Հայաստանի Հանրապետության Կառավարություն

Հայաստանի Հանրապետության վարչապետ Տիգրան Սարգսյանն այսօր ընդունել է Բելգիայի Թագավորության սենատի նախագահ Արման դը Դեկերին։
Ողջունելով հյուրին, ՀՀ կառավարության ղեկավարը գոհունակություն է հայտնել հայ-բելգիական հարաբերությունների բարձր մակարդակի կապակցությամբ և նշել է, որ նմանօրինակ հանդիպումները լավ առիթ են խոսելու երկկողմ հարաբերությունների և Հայաստան- ԵՄ համագործակցության մասին։
Վարչապետն անդրադարձել է երկու երկրների միջև առևտրաշրջանառության, ադամանդագործության ոլորտում համագործակցության առավել զարգացման հնարավորություններին։
Հանդիպման ընթացքում կողմերը քննարկել են տնտեսական փոխգործակցության նոր հնարավորություններն ու զարգացման հեռանկարները, մասնավորապես, բարձր տեխնոլոգիաների, զբոսաշրջության ու հաղորդակցության և մշակութային փոխադարձ ճանաչողության բնագավառներում։ Առանձին շեշտվել է Հայաստանի և ԵՄ-ի միջև ազատ առևտրի համաձայնագրի ստորագրման ու Եվրոպական հարևանության քաղաքականության կարևորությունը։ Զրուցակիցներն անդրադարձել են նաև տարածաշրջանային հիմնախնդիրներին։
Հյուրի խնդրանքով ՀՀ վարչապետն անդրադարձել է Հայաստանի վրա համաշխարհային ֆինանսատնտեսական ճգնաժամի ազդեցությանն ու դրա հաղթահարման ուղղությամբ իրականացվող քայլերին։