երեքշաբթի, 29 սեպտեմբերի 2009
Հայաստանի Հանրապետության վարչապետ Տիգրան Սարգսյանն այսօր մասնակցել է «Էրեբունի Պլազա» հյուրանոցային համալիրում Համաշխարհային բանկի և Հայաստանի Հանրապետության կառավարության համատեղ կազմակերպած «Doing Business 2010» թեմայով քննարկմանը, որին մասնակցում էին նաև մասնավոր հատվածի ու քաղաքացիական հասարակության ներկայացուցիչներ։
Ողջունելով քննարկման մասնակիցներին Հայաստանի Հանրապետության վարչապետ Տիգրան Սարգսյանը կարևորել է Հայաստանում բիզնես միջավայրի բարելավման խնդիրները և նշել, որ Հայաստանի Հանրապետության նախագահի հանձնարարությամբ ձևավորվել է աշխատանքային խումբ, որի նպատակն է բարելավել «Doing Business» զեկույցում արտացոլված ցուցանիշները։ Գործադիրի ղեկավարը նշել է նաև, որ չնայած առաջընթացին, լուրջ ու հետևողական աշխատանք պետք է տարվի ոչ միայն օրենսդրության, այլև վարչարարության պրակտիկայի բարելավման ուղղությամբ։
Տիգրան Սարգսյանը Հայաստանի դիրքի յոթ տեղով բարձրացումը գոհացուցիչ չի համարել։ Այս առումով անելիքներ կան, որոնցում հաջողություն ունենալու համար կարևոր է մասնավորի և հասարակական կազմակերպությունների ու պետության գործակցությունը։
Քննարկումը նվիրված էր բիզնես միջավայրի խնդիրներին, որոնք հիմնված են «Doing Business 2010»-ի հետազոտությունների վրա։ Հետազոտության խորագիրն է «Բարեփոխվելով դժվար ժամանակներում», որ թվով 7-րդ տարեկան զեկույցն է` հրատարակված Միջազգային ֆինանսական կորպորացիայի և Համաշխարհային բանկի կողմից։
Զեկույցում նշվել է, որ այս տարի Հայաստանն իր դիրքերը բարելավել է` անցյալ տարվա 50-րդ տեղից հասնելով 43-րդին համաշխարհային 183 տնտեսությունների շարքում։