Հայաստանի Հանրապետության Կառավարություն

Այսօր ՀՀ կառավարությունում սկսվել է ՀՀ նախարարների 2009 թ. գործունեության հաշվետվությունների քննարկումը։
Օրվա առաջին կեսին հաշվետվությամբ հանդես են եկել ՀՀ կրթության և գիտության, Ֆինանսների, էկոնոմիկայի և բնապահպանության նախարարները։
Վարչապետ Տիգրան Սարգսյանը հիշեցրել է, որ հաշվետվությունների տեքստերը կհրապարակվեն և տեղակայված կլինեն նախարարությունների կայքերում։ Մինչ հաշվետվություններին անդրադառնալը վարչապետը նշել է. «Դուք հիշում եք, որ հանձնարարություն կար բոլոր նախարարներին, որ կենտրոնանան հետևյալ հարցերի վրա։ Առաջինը` որոնք են եղել հիմնական բացթողումները և պրոբլեմները 2009 թվականին, որոնք խոչընդոտել են բարեփոխումների ընթացքը և բացասաբար են անդրադարձել տնտեսական աճի ցուցանիշի վրա։ Երկրորդը` որո՞նք են 2009 թվականի դասերը։ Մենք պետք է ընդգծենք 2010 թվականի այն գերակա խնդիրները, որոնք գտնվելու են նախարարի անմիջական հսկողության տակ, որի համար նախարարը տարվա վերջում հաշվետվություն է տալու, թե այդ գերակա խնդիրներում ինչ դրական փոփոխություններ են կատարվել 2010 թվականին»։
Տիգրան Սարգսյանը մեկ անգամ ևս ընդգծել է ինչպես կատարված, այնպես էլ 2010 թվականին իրականացվելիք երեք կարևոր ծրագրերի նշանակալիությունը, որոնք լինելու են նախարարների անմիջական հսկողության տակ։ Նա ևս մեկ անգամ հիշեցրել է, որ 2010 թվականին տնտեսական աճ ապահովող ծրագրերը պետք է ներկայացվեն հանրությանը։
Օրվա երկրորդ կեսին 2009 թվականի գործունեության վերաբերյալ հաշվետվություններ են ներկայացրել ՀՀ սփյուռքի, գյուղատնտեսության, աշխատանքի և սոցիալական հարցերի, սպորտի և երիտասարդության, քաղաքաշինության, տրանսպորտի և կապի նախարարները։