Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Պաշտոնական էլ. փոստ

(միայն www.e-citizen.am համակարգով ծանուցումների համար)

Էլ. կառավարում

Պաշտոնական լրահոս

երեքշաբթի, 17 նոյեմբերի 2009


Շարունակվում է Հայաստանի Հանրապետության վարչապետ Տիգրան Սարգսյանի այցը Իտալիա, որտեղ կառավարության ղեկավարը մասնակցում է Պարենի և գյուղատնտեսության կազմակերպության համաժողովին։ Այսօր Տիգրան Սարգսյանը ելույթով դիմել է համաժողովի մասնակիցներին, որում ասված է. «Մեծարգո պարոն նախագահ, հարգելի գործընկերներ, գագաթաժողովի մասնակիցներ։ Արդեն երկու տասնամյակ է, ինչ Հայաստանի Հանրապետությունն ընդգրկված է Պարենի և գյուղատնտեսության կազմակերպության աշխատանքներում` 1993 թվականից հանդիսանալով կազմակերպության լիիրավ անդամ։ Համագործակցության անցած տարիները արդյունավետ աշխատանքի ու արձանագրված հաջողությունների ժամանակաշրջան են։ Այդ բովանդակալից և շնորհակալ համագործակցությունը շոշափելի արդյունք է տվել։ Այսօր հպարտությամբ արձանագրում ենք, որ Պարենի և գյուղատնտեսության կազմակերպության «Հաջողության ուղիները» զեկույցը, ի թիվս չորս այլ պետությունների, բարձր է գնահատել մեր երկրի օրինակը` որպես դրված նպատակներին հասնելու և ոլորտում առկա խնդիրների հետևողական լուծման փորձառություն։ Սա, իհարկե, չի նշանակում, որ բոլոր հիմնահարցերն արդեն լուծված են, և պետք է աշխատել նոր եռանդով, ձեռքբերածն ամրապնդելու և գյուղատնտեսության ոլորտում տեսանելի առաջընթացը շարունակելու համար։
Հայտնի է, որ պարենի արտադրությունը ողջ աշխարհում, ներառյալ Հայաստանում, խիստ ռիսկային ոլորտ է։ Արդի ֆինանսական և տնտեսական ճգնաժամն իր հերթին բացասական ազդեցություն թողեց սննդի պահանջարկի վրա, ինչն առավել ընդգծված զգացվեց զարգացող երկրներում։ Այդ իսկ պատճառով մենք մեծապես կարևորում ենք այս համաժողովն ու խնդրի լուծմանն ուղղված բոլոր պետությունների ու միջազգային կազմակերպությունների ջանքերը։ Այսօր այս սրահում հավաքված պատվարժան հյուրերն ու ոլորտի պատասխանատուները պարենային ապահովության վերաբերյալ գագաթաժողովի առաջարկած հռչակագրին անդրադառնալու առիթներ դեռ ունենալու են։ Համոզված եմ, որ այդ քննարկումները բավականին հետաքրքիր ու արդյունավետ են լինելու։ Իմ դիրքորոշումը սեղմ է և հստակ։ Հայաստանի Հանրապետությունը պաշտպանում է պարենային ապահովության վերաբերյալ գագաթաժողովի հռչակագիրը։ Այն համապատասխանում է մեր կառավարության տեսլականին, ու դրանում արտահայտված սկզբունքները մեզ համար ընդունելի են։
Մեծարգո պարոն նախագահ,
Մենք բարձր ենք գնահատում Պարենի և գյուղատնտեսության կազմակերպության Գյուղատնտեսական հարցերով եվրոպական հանձնաժողովի 36-րդ նստաշրջանն ու Կազմակերպության եվրոպական տարածաշրջանային 27-րդ կոնֆերանսը 2010 թվականի մայիսի 10-14 Երևանում անցկացնելու մասին որոշումը։ Հուսով եմ, որ Երևանում կայացրած որոշումները ևս կնպաստեն պարենային անվտանգության մակարդակի զգալի բարձրացմանը։ Սպասում ենք ձեզ Երևանում։
Թույլ տվեք Հայաստանի Հանրապետության կառավարության անունից կրկին արտահայտել իմ խորին շնորհակալությունը Պարենի և գյուղատնտեսության կազմակերպությանը և անձնապես գլխավոր տնօրեն դոկտոր Ժակ Դիուֆին, կազմակերպության դոնոր անդամներին և բարի կամք դրսևորած երկրներին` աշխարհի առջև ծառացած խնդիրների լուծման նպատակով գործադրած համատեղ ջանքերի համար։ Համոզված եմ, որ համատեղ ջանքերով ի վիճակի կլինենք հաղթահարելու պարենային անվտանգության մարտահրավերները և աստիճանաբար կվերացնենք սովն ու աղքատությունը ամբողջ աշխարհում»։
Այնուհետև տեղի է ունեցել ՀՀ վարչապետի ու ՄԱԿ-ի Պարենի ու գյուղատնտեսության կազմակերպության գլխավոր տնօրեն դոկտոր Ժակ Դիուֆի հանդիպումը, որի ընթացքում կողմերը քննարկել են Հայաստանի ու կազմակերպության միջև համագործակցության հարցերը։
ՀՀ վարչապետը նշել է, որ Հայաստանը կարևորում է համագործակցությունը FAO-ի հետ, ինչպես նաև այդ կազմակերպության կողմից Հայաստանում իրականացրած և ներկայումս իրականացվող ծրագրերը։ Տիգրան Սարգսյանը նշել է նաև, որ Հայաստանը հաստատում է իր պատրաստակամությունը` 2010 թ. մայիսի 10-14-ին Երևանում հյուրընկալել FAO-ի Եվրոպայի և Կենտրոնական Ասիայի տարածաշրջանային 27-րդ համաժողովը, ինչպես նաև Եվրոպական NGO/Civil Society Organisation-ների խորհրդակցությունը։
Կառավարության ղեկավարը հատուկ ընդգծել է հացահատիկի, եգիպտացորենի ու կարտոֆիլի սերմնաբուծության, ձկնաբուծության, գյուղատնտեսական կենդանիների հաշվառման և համարակալման համակարգի ստեղծման, գյուղատնտեսական ապահովագրական համակարգի ներդրման ոլորտներում համագործակցության զարգացումը։
ՊԳԿ գլխավոր տնօրենը նշել է, որ համագործակցության նոր առաջնայնությունները Հայաստանին ու կազմակերպությանը համատեղ արդյունավետ աշխատելու հնարավորություններ են տալիս։
Այսօր կառավարության ղեկավարը հանդիպելու է նաև Գյուղատնտեսության զարգացման միջազգային հիմնադրամի տնօրեն Կանայո Նվանզեի և ՄԱԿ-ի Պարենի համաշխարհային ծրագրի գործադիր տնօրեն Ջոզեթ Շիրանի հետ։

 

 

 


 

Օգոստոս 2019
ԵրկԵրքՉրքՀնգՈւրՇբթԿրկ
 1234
567891011
12131415161718
19202122232425
262728293031 

-

Արխիվ