չորեքշաբթի, 10 փետրվարի 2010
Թափանցիկություն, հրապարակայնություն և երիտասարդների առավելագույն ներգրավվածություն
Այսօր կառավարությունում տեղի է ունեցել վարչապետին առընթեր ազգային երիտասարդական քաղաքականության խորհրդի այս տարվա առաջին նիստը, որը նախագահել է վարչապետ, խորհրդի նախագահ Տիգրան Սարգսյանը։
Նիստում սպորտի և երիտասարդության հարցերի փոխնախարար Արսեն Քարամյանը հանդես է եկել զեկույցով, որում ներկայացրել է պետական երիտասարդական քաղաքականության արդի վիճակը, հիմնական ձեռքբերումներն ու բացթողումները։ Զեկույցում նշվել է նաև, որ մարտի կեսերին տեղի կունենա հասարակական կազմակերպությունների կողմից դրամաշնորհային ծրագրերի հայտերի համացանցային ուղիղ` «օնլայն» ռեժիմով ներկայացման, մրցութային ընտրության և դրամաշնորհների տրամադրման արդիականացված, հրապարակային և թափանցիկ համակարգի շնորհանդեսը։ Այս առնչությամբ վարչապետը մասնավորապես նշել է. «Հարգելի գործընկերներ, մենք երիտասարդական քաղաքականության այս ռազմավարությունից պետք է բխեցնենք ծրագրեր և միասին պետք է այդ ծրագրերին, անվանումներին և բովանդակությանը հավանություն տանք։ Հետո հայտարարելու ենք մրցույթ, որով պետք է ընտրենք այդ ծրագրի լավագույն կատարողին։ Առաջին անգամ մենք փորձելու ենք դա անել մաքսիմալ հրապարակային։ Դա ենթադրում է, որ ծրագրերի հաստատումն անելու ենք միասին։ Բոլորն օնլայն ռեժիմով հետևելու են այդ գործընթացին։ Հետագայում էլ հնարավորություն եք ունենալու հետևելու, թե ինչպես են հաղթողներն իրականացնում այդ ծրագրերը։ Եթե կլինեն շեղումներ, դուք ինքներդ կարող եք հայտնաբերել դրանք»։
Վարչապետը կարծիք հայտնեց, որ երիտասարդական կազմակերպությունների ներգրավվածությունն ապահովելու է, որ նրանք իրենց գործընթացի մասնակից զգան և համոզվեն, որ իրենք կարող են այս որոշումների վրա ազդել, իսկ նրանց առաջարկություններն անպայման քննարկման առարկա կդառնան։
Նիստում քննարկվել և հաստատվել է նաև խորհրդի 2010 թվականի գործունեության ծրագրի նախագիծը նախապատրաստող և խորհրդի աշխատակարգի մշակման նպատակով ձևավորված աշխատանքային խմբերի կազմը։
