ուրբաթ, 25 դեկտեմբերի 2009
Այսօր տեղի է ունեցել Հայաստանի Հանրապետության կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Սիմոն Տեր Սիմոնյանը։
Հանձնաժողովը քննարկել է 14 բարեգործական ծրագիր։
Մասնավորապես, քննարկվել և հաստատվել են`
«Հայաստան» համահայկական հիմնադրամի կողմից իրականացվող
- Հայաստանի Հանրապետության Լոռու մարզի Արծնի գյուղի միջնակարգ դպրոցի աջակողմյա ուսումնական մասնաշենքի հիմնանորոգման,
- Հայաստանի Հանրապետության Տավուշի մարզի Ակնաղբյուր գյուղի համայնքային կենտրոնի կառուցման,
- Հայաստանի Հանրապետության Տավուշի մարզի Այգեհովիտ և Վազաշեն համայնքների ոռոգման համակարգերի ուսումնասիրության ծրագրերը,
Ամերիկայի Հայ օգնության ֆոնդի Հայաստանի մասնաճյուղի կողմից իրականացվող
- «Գիտության և կրթության հայկական ազգային հիմնադրամ» ծրագիրը, որի նպատակն է գիտական դրամաշնորհներ տրամադրել ՀՀ գիտնականներին և գիտական խմբերին,
- «Կրթավճար» ծրագիրը, որի նպատակն է աջակցել կարիքավոր ուսանողներին` կրթավճար և կրթաթոշակ տրամադրելու միջոցով,
- «Բարեգործական ճաշարաններ» ծրագիրը, որի նպատակն է նպաստել միայնակ տարեցներին և հաշմանդամներին ամենօրյա տաք կերակրով ապահովելու միջոցով,
«Տիրամայր Հայաստանի կուսաստան» բարեգործական կազմակերպության կողմից իրականացվող` «Ցերեկային խնամքի կենտրոնի ստեղծում Գյումրի քաղաքում», «Աջակցություն անապահով ընտանիքներին», «Պողոսյան կրթահամալիր» և «Ամառային ճամբար» ծրագրերը,
«Վորլդ վիժն ինթերնեյշնլ» միջազգային բարեգործական կազմակերպության կողմից իրականացվող «Բարեգործական բեռների ներմուծում և անհատույց բաշխում Երևանի Քանաքեռ-Զեյթուն վարչական շրջանում» ծրագիրը,
«Արմենակ և Աննա Թադէոսեանների անվամբ բուժարան» բարեգործական հիմնադրամի կողմից իրականացվող «Կոշ գյուղում պոլիկլինիկայի կառուցում» ծրագիրը,
Մայր Աթոռ Սուրբ Էջմիածնի կողմից իրականացվող` Մայր Աթոռի տեղեկատվական համակարգի հեռուստատեսության ենթաբաժնի համար կահույքի պատրաստման և տեղադրման աշխատանքների ծրագիրը,
«Կամրջակ» սոցիալ-բարեգործական հասարակական կազմակերպության կողմից իրականացվող` «Երևանի պետական բժշկական համալսարան» ՊՈԱԿ-ին բժշկական սարքավորման նվիրատվություն ծրագիրը։
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ստացված բարեգործական բեռների ներմուծման ծրագրեր։
