երկուշաբթի, 2 հունիսի 2003
Հունիսի 3-ին եռօրյա այցով Հայաստան կժամանի Հարավային դաշնային օկրուգում ՌԴ նախագահի լիազոր ներկայացուցիչ Վիկտոր Կազանցեվի գլխավորած պատվիրակությունը: Պատվիրակության կազմում են Հարավային դաշնային օկրուգում ՌԴ նախագահի լիազոր ներկայացուցչի տեղակալ Սերգեյ Եպիֆանցևը, ՌԴ նախագահի Գլխավոր վերահսկողական վարչության Հարավային օկրուգային տեսչության վարչության պետ Լեոնիդ Շատվորյանը, Դոնի Ռոստովում ՌԴ արտաքին գործերի նախարարության ներկայացուցիչ, հատուկ հանձնարարությունների գծով դեսպան Վլադիմիր Սոլոցինսկին, Հյուսիսկովկասյան ռազմական օկրուգի զորքերի հրամանատար Վլադիմիր Բոլդիրևը, Ռուսաստանի Հարավում հայ առաքելական եկեղեցու թեմական ժողովի նախագահ Նիկոլայ Քոչյանը, երեխաների պաշտպանության միջտարածաշրջանային ոչ առևտրային բարեգործական հիմնադրամի ղեկավար Տամարա Կազանցևան, Ստավրոպոլի, Կրասնոդարի նահանգների և Ռոստովի մարզի վարչական ապարատի, գործարար շրջանների ներկայացուցիչներ:
Այցի ընթացքում Վիկտոր Կազանցեվը և նրա գլխավորած պատվիրակությունը հանդիպումներ կունենան ՀՀ նախագահ Ռոբերտ Քոչարյանի, վարչապետ Անդրանիկ Մարգարյանի, կառավարության անդամների, Ն.Ս.Օ.Տ.Տ. Ամենայն Հայոց Կաթողիկոս Գարեգին Բ-ի հետ, կլինեն Գյումրիում, Էջմիածնում, արտադրական ձեռնարկություններում, Հայաստանում տեղակայված ռուսական ռազմակայանում, կայցելեն Հայոց ցեղասպանության զոհերի հուշահամալիր:
Վիկտոր Կազանցեվի գլխավորած պատվիրակությունը Հայաստանից կմեկնի հունիսի 5-ի երեկոյան:
