չորեքշաբթի, 16 սեպտեմբերի 2009
Այսօր Հայաստանի Հանրապետության վարչապետ Տիգրան Սարգսյանն ընդունել է Ռուսաստանի Դաշնության Ուլյանովսկի մարզի նահանգապետ Սերգեյ Մորոզովին և նրա գլխավորած պատվիրակությանը։
Զրույցի ընթացքում ՀՀ վարչապետը կարևորել է Հայաստանի Հանրապետության և Ռուսաստանի Դաշնության առանձին սուբյեկտների հետ գործակցության զարգացումը։
Ուլյանովսկի մարզի նահանգապետը ՀՀ վարչապետին է ներկայացրել Շիրակի մարզի հետ հարաբերությունների զարգացման ոլորտում ձեռք բերված համաձայնությունները, մասնավորապես` ավտոմեքենաշինության, գյուղատնտեսության ու վերամշակող արտադրության, ինչպես նաև տեքստիլ արդյունաբերության, շինարարության ու հանքարդյունաբերության ոլորտներում համագործակցության զարգացման ուղղությամբ։ Կարևորվել է Ուլյանովսկի ու Շիրակի մարզերի միջև մշակութային ու հումանիտար բնագավառներում կապերի խորացումը։
Անդրադարձ է կատարվել նաև Ռուսաստանի Դաշնության բուհերում Հայաստանի Հանրապետության ավիացիոն կադրերի պատրաստման հնարավորությանը։
