երեքշաբթի, 10 հունիսի 2003
ՀՀ վարչապետ Անդրանիկ Մարգարյանն այսօր ընդունել է Հայաստանում Լիտվայի Հանրապետության նորանշանակ արտակարգ և լիազոր դեսպան Ռիմանտաս Շիդլաուսկասին: Շնորհավորելով դեսպանին մեր երկրում իր դիվանագիտական առաքելությունը սկսելու առիթով՝ վարչապետը նշել է, որ Հայաստանի կառավարությունը պատրաստակամ է քննարկելու հայ-լիտվական երկկողմ հարաբերությունների հետագա խթանմանն ուղղված ցանկացած նախաձեռնություն և աջակցելու դրանց իրականացմանը: Նա ընդծել է, որ ի տարբերություն քաղաքական հարաբերությունների, որոնք վերջին շրջանում հաջողությամբ են զարգանում, Հայաստանի և Լիտվայի միջև տնտեսական համագործակցության մակարդակը դեռևս հեռու է բավարար լինելուց: Մասնավորապես, առևտրաշրջանառության ծավալների շատ ցածր ցուցանիշը (մոտ 3,5 մլն ԱՄՆ դոլար); ըստ նրա, չի համապատասխանում երկու երկրների փոխգործակցության առկա հնարավորություններին: Այս առումով վարչապետը կարևորել է երկկողմ համագործակցության խթանումը տնտեսության տարբեր բնագավառներում, տեղեկատվության փոխանակումը, գործարար համաժողովների, ցուցահանդես- վաճառքների և այլ միջոցառումների կազմակերպումը, ինչպես նաև համապատասխան իրավական դաշտի ապահովումը:
Դեսպան Ռիմանտաս Շիդլաուսկասը ևս նշել է, որ վերջին տարիներին Լիտվայում և Հայաստանում առկա տնտեսական կայուն աճը իրական հնարավորություններ է ստեղծում երկու երկրների միջև տնտեսական համագործակցության ակտիվացման ուղությամբ որոշակի քայլեր ձեռնարկելու համար: Նա հայտնել է, որ ինչպես տնտեսական, այնպես էլ գիտական, կրթական ու մշակութային ոլորտներում համագործակցության ուղղությունների հստակեցումից հետո, Հայաստան կժամանի լիտվացի գործարարների խումբ՝ արդեն գործնական նախագծերի քննարկման նպատակով: Ըստ դեսպանի, հայ-լիտվական քաղաքական և տնտեսական հարաբերությունների խորացմանը մեծապես կնպաստի նաև Լիտվայի նախագահի՝ ս.թ. աշնանը նախատեսվող այցը Հայաստան:
Հանդիպման ավարտին վարչապետ Անդրանիկ Մարգարյանը հաջողություններ է մաղթել նորանշանակ դեսպանին՝ իր կարևոր և պատասխանատու առաքելությունը մեր երկրում իրականացնելու համար:
