ուրբաթ, 23 հոկտեմբերի 2009
Այսօր Հայաստանի Հանրապետության վարչապետ Տիգրան Սարգսյանը մասնակցել է «Դատալեքս» հանրային տեղեկատվական կրպակների համակարգի շնորհանդեսին։
Ողջունելով միջոցառման մասնակիցներին` Տիգրան Սարգսյանը կարևորել է այս միջոցառումը, քանզի այն լուրջ ներդրում է արդարադատության ոլորտում բարեփոխումների ընթացքի մեջ։
«Դատալեքսի» ներդրումը նպատակ ունի հանրային վերահսկություն իրականացնել դատական համակարգի նկատմամբ, քանզի այն ապահովում է ընթացակարգային և բովանդակային թափանցիկություն` դատական համակարգում ընթացող ցանկացած դատավարության վերաբերյալ։ Մասնավորապես, համակարգի միջոցով հնարավորություն կընձեռվի հետևել ցանկացած դատական գործով իրականացվող ընթացակարգերի` տեղեկանալ գործի կարգավիճակին և պատմությանը, ուսումնասիրել ժամկետները, որոշումները, դատական վերջնական ակտերի ամբողջական տեքստերը, ինչպես նաև որոնում կատարել օրենսդրության «Արլիս» շտեմարանում, այցելել պետական կառավարման մարմինների ինտերնետային կայքեր և կատարել պետական տուրքերի վճարներ։
«Դատալեքսի» 30 կրպակներն ու մոնիտորները արդեն տեղադրված են դատարաններում և պետական կառավարման մարմինների շենքերում։ Այս համակարգը մշակվել է «Դատաիրավական բարեփոխումներ» ծրագրի շրջանակում Ֆինանսական և տեխնիկական օժանդակությունը ցուցաբերել են Նիդերլանդների թագավորության կառավարությունը, Համաշխարհային բանկը և Հայաստանի կառավարությունը։
