկամական հարաբերությունների պատմական արմատները, Բուլղարիայի Հանրապետությունում հայկական համայնքի գոյությունը, կողմերն ընդգծել են, որ այդ ամենը լավ նախապայմաններ է ստեղծում փոխադարձ կապերի հետագա սերտացման համար: Վարչապետ Անդրանիկ Մարգարյանը Հայաստանի համար կարևոր է համարել, մասնավորապես, Եվրամիությանն անդամակցելու, ազգային օրենսդրությունը եվրոպականին ներդաշնակեցնելու ուղղությամբ Բուլղարիայի փորձը, երկու երկրների միջև տնտեսական կապերի ակտիվացումը: Նա նշել է, որ այդ գործում կարևոր խթան կհանդիսանան հայ-բուլղարական միջկառավարական հանձնաժողովի՝ այս տարի նախատեսվող երրորդ նիստի անցկացումը, Հայաստան-Բուլղարիա-Վրաստան եռակողմ տրանսպորտային համաձայնագրի կնքումը:
Ստեֆան Դիմիտրովը շնորհավորել է վարչապետ, ՀՀԿ խորհրդի նախագահ Անդրանիկ Մարգարյանին՝ Հայաստանի վարչապետի պաշտոնը կրկին ստանձնելու կապակցությամբ: Նա նշել է, որ դա անցած տարիներին ՀՀԿ-ի և կառավարության վարած քաղաքականության ճիշտ և արդյունավետ լինելու լավագույն վկայությունն է: Ընդգծելով, որ ընտրություններից հետո արդեն եկել է գործնական աշխատանքի ժամանակը, դիվանագետը հույս է հայտնել, որ առաջիկա տարիներին համագործակցության ակտիվացումը բնորոշ կլինի նաև հայ-բուլղարական հարաբերություններին: Ստեֆան Դիմիտրովը կարևորել է փոխգործակցությունը, մասնավորապես, տրանսպորտի, գիտության, կրթության, մշակույթի ոլորտներում: Հանդիպման ժամանակ կողմերը համակարծիք են եղել նաև երկու պետությունների միջև առևտրական կապերի զարգացման, համատեղ արտադրական ձեռնարկությունների ստեղծման համար նոր հնարավորությունների որոնման և իրագործման հարցում:
