հինգշաբթի, 17 սեպտեմբերի 2009
ՀՀ վարչապետ Տիգրան Սարգսյանն այսօր մասնակցել է «ԱՐՄՍՎԻՍԲԱՆԿԻ» նորակառույց շենքի պաշտոնական բացման արարողությանը։
Խոսելով բանկի գործունեության մասին, ՀՀ վարչապետ Տիգրան Սարգսյանը կարևորել է, որ բանկն արագ տեմպերով զարգացող կառույց է։ Նա հույս է հայտնել, որ դրա հետագա զարգացումը կնպաստի բանկային համակարգում մրցակցության ավելացմանն ու խորացմանը։
ՀՀ կառավարության ղեկավարն անդրադառնալով բանկային ոլորտի խնդիրներին, նշել է, որ բանկերին պետք է ուղղորդել, որպեսզի Հայաստանում վարկավորման ծավալները կտրուկ բարձրացնեն։
Նա նշել է նաև, որ այս շենքի բացումը հնարավորությունների ավելացում է «Արմսվիսբանկի» համար՝ նոր հաճախորդներ ներգրավելու, նոր ծառայություններ մատուցելու առումով։
Կարևորելով բանկի առաքելությունը ՀՀ վարչապետը ասել է. «Արմսվիսբանկը» հանդես եկավ բավականին հետաքրքիր առաջարկություններով, որոնց մի մասն արդեն իսկ Կենտրոնական բանկն իրականացրել է. այն է` ստեղծել այնպիսի օրենսդրական դաշտ, որն առևտրային բանկերին հնարավորություն է տալու նաև ներդրումային գործունեություն ծավալել։ Դա մեր տնտեսական բարեփոխումների առանցքային կետերից է` նպաստել արժեթղթերի շուկայի զարգացմանը, և օգտվել առիթից, որ Հայաստանում է «Omx-Nasdaq» ընկերությունը»։
ՀՀ վարչապետ Տիգրան Սարգսյանը հույս է հայտնել, որ նոր աշխատանքային պայմանները կնպաստեն բանկի գործունեության ակտիվացմանը։
«ԱՐՄՍՎԻՍԲԱՆԲԱՆԿԻ» շենքի բացման արարողությանը ներկա էր նաև Լեռնային Ղարաբաղի Հանրապետության վարչապետ Արա Հարությունյանը։
